ທ່ານ ອໍກັສຕິນ ຄາຣສເຕນ ຫົວໜ້າບໍລິຫານ BIS ກ່າວວ່າ: ສົງຄາມການຄ້າທີ່ເກີດຂື້ນໂດຍ ສະຫະລັດ ອາເມຣິກາ ແລະ ການປ່ຽນແປງນະໂຍບາຍອື່ນໆກຳລັງທໍາລາຍລະບຽບເສດຖະກິດທີ່ເຄີຍມີຄວາມໝັ້ນຄົງເປັນເວລາດົນນານ, ທ່ານກ່າວຕື່ມວ່າ: ເສດຖະກິດໂລກກໍາລັງຢູ່ໃນໄລຍະທີ່ສໍາຄັນໃນການເຂົ້າສູ່ "ຍຸກໃໝ່ຂອງຄວາມບໍ່ແນ່ນອນ ແລະ ບໍ່ສາມາດຄາດເດົາໄດ້" ຊຶ່ງກໍາລັງທົດສອບຄວາມໄວ້ວາງໃຈທີ່ສາທາລະນະມີຕໍ່ສະຖາບັນຕ່າງໆ, ລວມທັງທະນາຄານກາງ.
ທ່ານ ຄາຣສເຕນ ກ່າວວ່າ: ການເພີ່ມຂຶ້ນຂອງອຸປະສັກການຄ້າ ແລະ ການຈຳແນກທາງການຄ້າທີ່ເພີ່ມຂຶ້ນ ຖືເປັນເລື່ອງໜ້າກັງວົນ ເນື່ອງຈາກເປັນການຊໍ້າເຕີມເສດຖະກິດ ແລະ ຜະລິດຕະພັນທີ່ຫຼຸດລົງຫຼາຍສິບປີ. ນອກຈາກນີ້, ຍັງມີຫຼັກຖານທີ່ສະແດງໃຫ້ເຫັນວ່າ: ເສດຖະກິດໂລກມີຄວາມຍືດຍຸ່ນຕໍ່ພາວະຖົດຖອຍໜ້ອຍລົງ ໂດຍປັດໃຈຕ່າງໆເຊັ່ນ: ປະຊາກອນອາຍຸສູງ, ການປ່ຽນແປງຂອງສະພາບດິນຟ້າອາກາດ, ພູມສາດ ແລະ ບັນຫາລະບົບຕ່ອງໂສ້ການສະໜອງ. ທັງໝົດລ້ວນແຕ່ມີສ່ວນເຮັດໃຫ້ເກີດສະພາບແວດລ້ອມທີ່ມີການເໜັງຕີງຫຼາຍຂຶ້ນ.
ບົດລາຍງານ BIS ສະບັບນີ້ໄດ້ຖືກເປີດເຜີຍກ່ອນທີ່ຈະເຖິງກຳນົດການເກັບອັດຕາພາສີຂອງ ທ່ານ ໂດໂນ ທຣໍາປະທານາທິບໍດີສະຫະລັດ ອາເມຣິກາ ໃນວັນທີ 9 ກໍລະກົດນີ້ ແລະ ຫຼັງຈາກສະຖານະການທາງພູມສາດທົ່ວໂລກປະເຊີນກັບຄວາມວຸ້ນວາຍຢ່າງຮຸ່ນແຮງຕໍ່ເນື່ອງເປັນເວລາເຖິງ 6 ເດືອນ.
ບົດລາຍງານປະຈໍາປີຂອງ BIS ແມ່ນຕົວຊີ້ວັດທີ່ສໍາຄັນທີ່ສະທ້ອນເຖິງຄວາມຮູ້ສຶກຂອງທະນາຄານກາງ ໃນປະເທດຕ່າງໆ, ເນື່ອງຈາກວ່າເປັນບົດລາຍງານຈາກກອງປະຊຸມປະຈໍາປີຂອງເຈົ້າໜ້າທີ່ທະນາຄານກາງທົ່ວໂລກ ຊຶ່ງຈັດຂຶ້ນເປັນປະຈຳ ໃນປະເທດສະວິດ. ໃນຄະນະທີ່ BIS ໄດ້ຖືກເຫັນວ່າເປັນທະນາຄານກາງຂອງທະນາຄານກາງທົ່ວໂລກ.
ຄໍາເຫັນ