ສື່ສັງຄົມອອນລາຍ ໄດ້ມີການເຜີຍແຜ່ຮູບພາບຫຼາຍອັນ ກ່ຽວກັບປ່າໄມ້ ແລະ ການບຸກລຸກທໍາລາຍປ່າໄມ້ ຊຶ່ງກໍ່ໃຫ້ເກີດຄວາມເສຍຫາຍ ຊຶ່ງພາກລັດ ກໍຄື ກະຊວງກະສິກຳ ແລະ ປ່າໄມ້ ໂດຍສະເພາະກົມກ່ຽວຂ້ອງ ໄດ້ສົມທົບກັບຂະແໜງການຂອງຕົນຢູ່ຂັ້ນທ້ອງຖິ່ນ ເພື່ອລົງກວດກາຕົວຈິງ ຢູ່ເຂດອຸທິຍານແຫ່ງຊາດພູເຂົາຄວາຍ ບ້ານວັງເຮືອ ເມືອງທຸລະຄົມ ແຂວງວຽງຈັນ ຊຶ່ງຜ່ານການກວດກາຕົວຈິງ ມີຮ່ອງຮອຍໃໝ່ພຽງເລັກໜ້ອຍ ແລະ ບາງຂໍ້ມູນກໍບໍ່ມີຄວາມຈິງ; ພາກລັດ ກຳລັງສືບຕໍ່ດຳເນີນການ ເພື່ອຫາຜູ້ກະທໍາຜິດມາດຳເນີນຄະດີຕາມກົດໝາຍ, ທັງນີ້ ກໍເພື່ອເພີ່ມທະວີຄວາມເອົາໃຈໃສ່ຕໍ່ການປົກປັກຮັກສາປ່າໄມ້ ແນໃສ່ກຳຈັດການບຸກລຸກລໍາລາຍປ່າ ໃຫ້ຫຼຸດໜ້ອຍຖອຍລົງ.
ຈາກການລາຍງານຂອງກົມປ່າໄມ້ ກ່ຽວກັບຜົນການລົງເກັບກຳຂໍ້ມູນ ແລະ ກວດກາເບິ່ງພື້ນທີ່ການລັກລອບບຸກລຸກທໍາລາຍຊັບພະຍາກອນປ່າໄມ້ ຢູ່ເຂດອຸທິຍານແຫ່ງຊາດພູເຂົາຄວາຍ ຊຶ່ງອີງຕາມຜົນການລົງກວດກາຕົວຈິງ ຄັ້ງວັນທີ 24 ເມສາ 2024 ໄດ້ໃຫ້ຮູ້ວ່າ: ຄະນະທີມງານຈາກກົມກວດກາປ່າໄມ້ ສົມທົບກັບ ພະນັກງານກອງຄຸ້ມຄອງອຸທິຍານແຫ່ງຊາດພູເຂົາຄວາຍ, ກອງກວດກາປ່າໄມ້ແຂວງວຽງຈັນ ແລະ ໜ່ວຍງານກວດກາປ່າໄມ້ເມືອງທຸລະຄົມ ໄດ້ພ້ອມກັນລົງເກັບກຳຂໍ້ມູນ ແລະ ກວດກາພື້ນທີ່ຕົວຈິງ ຢູ່ເຂດທີ່ກ່າວມາຂ້າງເທິງນັ້ນ ຊຶ່ງສາມາດສັງລວມໄດ້ ດັ່ງນີ້: ການກວດກາພື້ນທີ່ຮູບພາບການສົມທຽບປ່າໄມ້ ປີ 2020 ແລະ ປີ 2024 ຕາມສື່ສັງຄົມອອນລາຍ ແມ່ນເຫັນວ່າເປັນຮູບພາບເກົ່າ, ໃນພື້ນທີ່ຕົວຈິງ ປັດຈຸບັນມີຮ່ອງຮອຍຕັດເປັນເວລາ 2-3 ປີແລ້ວ, ຮ່ອງຮອຍໃໝ່ແມ່ນມີໜ້ອຍ ແລະ ເປັນຕົ້ນໄມ້ນ້ອຍ ສ່ວນຕົ້ນໄມ້ໃຫຍ່ແມ່ນໝົດແຕ່ກ່ອນທີ່ບໍ່ທັນໄດ້ມອບໃຫ້ກະຊວງກະສິກຳ ແລະ ປ້າໄມ້ຄຸ້ມຄອງ; ປັດຈຸບັນ, ພົບເຫັນໄມ້ຢືນຕົ້ນຢູ່ ຍັງແຕ່ຕົ້ນນ້ອຍ ເປັນບາງຈຸດເທົ່ານັ້ນ.
ຜ່ານການກວດກາພື້ນທີ່ ກ່ຽວກັບຮູບພາບຕາມສື່ສັງຄົມອນລາຍ ທີ່ຖ່າຍເຫັນນັກທ່ອງທ່ຽວ ແລະ ມີໄມ້ທີ່ບັນທຸກຢູ່ລົດຊິ້ງນັ້ນ ບໍ່ແມ່ນຢູ່ເຂດພູກ່ອງເຂົ້າ ແຕ່ຢູ່ເຂດຜາງອຍ. ປັດຈຸບັນ, ກຳລັງມີການບຸກລຸກ ຕາມການສອບຖາມປະຊາຊົນວ່າ ມີການຕັ້ງແຄ້ມນອນເລື່ອຍໄມ້ຢູ່ເຂດນັ້ນ ປະຈໍາທັງເວັນ ແລະ ກາງຄືນ. ນອກນີ້, ຜ່ານການລົງກວດກາຕົວຈິງ ກໍຍັງພົບເຫັນສະພາບການບຸກລຸກ, ຖາງປ່າເຮັດໄຮ່ ແລະ ຈູດປ່າຈໍານວນຫຼາຍ ເຂດສັນເຂື່ອນນໍ້າມັງ ປະມານ 5 ເຮັກຕາ, ທີ່ຈູດແລ້ວ ແລະ ປັດຈຸບັນກຳລັງອະນາໄມ.
ການບຸກລຸກ, ຖາງປ່າເຮັດໄຮ່, ຈັບຈອງທີ່ດິນປ່າໄມ້ ແລະ ລັກລອບຕັດໄມ້ ຢູ່ເຂດດັ່ງກ່າວ ແມ່ນເຮັດເປັນຂະບວນການ ແລະ ເຮັດຢ່າງເປີດເຜີຍ ໂດຍບໍ່ສອດຄ່ອງຕາມກົດໝາຍ ແລະ ລະບຽບການ ຊຶ່ງຕໍ່ກັບເຫດການດັ່ງກ່າວ ກົມປ່າໄມ້ ແລະ ກົມກວດກາປ່າໄມ້ ໄດ້ເອກະພາບກັນ ມີທັດສະນະຄື: ສືບຕໍ່ລົງກວດກາສະກັດກັ້ນ ແລະ ເກັບກຳຂໍ້ມູນຫາຜູ້ກະທຳຜິດ ມາດຳເນີນຄະດີຕາມກົດໝາຍຢ່າງເຂັ້ມງວດ ໂດຍປະຕິບັດຕາມບັນດາມາດຕະການ ແລະ ວິທີການແກ້ໄຂ ເປັນຕົ້ນແມ່ນການຈັດຕັ້ງປະຕິບັດຄໍາສັ່ງເລກທີ 11/ນຍ, ລົງວັນທີ 21 ກໍລະກົດ 2023, ຄໍາແນະນໍາ ສະບັບເລກທີ 3573/ກປ, ລົງວັນທີ 10 ສິງຫາ 2023, ແຈ້ງການ ສະບັບເລກທີ 0564/ກປ, ລົງວັນທີ 31 ມັງກອນ 2024 ແລະ ມາດຕາ 52 ການສະກັດກັ້ນ ແລະ ຕ້ານໄຟໄໝ້ລາມປ່າ ແລະ ມາດຕາ 53 ການຈຳກັດການຖາງປ່າເຮັດໄຮ່ແບບເລື່ອນລອຍ ຂອງກົດໝາຍວ່າດ້ວຍປ່າໄມ້ (ສະບັບປັບປຸງ) ສະບັບເລກທີ 64/ສພຊ, ລົງວັນທີ 13 ມິຖຸນາ 2019.
(ຂ່າວ: ສຸກສະຫວັນ, ຂໍ້ມູນ: ກົມປ່າໄມ້)
ຄໍາເຫັນ