 |
ພ້ອມຂັບເຄື່ອນການເຕີບໂຕແບບຍືນຍົງໃນໄລຍະໃໝ່, ໃຫ້ກຽດເຂົ້າຮ່ວມໃນພິທີມີ ທ່ານ ສັນຕິພາບ ພົມວິຫານ ຮອງນາຍົກລັດຖະມົນຕີ ລັດຖະມົນຕີກະຊວງການເງິນ, ມີຮອງລັດຖະມົນຕີກະຊວງອຸດສາຫະກຳ ແລະ ການຄ້າ, ຮອງລັດຖະມົນຕີກະຊວງກະສິກຳ ແລະ ສິ່ງແວດລ້ອມ, ປະທານຄະນະກໍາມະການປົກຄອງເມືອງຫາດຊາຍຟອງ, ທ່ານເອກອັກຄະລັດຖະທູດດານມາກ ປະຈຳຫວຽດນາມ ແລະ ສປປ ລາວ, ຮອງປະທານບໍລິຫານ ກຸ່ມບໍລິສັດ ຄາສເບີກ ພາກພື້ນອາຊີ ແລະ ພາກສ່ວນກ່ຽວຂ້ອງ ເຂົ້າຮ່ວມ.
 |
LDP1 ແມ່ນໄລຍະທຳອິດໃນແຜນພັດທະນາ 10 ປີ ຂອງ ບໍລິສັດ ເບຍລາວ ຈຳກັດ ຊຶ່ງລວມເອົາ ການ ຍົກລະດັບໂຮງງານໃຫ້ມີຄວາມທັນສະໄໝຍິ່ງຂຶ້ນ, ເສີມຂະຫຍາຍພື້ນຖານໂຄງລ່າງ ແລະ ຄວາມຍືນຍົງ, ພ້ອມທັງລະບົບການຄຸ້ມຄອງນ້ຳທີ່ຮອງຮັບຄວາມຕ້ອງການຂອງການຜະລິດໃນອະນາຄົດ; ເປົ້າ ໝາຍຫຼັກຂອງ LDP1 ແມ່ນການຂະຫຍາຍສາຍການຜະລິດທີ່ທັນສະໄໝແບບຄົບວົງຈອນ, ມີຄວາມໄວສູງ ສາມາດຜະລິດໄດ້ເຖິງ 45,000 ຕຸກຕໍ່ຊົ່ວໂມງ ຊຶ່ງຮອງຮັບທັງການບັນຈຸພັນແບບກະປ໋ອງ ແລະ ກະຕຸກຢາງ PET ພາຍໃນລະບົບດຽວທີ່ມີປະສິດທິພາບສູງຂຶ້ນ. ສາຍການຜະລິດໃໝ່ນີ້ ຈະຊ່ວຍເພີ່ມປະສິດທິພາບໃນການດຳເນີນງານ, ປັບປຸງປະສິດທິຜົນຂອງພະນັກງານ ແລະ ຊ່ວຍຄວບຄຸມຕົ້ນທຶນການຜະລິດໃຫ້ດີກວ່າເກົ່າ ເພື່ອຮັບປະກັນຄວາມສາມາດໃນການແຂ່ງຂັນໃນໄລຍະຍາວ. ດ້ວຍມູນຄ່າການລົງທຶນ 50.2 ລ້ານເອີໂຣ (ປະມານ 1.18 ພັນຕື້ກີບ), LDP1 ຖືເປັນການປະກອບສ່ວນສຳຄັນເຂົ້າໃນການພັດທະນາເສດຖະກິດຂອງ ສປປ ລາວ ຊຶ່ງລວມມີສ້າງໂອກາດໃນການຈ້າງງານທີ່ເພີ່ມຂຶ້ນ, ສົ່ງເສີມຄວາມເຂັ້ມແຂງໃຫ້ແກ່ຂະແໜງການຜະລິດພາຍໃນປະເທດ, ເພີ່ມຂີດຄວາມສາມາດໃນການປັບຕົວຂອງລະບົບຕ່ອງໂສ້ການສະໜອງສິນຄ້າ ແລະ ເພີ່ມການມອບພັນທະພາສີ-ອາກອນໄລຍະຍາວໃຫ້ແກ່ລັດຖະບານ.
ທ່ານ ສັນຕິພາບ ພົມວິຫານ ໄດ້ກ່າວວ່າ: ການລົງທຶນທີ່ມີມູນຄ່າຫຼາຍກວ່າ 50 ລ້ານເອີໂຣ ໃນຄັ້ງນີ້, ບໍ່ພຽງແຕ່ແມ່ນຜົນສຳເລັດອັນສະຫງ່າງາມ ແລະ ເປັນບາດກ້າວຂະຫຍາຍຕົວທີ່ສຳຄັນຂອງ ບໍລິສັດ ເບຍລາວ ຈຳກັດ ເທົ່ານັ້ນ, ແຕ່ມັນຍັງເປັນການຢັ້ງຢືນຢ່າງໜັກແໜ້ນເຖິງຄວາມເຊື່ອໝັ້ນຂອງນັກລົງທຶນ ທີ່ມີຕໍ່ສະພາບແວດລ້ອມ ການລົງທຶນຢູ່ ສປປ ລາວ. ລັດຖະບານລາວ ຖືວ່າການຂະຫຍາຍຕົວຂອງທຸລະກິດໃນຄັ້ງນີ້ ແມ່ນໝາກຜົນແຫ່ງການຮ່ວມມືທີ່ເຂັ້ມແຂງລະຫວ່າງພາກລັດ ແລະ ພາກເອກະຊົນ, ທັງເປັນສັນຍານອັນດີທີ່ສົ່ງໄປເຖິງນັກລົງທຶນສາກົນໃຫ້ ເຫັນວ່າ ສປປ ລາວ ຍັງເປັນປະເທດທີ່ມີສະຖຽນລະພາບ ແລະ ເປັນຈຸດໝາຍປາຍທາງການລົງທຶນໃນໄລຍະຍາວ ທີ່ໜ້າເຊື່ອຖື.
ທ່ານ ເຮັນຣິກ ຈູລ ແອນເດີຊັນ ຜູ້ອຳນວຍການໃຫຍ່ ບໍລິສັດ ເບຍລາວ ຈຳກັດ ໄດ້ກ່າວວ່າ: LDP1 ບໍ່ພຽງແຕ່ແມ່ນການຂະຫຍາຍກຳລັງການຜະລິດ ແຕ່ຍັງສະທ້ອນເຖິງຄວາມມຸ່ງໝັ້ນໄລຍະຍາວຂອງພວກເຮົາໃນ ສປປ ລາວ, ໃນການລົງທຶນເພື່ອຍົກລະດັບຂີດຄວາມສາມາດດ້ານການຜະລິດ, ປັບປຸງປະສິດທິພາບ ແລະ ສືບຕໍ່ ປະກອບສ່ວນຢ່າງມີຄວາມໝາຍເຂົ້າໃນການພັດທະນາປະເທດຊາດ.
ທ່ານ ຈາວ ອາເບຄາຊິສ ຮອງປະທານໃຫຍ່ ຜູ້ອຳນວຍການປະຈຳພາກພື້ນອາຊີ ກຸ່ມບໍລິສັດ ຄາລສເບີກ ກໍໄດ້ກ່າວວ່າ: ສປປ ລາວ ເປັນພາກສ່ວນທີ່ສຳຄັນໃນຍຸດທະສາດການເຕີບໂຕຂອງພວກເຮົາໃນອາຊີ. ໂດຍຜ່ານບໍລິສັດ ເບຍລາວ ຈຳກັດ ພວກເຮົາພວມລົງທຶນໃນການສ້າງຂີດຄວາມສາມາດໄລຍະຍາວ ເພື່ອສ້າງຄວາມເຂັ້ມແຂງໃນພາກພື້ນ ໄປພ້ອມກັບການສະໜັບສະໜູນການເຕີບໂຕຢ່າງຍືນຍົງ.
ຂ່າວ-ພາບ: ພູວຽງຄຳ
ຄໍາເຫັນ