ຮອງຫົວໜ້າພະແນກຊັບພະຍາກອນທຳມະຊາດ ແລະ ສິ່ງແວດລ້ອມ ປະທານຄະນະກຳມະການຄຸ້ມຄອງການຈັດຕັ້ງປະຕິບັດໂຄງການ, ທ່ານ ຄຳພັນ ໄຊຍະລາດ ປະທານແນວລາວສ້າງຊາດເມືອງປາກກະດິງ, ມີພາກສ່ວນທີ່ກ່ຽວຂ້ອງຂັ້ນແຂວງ, ເມືອງເຂົ້າຮ່ວມ.
ໃນພິທີ, ທ່ານ ບຸນລອນ ສີໃສອ່ອນ ຮອງນາຍບ້ານນາບອນ ໄດ້ລາຍງານວ່າ: ລະບົບນໍ້າລິນບ້ານນາບອນແມ່ນເປັນລະບົບນໍ້າລິນທີ່ຖືກສ້ອມແປງຫົວງານເກົ່າ, ສ້າງອ່າງຕອງ ແລະ ອ່າງເກັບນໍ້າໃໝ່ ຢູ່ເທີງພູງູ ຄຸ້ມບ້ານນາບອນເໜືອ. ສໍາລັບຢູ່ຄຸ້ມບ້ານນາບອນໃຕ້ແມ່ນໄດ້ກໍ່ສ້າງຫົວງານ ໂດຍມີລະບົບກັ່ນຕອງຢູ່ກັບຫົວງານ ແລະ ອ່າງເກັບນໍ້າຂຶ້ນມາໃໝ່. ຂະໜາດຂອງອ່າງເກັບນໍ້າ ແມ່ນ 4.15 ແມັດ x 4 ແມັດ, ສູງ 2.10 ແມັດ ສາມາດບັນຈຸນໍ້າໄດ້ 30 ພັນກວ່າແມັດກ້ອນ.
ການສ້ອມແປງ ແລະ ກໍ່ສ້າງລະບົບນໍ້າລິນນີ້ແມ່ນແບ່ງອອກເປັນສອງໄລຍະຄື: ໄລຍະທີ່ໜຶ່ງແມ່ນກໍ່ສ້າງອ່າງເກັບ, ອ່າງຕອງ ແລະ ສ້ອມແປງຫົວງານ, ໄລຍະທີ ສອງແມ່ນຂຸດຂຸມວາງທໍ່ແມ່ຈາກອ່າງນ້ຳຢູ່ເທີງພູລົງຫາບ້ານ ແລະ ແຈກຢາຍເຂົ້າໃສ່ແຕ່ລະຈຸດຫຼັງຄາເຮືອນ, ມີທັງໝົດຈໍານວນ 183 ຈຸດ. ຊຶ່ງແຕ່ລະຈຸດຫຼັງຄາເຮືອນແມ່ນຕິດຕັ້ງກົງເຕີ້ເພື່ອໃຫ້ການເຂົ້າເຖິງນໍ້າພາຍໃນບ້ານໄດ້ທຸກຄົວເຮືອນ. ສຳລັບທືນໃນການກໍ່ສ້າງສ້ອມແປງ ແມ່ນໄດ້ຮັບການຊ່ວຍເຫຼືອຈາກໂຄງການສົ່ງເສີມໃຫ້ມີການເຂົ້າເຖິງ ການມີນ້ຳດື່ມ-ນຳໃຊ້ ແລະ ມີລະບົບສຸຂາພິບານ ໃນບັນດາບ້ານທີ່ຢູ່ໃນເຂດອ່າງຮັບນ້ຳສາ: ທີ່ມີຄວາມສະອາດ ແລະ ມີຄວາມຍືນຍົງ ເປັນເງີນຈຳນວນ 6 ຮ້ອຍລ້ານກ່ວາກີບ ແລະ ທືນສົມທົບຂອງພໍ່ແມ່ປະຊາຊົນ 5 ຮ້ອຍລ້ານກ່ວາກີບ, ລວມມູນຄ່າການກໍ່ສ້າງທັງໝົດ 1 ຕື້ກ່ວາກີບ. ການກໍ່ສ້າງໄດ້ເລີ່ມປະຕິບັດແຕ່ຕົ້ນເດືອນມິຖຸນາ 2024 ແລະ ໄດ້ສໍາເລັດໃນທ້າຍປີ 2024 ນີ້. ໂດຍການກ່າວມອບຂອງທ່ານ ນາງ ອິນທຸລັກ ໄຊຍະຜົນ ຕາງໜ້າອົງການ CCL, ຮັບໂດຍທ່ານ ທອງມາ ປັນນະວົງ ນາຍບ້ານນາບອນ.
(ຂ່າວ: ແສງທອງ)
ຄໍາເຫັນ