ບໍ່ແຕນ ປາຖະກະຖາວັນສ້າງຕັ້ງສະຫະພັນກໍາມະບານລາວ 

ວັນທີ 7 ກຸມພາ ນີ້ ເມືອງບໍ່ແຕນ ແຂວງໄຊຍະບູລີ ໄດ້ຈັດພິທີປາຖະກະຖາວັນສ້າງຕັ້ງສະຫະພັນກຳມະບານລາວ ຄົບຮອບ 68 ປີ ຢູ່ທີ່ຫ້ອງປະຊຸມຂອງເມືອງ, ໂດຍການເປັນກຽດເຂົ້າຮ່ວມ ແລະ ປາຖະກະຖາຂອງທ່ານ ສົມສະໜຸກ ໄຊອຸດົມ ເລຂາພັກເມືອງ ເຈົ້າເມືອງບໍ່ແຕນ, ມີບັນດາຄະນະປະຈໍາພັກເມຶອງ, ກຳມະການພັກເມືອງ,ຫົວໜ້າຫ້ອງການ, ກົມກອງທົ່ວເມືອງເຂົ້າຮ່ວມຮັບຟັງ.
ໃນພິທີ, ທ່ານ ສົມສະໜຸກ ໄຊອຸດົມ ໄດ້ໃຫ້ກຽດເລົ່າຄືນມູນເຊື້ອ, ຂອງວັນສ້າງຕັ້ງສະຫະພັນກຳມະບານລາວຄົບຮອບ 68 ປີຄື: (ວັນທີ 1 ກຸມ ພາ 1956-ວັນທີ 1 ກຸມພາ 2024) ຊຶ່ງທ່ານໄດ້ຍົກໃຫ້ເຫັນມູນເຊື້ອ, ການກຳເນີດເຕີບໃຫຍ່ຂະຫຍາຍຕົວ ແລະ ບັນດາຜົນງານທີ່ຍິ່ງໃຫຍ່ທີ່ສະຫະພັນກໍາມະບານລາວຍາດມາໄດ້ຕະຫຼອດໄລຍະ 68 ປີຜ່ານມາ.
ຈຸດປະສົງຂອງການປາຖະກະຖາຄັ້ງນີ້, ເພື່ອເປັນການສຶກສາອົບຮົມໃຫ້ສະມາຊິກພັກ, ພະນັກງານ, ທະຫານ, ຕຳຫຼວດ ຕະຫຼອດຮອດສະມາ ຊິກກຳມະບານ ແລະ ກໍາມະກອນຊາວຜູ້ອອກແຮງງານບັນດາເຜົ່າ ໄດ້ຮັບຮູ້ເຂົ້າໃຈ, ເຫັນໄດ້ຄວາມໝາຍ, ຄວາມສໍາຄັນຂອງວັນດັ່ງກ່າວ, ເພື່ອພ້ອມກັນສືບຕໍ່ຮັກສາມູນເຊື້ອ ແລະ ສືບຕໍ່ເອົາໃຈໃສ່ປະກອບສ່ວນເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ.
(ຂ່າວ-ພາບ: ສາຍຄະ ບຸນຍາວົງ)