ເປັນກຽດເຂົ້າຮ່ວມພິທີຄັ້ງນີ້,ມີທ່ານ ພົນຈັດຕະວາ ແປ້ນຄຳ ບຸດດາແພງ ຮອງເລຂາພັກແຂວງບໍ່ແກ້ວ, ທ່ານ ເຄື່ອນເພັດ ວົງຈັນ ຄະນະປະຈຳພັກແຂວງ ຮອງເຈົ້າແຂວງບໍ່ແກ້ວຮອງຫົວໜ້າຄະນະຊີ້ນຳອົງການຄຸ້ມຄອງບໍລິຫານເຂດເສດຖະກິດພິເສດ ສາມຫຼ່ຽມຄຳ, ທ່ານ ບຸນທອງ ແສງສີກອງ ຫົວໜ້າອົງການຄຸ້ມຄອງບໍລິຫານເຂດເສດຖະກິດພິເສດ ສາມຫຼ່ຽມຄຳ, ທ່ານ ເກົ້າ ຫຼົງ ຮອງປະທານສະພາບໍລິຫານເຂດເສດຖະກິດພິເສດ ສາມຫຼ່ຽມຄຳ, ທ່ານ ເວີຍ ຈົ່ງ ຜູ້ອຳນວຍການໃຫຍ່ກຸ່ມບໍລິສັດດອກງິ້ວຄຳ ຈຳກັດ, ຄະນະນຳຂອງແຂວງ; ເມືອງຕົ້ນເຜີ້ງ, ຄະນະຄຸ້ມຄອງເຂດ, ຄະນະສະພາບໍລິຫານເຂດ, ເຖົ້າແກ່ແນວໂຮມ, ອຳນາດການປົກຄອງບ້ານ ແລະ ມວນຊົນເຂົ້າຮ່ວມຢ່າງຫຼວງຫຼາຍ.
ການສະເຫຼີມສະຫຼອງບຸນປີໃໝ່ລາວ ພສ 2568ຢູ່ເຂດເສດຖະກິດພິເສດສາມຫຼ່ຽມຄໍາປີນີ້ປະກອບມີກິດຈະກຳຫຼາຍຢ່າງເປັນຕົ້ນແມ່ນຕອນເຊົ້າໄດ້ມີພິທີໃສ່ບາດ ພະສົງ 29ອົງ, ຈັດພິທີບາສີສູ່ຂວັນ ແລະ ຫົດນໍ້າອວຍພອນຊຶ່ງກັນ ແລະ ກັນ, ມີການສະແດງສິລະປະວັດທະນະທໍາ ຢ່າງມ່ວນຊື່ນ ຢູ່ທີ່ຕະຫຼາດວັດທະນະທໍານາໆຊາດຂອງເຂດເສດຖະກິດພິເສດ ສາມຫຼ່ຽມຄຳ.
ໃນໂອກາດສະຫຼອງບຸນປີໃໝ່ລາວຄັ້ງນີ້, ຄະນະນໍາອົງການຄຸ້ມຄອງເຂດເສດຖະກິດພິເສດສາມຫຼ່ຽມຄໍາ ໄດ້ມີຄໍາເຫັນສະເໜີໃຫ້ທຸກພາກສ່ວນຢູ່ໃນເຂດສືບຕໍ່ປະຕິບັດແຜນພັດທະນາເສດຖະກິດ-ສັງຄົມຂອງເຂດເສດຖະກິດພິເສດ ສາມຫຼ່ຽມຄຳໃຫ້ເຕີບໃຫຍ່ຂະຫຍາຍຕົວເປັນກ້າວໆ ແລະ ການສະເຫຼີມສະຫຼອງປີໃໝ່ລາວ ຖືວ່າເປັນການເຕົ້າໂຮມຄວາມສາມັກຄີພາຍໃນເຂດໃຫ້ມີຄວາມແໜ້ນແຟ້ນຍິ່ງຂຶ້ນ, ທັງເປັນການຮັກສາສືບທອດປະເພນີວັດທະນະທໍາອັນດີງາມຂອງຊາດ, ສ້າງໂອກາດໃຫ້ພີ່ນ້ອງບ້ານໃກ້ເຮືອນຄຽງ ແລະ ປະຊາຊົນບັນດາເຜົ່າໄດ້ພົບປະສ້າງສັນ ແລະ ສະແດງຄວາມເຄົາລົບນັບຖື ຊຶ່ງກັນ ແລະ ກັນ ພ້ອມທັງອວຍພອນ ຫົດນໍ້າກັນ ຕະຫຼອດໄລຍະປີໃໝ່ລາວ ນີ້.
(ຂ່າວ: ເຂດເສດຖະກິດພິເສດສາມຫຼ່ຽມຄໍາ)
ຄໍາເຫັນ