Apple ລະບຸວ່າ: ໃນປີ 2024 ບໍລິສັດໄດ້ປິດບັນຊີນັກພັດທະນາຫຼາຍກວ່າ 146,000 ບັນຊີ ຍ້ອນຄວາມກັງວົນກ່ຽວກັບການສໍ້ໂກງ ແລະ ປະຕິເສດການຮ້ອງຂໍລົງທະບຽນຂອງນັກພັດທະນາຫຼາຍກວ່າ 139,000 ບັນຊີ, ທັງປະຕິເສດການສ້າງບັນຊີຜູ້ໃຊ້ຫຼາຍກວ່າ 711 ລ້ານບັນຊີ ແລະ ປິດການໃຊ້ງານບັນຊີຜູ້ໃຊ້ເກືອບ 129 ລ້ານບັນຊີ ເພື່ອປ້ອງກັນກິດຈະກໍາອັນຕະລາຍ ຫຼື ເປັນໄພຕໍ່ຄວາມປອດໄພຂອງຜູ້ໃຊ້.
ໃນເດືອນຜ່ານມາ, Apple ໄດ້ສະກັດກັ້ນຄວາມພະຍາຍາມທີ່ຈະຕິດຕັ້ງ ຫຼື ເປີດໃຊ້ງານແອັບພລິເຄຊັນທີ່ເຜີຍແຜ່ຢູ່ນອກ App Store ຫຼື ນອກແພລັດຟອມຂອງບຸກຄົນທີສາມທີ່ໄດ້ຮັບອະນຸຍາດເກືອບ 4.6 ລ້ານຄັ້ງ. ເນື່ອງຈາກວ່າກ່ອນທີ່ແອັບພລິເຄຊັນໃດຈະເຜີຍແຜ່ໃນ App Store ໄດ້ນັ້ນຈະຕ້ອງຜ່ານການກວດສອບໂດຍທີມ App Review ຂອງບໍລິສັດ ຊຶ່ງຂະບວນການນີ້ໃຊ້ທັງກວດສອບໂດຍມະນຸດ ແລະ ລະບົບອັດຕະໂນມັດເພື່ອຊອກຫາ ແລະ ຈັດການກັບແອັບພລິເຄຊັນທີ່ອາດຈະເປັນອັນຕະລາຍຕໍ່ຜູ້ໃຊ້.
ໃນປີ 2024, Apple ໄດ້ກວດສອບຄຳຮ້ອງແອັບພລິເຄຊັນຫຼາຍກວ່າ 7.7 ລ້ານລາຍການໃນ App Store ຊຶ່ງມີຫຼາຍກວ່າ 1.9 ລ້ານລາຍການທີ່ຖືກປະຕິເສດ ຍ້ອນບໍ່ປະຕິບັດຕາມມາດຕະຖານຂອງບໍລິສັດສໍາລັບຄວາມປອດໄພ, ຄວາມໜ້າເຊື່ອຖື ແລະ ປະສົບການຂອງຜູ້ໃຊ້ງານ ຊຶ່ງລວມທັງການລະເມີດຄວາມເປັນສ່ວນຕົວ ຫຼື ຄວາມກັງວົນກ່ຽວກັບການສໍ້ໂກງ.
ນອກຈາກນີ້, ໃນປີ 2024, ຍັງມີແອັບພລິເຄຊັນຫຼາຍກວ່າ 37,000 ແອັບ ທີ່ກ່ຽວຂ້ອງກັບການສໍ້ໂກງ, ປະຕິເສດແອັບພລິເຄຊັນທີ່ຮຽນແບບແອັບພລິເຄຊັນອື່ນຫຼາຍກວ່າ 320,000 ລາຍການ ແລະ ຖືກປະຕິເສດອີກຫຼາຍກວ່າ 400,000 ແອັບພລິເຄຊັນທີ່ລະເມີດຄວາມເປັນສ່ວນຕົວ.
ທັງນີ້, ໃນປີ 2024, Apple ຍັງກວດພົບຂໍ້ມູນບັດເຄຣດິດທີ່ຖືກລັກເກືອບ 4.7 ລ້ານໃບ ແລະ ຫ້າມບັນຊີຜູ້ໃຊ້ຫຼາຍກວ່າ 1.6 ລ້ານບັນຊີບໍ່ໃຫ້ເຮັດທຸລະກຳໄດ້ອີກ.
ຄໍາເຫັນ