ຮ້ານຄ້າ ແລະ ຫົວໜ່ວຍທຸລະກິດ ໃນການຕິດຕໍ່ພົວພັນ ແລະ ຈໍລະຈອນແຈກຢາຍສິນຄ້າຢ່າງກວ້າງຂວາງ, ພ້ອມທັງອໍານວຍຄວາມສະດວກໃຫ້ແກ່ການຄ້າ ການຊື້-ຂາຍ ແລະ ການສື່ສານ ທັງພາຍໃນ ແລະ ລະຫວ່າງປະເທດ ຊຶ່ງບໍ່ພຽງແຕ່ເປັນຕົວກາງ ຂອງການເຊື່ອມໂຍງ ລະຫວ່າງ ຜູ້ສະໜອງ ແລະ ຜູ້ບໍລິໂພກເທົ່ານັ້ນ ແຕ່ຍັງປະກອບສ່ວນສໍາຄັນໃນການຂັບເຄື່ອນ ແຜນພັດທະເສດຖະກິດດີຈີຕອນແຫ່ງຊາດ ທີ່ຫຼາຍກິດຈະກໍາ ແລະ ທຸລະກິດ ຍັງອາໄສການບໍລິການໄປສະນີ ເພື່ອໂຄສະນາເຖິງເຮືອນ, ສ້າງການພົວພັນ, ຈັດສົ່ງ ແລະ ແຈກຢາຍສິນຄ້າ ໃຫ້ແກ່ລູກຄ້າ; ທ່ານ ໄຊລືຊາ ອິນສີຊຽງໃໝ່ ຄະນະປະຈຳພັກ ກະຊວງ, ຮອງລັດຖະມົນຕີກະຊວງເຕັກໂນໂລຊີ ແລະ ການສື່ສານໄດ້ເຂົ້າຮ່ວມໃນພິທີສະເຫຼີມສະຫຼອງວັນໄປສະນີໂລກຄົບຮອບ 150 ປີ (9 ຕຸລາ1874–9 ຕຸລາ 2024) ທີ່ສະຖາບັນເຕັກໂນໂລຊີສື່ສານຂໍ້ມູນຂ່າວສານ ແລະ ໄດ້ກ່າວວ່າ: ການບໍລິການຈັດສົ່ງໄປສະນີພັນ ແລະ ພັດສະດຸໄປສະນີ ໃນຕະຫຼາດການຄ້າເອເລັກໂຕຣນິກ (E-Commerce) ກໍາລັງມີການເຕີບໂຕ. ປັດຈຸບັນ ມີການພັດທະນາໄປພ້ອມກັບການເຕີບໂຕ ຂອງການຊື້-ຂາຍອອນລາຍ ຊຶ່ງສະແດງອອກໃຫ້ເຫັນເຖິງໂຕເລກບໍລິມາດການຂົນສົ່ງ ຂອງໄປສະນີພັນ ແລະ ພັດສະດຸຜ່ານທາງໄປສະນີໃນອຸດສາຫະກຳ e-commerce ເພີ່ມຂຶ້ນ 73% ໂດຍສະເພາະ ແມ່ນປະເທດໃນອາເມຣິກາ, ເອີຣົບ ແລະ ເອຊີຕາເວັນອອກ ທີ່ກຳລັງເຕີບໂຕ ຂອງພັດສະດຸຈາກe-commerce ແບບກ້າວກະໂດດ; ປັດຈຸບັນ ໂຄງລ່າງພື້ນຖານຂອງຜູ້ປະກອບການໄປສະນີໃນທົ່ວໂລກ ມີຫ້ອງການໄປສະນີ ປະມານ 618,416ແຫ່ງ ຊຶ່ງຖືວ່າເປັນໂຕເລກຂ້ອນຂ້າງຄົງທີ່ໃນທົດສະວັດທີ່ຜ່ານມາ ໃນນີ້ 185,327ແຫ່ງ ບໍ່ແມ່ນຫ້ອງການຂອງຜູ້ປະກອບການໄປສະນີລັດ (outsourced). ນອກຈາກນີ້ ຈໍານວນພະນັກງານທີ່ປະຕິບັດການໄປສະນີໃນປີ 2022 ຄາດຄະເນມີທັງໝົດ5.06 ລ້ານຄົນ ຊຶ່ງແຮງງານມີການຫຼຸດລົງໃນທົດສະວັດທີ່ຜ່ານມາ ແລະ ມີອັດຕາສ່ວນໜ້ອຍກວ່າ 10 ປີກ່ອນ.
ສຳລັບ ສປປ ລາວ ໃນປັດຈຸບັນ, ວິວັດທະນາການດ້ານເຕັກໂນໂລຊີການສື່ສານ ໄດ້ຂະຫຍາຍຕົວຢ່າງກ້າວກະໂດດຢູ່ໃນຍຸກແຫ່ງການປະຕິວັດອຸດສາຫະກຳ ຄັ້ງທີ 4. ສະນັ້ນ, ການນໍາໃຊ້ເຕັກໂນໂລຊີດັ່ງກ່າວ ຈຶ່ງກາຍເປັນພື້ນຖານສຳຄັນໃນການຫັນເປັນອຸດສາຫະກຳ ແລະ ທັນສະໄໝ ຂອງສປປ ລາວ ພາຍໃຕ້ວິໄສທັດ ການພັດທະນາເສດຖະກິດ ດີຈີຕອນ ຮອດປີ 2040 ຄື: ນໍາໃຊ້ເຕັກໂນໂລຊີດີຈີຕອນເປັນເຄື່ອງມືສໍາຄັນໃນການຂັບເຄື່ອນທຸກຂະແໜງການ ເພື່ອສ້າງເສດຖະກິດດີຈີຕອນ ແນໃສ່ປະກອບສ່ວນເຂົ້າໃນການດັດປັບໂຄງສ້າງເສດຖະກິດ ຂອງປະເທດ ໃຫ້ມີການຂະຫຍາຍຕົວຢ່າງເຂັ້ມແຂງ, ໝັ້ນທ່ຽງ ແລະ ຍືນຍົງຊຶ່ງໜຶ່ງໃນນັ້ນ ແມ່ນຂະແໜງການໄປສະນີ ຂອງພວກເຮົາ ທີ່ໄດ້ປະກອບສ່ວນຢ່າງຕັ້ງໜ້າເຂົ້າໃນການສ້າງເສດຖະກິດດີຈີຕອນແຫ່ງຊາດ.
ວຽກງານໄປສະນີ ມີບົດບາດສໍາຄັນ ແລະ ປະກອບສ່ວນຢ່າງໃຫຍ່ຫຼວງເຂົ້າໃນການປະຕິບັດໜ້າທີ່ການເມືອງ ຂອງພັກເປັນຕົ້ນ: ການພັດທະນາເສດຖະກິດ, ວຽກງານປ້ອງກັນຊາດ-ປ້ອງກັນຄວາມສະຫງົບ ແລະ ວຽກງານວັດທະນະທຳ-ສັງຄົມ. ປັດຈຸບັນ ມີຈຳນວນຜູ້ປະກອບການຂະແໜງການໄປສະນີທັງໝົດ 63 ບໍລິສັດ, ໃນນັ້ນ ບໍລິສັດບໍລິການພາຍໃນແຂວງ 52 ບໍລິສັດ, ບໍລິສັດບໍລິການສະເພາະລະຫວ່າງປະເທດ 4 ບໍລິສັດ ແລະ ບໍລິສັດບໍລິການທັງພາຍໃນ ແລະ ລະຫວ່າງປະເທດ 7 ບໍລິສັດ, ມີປ່ອງບໍລິການທັງໝົດ 1,161 ແຫ່ງ ຊຶ່ງກວມເອົາທຸກແຂວງ, ທຸກເມືອງ ແລະ ເກືອບທຸກບ້ານ ໃນຂອບເຂດທົ່ວປະເທດ, ສ້າງລາຍຮັບໄດ້ 198 ຕື້ກວ່າກີບ ແລະ ມອບພັນທະອາກອນເຂົ້າງົບປະມານແຫ່ງຊາດຈຳນວນ 14 ຕື້ກວ່າກີບ.
ການພັດທະນາລະບົບການຄຸ້ມຄອງ ແລະ ການບໍລິການໄປສະນີໄດ້ຮັບການປັບປຸງໃຫ້ມີປະສິດທິພາບສູງຂຶ້ນ ດ້ວຍການຫັນເປັນດີຈີຕອນ ເພື່ອຮອງຮັບການບໍລິການໃນຍຸກອຸດສາຫະກໍາ4.0 ຕາມແຜນພັດທະນາເສດຖະກິດດີຈີຕອນແຫ່ງຊາດ ໂດຍໄດ້ສ້າງລະບົບສູນລວມການກວດກາ ແລະ ຕິດຕາມເຄື່ອງຝາກໄປສະນີພາຍໃນປະເທດ L-Trackingສາມາດນໍາໃຊ້ໄດ້ໃນໂທລະສັບສະມາດໂຟນ ທັງລະບົບ ແອນດຣອຍ, ໄອໂອເອັສ ແລະ ໃນຄອມພິວເຕີ ຊຶ່ງອຳນວຍຄວາມສະດວກໃຫ້ແກ່ການຕິດຕາມ, ກວດກາ ແລະ ເກັບກຳຂໍ້ມູນສະຖິຕິ, ຜູ້ປະກອບການໄປສະນີສາມາດນຳໃຊ້ເຂົ້າໃນການບໍລິການ ແລະ ຜູ້ຊົມໃຊ້ກໍສາມາດຕິດຕາມສະຖານະການເຄື່ອງຝາກຂອງຕົນໄດ້ຕະຫຼອດເວລາ.
ທ່ານ ໄຊລືຊາ ອິນສີຊຽງໃໝ່ ກ່າວຕື່ມວ່າ: ໂດຍທົ່ວໄປແລ້ວ ເຮົາຈະຄິດວ່າການແຂ່ງຂັນເປັນສິ່ງທີ່ທ້າທາຍ ແຕ່ສໍາລັບ ສະຫະພາບໄປສະນີສາກົນແລ້ວ ແມ່ນມີຄວາມຍິນດີທີ່ຈະສ້າງຄູ່ຮ່ວມພັນທະມິດກັບຫຼາຍພາກສ່ວນ ໃນນັ້ນ ຈະເປັນການເປີດກວ້າງການເສີມສ້າງຄວາມອາດສາມາດ ຂອງພວກເຮົາຕໍ່ກັບສິ່ງທ້າທາຍຕ່າງໆໃນໂລກ ເຊັ່ນດຽວກັນກັບສະພາບການປ່ຽນແປງຂອງດິນຟ້າອາກາດ ຊຶ່ງຈໍາເປັນຈະຕ້ອງມີການຮ່ວມມືລະຫວ່າງປະເທດ ເພື່ອແກ້ໄຂບັນຫາດັ່ງກ່າວ ແລະ ເມື່ອເຮົາເບິ່ງໄປຍັງອະນາຄົດຂ້າງໜ້າ, ພາລະກິດ ຂອງສະຫະພາບໄປສະນີສາກົນ ຍັງຄົງຊັດເຈນ ນັ້ນກໍຄື ການເຊື່ອມໂຍງ ແລະ ເສີມສ້າງຄວາມເຂັ້ມແຂງໃຫ້ແກ່ປວງຊົນໃນທົ່ວໂລກ ດ້ວຍຄວາມມຸ່ງໝັ້ນ ຕໍ່ຄວາມເປັນພະຫຸພາຄີ, ນະວັດຕະກໍາ ແລະ ການລວມຕົວ ຊຶ່ງສະຫະພາບໄປສະນີສາກົນ ຈະຕ້ອງສືບຕໍ່ຊຸກຍູ້ ແລະ ສົ່ງເສີມການຕິດຕໍ່ສື່ສານລະດັບໂລກ ແລະ ສະໜອງການບໍລິການໃຫ້ແກ່ກຸ່ມຄົນຍຸກໃໝ່ ໃນອີກ 150 ປີ ຕໍ່ໜ້າ.
ຄໍາເຫັນ