ສະມາຄົມອຸດສາຫະກໍາກາເຟສຳເລັດຮູບຂອງປະເທດບຣາຊິນ (ABICS) ລາຍງານວ່າ: ປະເທດບຣາຊິນໄດ້ສົ່ງອອກກາເຟສຳເລັດຮູບ ໄປ ສະຫະລັດ ອາເມຣິກາ ທັງໝົດ 26,460 ເປົາ (ເປົາ 60 ກິໂລກຣາມ) ໃນເດືອນສິງຫາ ປີນີ້, ຫຼຸດລົງ 59.9% ຈາກເດືອນສິງຫາປີຜ່ານມາ ແລະ ຫຼຸດລົງ 50.1% ຈາກເດືອນກໍລະກົດ.
ທ່ານ ອາກີນັລໂດ ລິມາ ຜູ້ອໍານວຍການບໍລິຫານຂອງ ABICS ກ່າວວ່າ: "ອັດຕາພາສີສູງເຖິງ 50% ເຮັດໃຫ້ການຄ້າກັບ ສະຫະລັດ ອາເມຣິກາ ເກືອບເປັນໄປບໍ່ໄດ້ເລີຍ, ພວກເຮົາຈຳເປັນຕ້ອງເປີດຊ່ອງທາງການເຈລະຈາເພື່ອຟື້ນຟູການພົວພັນດ້ານການຄ້າກາເຟລະຫວ່າງບຣາຊິນ ກັບ ສະຫະລັດ ອາເມຣິກາ ໃຫ້ກັບມາເປັນປົກກະຕິ.
ຂ່າວລະບຸວ່າ: ສະຫະລັດ ອາເມຣິກາ ຍັງຄົງເປັນປະເທດທີ່ຊື້ກາເຟສຳເລັດຮູບທີ່ໃຫຍ່ທີ່ສຸດຂອງປະເທດບຣາຊິນ ໂດຍມີຈຳນວນການຊື້ ຢູ່ທີ່ 443,179 ເປົາ ໃນລະຫວ່າງ 8 ເດືອນຕົ້ນປີນີ້. ສ່ວນຜູ້ຊື້ທີ່ໃຫຍ່ທີ່ສຸດຮອງລົງມາແມ່ນອາກຊັງຕິນ ແລະ ຣັດເຊຍ.
ໃນລະຫວ່າງເດືອນມັງກອນ ຫາ ເດືອນສິງຫາ ຜ່ານມາ, ປະເທດບຣາຊິນໄດ້ສົ່ງອອກກາເຟສຳເລັດຮູບໄປ 88 ປະເທດ ລວມທັງໝົດ 2.5 ລ້ານເປົາ, ຫຼຸດລົງ 3.9% ເມື່ອທຽບໃສ່ໄລຍະດຽວກັນຂອງປີກາຍ. ແນວໃດກໍດີ, ຍ້ອນການຜັນແປຂອງລາຄາກາເຟ ແລະ ອັດຕາແລກປ່ຽນ, ລາຍຮັບຈາກການສົ່ງອອກກາເຟສຳເລັດຮູບຈຶ່ງເພີ່ມຂຶ້ນ 33% ເປັນ 760.8 ລ້ານໂດລາ.
ທັງນີ້, ຕະຫຼາດກາເຟສຳເລັດຮູບໃນປະເທດບຣາຊິນຍັງສືບຕໍ່ຂະຫຍາຍຕົວ. ໂດຍໃນລະຫວ່າງເດືອນມັງກອນ - ສິງຫາ ຊາວບຣາຊິນໄດ້ບໍລິໂພກກາເຟສຳເລັດຮູບທັງໝົດ 763,645 ເປົາ, ເພີ່ມຂຶ້ນ 4.7% ເມື່ອທຽບໃສ່ໄລຍະດຽວກັນຂອງປີກາຍ.
ຄໍາເຫັນ