ຈໍາປາສັກສາມາດຍາດໄດ້ ຫຼຽນຄໍາກິລາກະຕໍ້

ຕະຫຼອດໄລຍະການແຂ່ງຂັນນັ້ນທັງສອງທີມໄດ້ປ່ຽນກັນບຸກ ແລະ ມີການແກ້ເກມເປັນແຕ່ລະໄລຍະການແຂ່ງຂັນກັນ.
ຜ່ານກາານແຂ່ງຂັນຕົວຈິງຜົນປະກົດວ່າແຂວງຈໍາປາສັກສາມາດເອົາຊະນະແຂວງຄໍາມ່ວນ 2 ຕໍ່ 0 ເຊັດ ດ້ວຍຄະແນະ 15 ຕໍ່ 10 ຄະແນນ ແລະ 15 ຕໍ່ 12 ຄະແນນ ສົ່ງຜົນເຮັດໃຫ້ຈໍາປາສັກສາມາດຍາດໄດ້ຫຼຽນຄໍາ,ຫຼຽນເງິນເປັນຂອງເເຂວງຄໍາມ່ວນ ສ່ວນຫຼຽນທອງຮ່ວມ ແມ່ນສະຫວັນນະເຂດ ແລະ ແຂວງສາລະວັນເຈົ້າພາບ.
ໂອກາດນີ້ ທ່ານ ລາພະໄຊ ທອງປະສົມ ຄູຝຶກກິລາກະຕໍ້ແຂວງຈໍາປາສັກ ໃຫ້ສໍາພາດວ່າ: ຮູ້ສຶກພໍໃຈໃນການຫຼິ້ນຂອງນັກກິລາໃນເກມນີ້ພາຍຫຼັງມີການປັບປ່ຽນຝຶກຊ້ອມຢ່າງຕໍ່ເນື່ອງ ດ້ວຍການວາງເຕັກນິກຕ່າງໆ ຊຶ່ງຜົນການແຂ່ງຂັນໃນຄັ້ງນີ້ຖືວ່າບັນລຸຜົນສໍາເລັດຕາມລະດັບຄາດໝາຍທີ່ວາງໄວ້.
ທ້າວ ສຸກກະເສີມ ຈັນທະຮຽງ ນັກກິລາກະຕໍ້ຫຼຽນຄໍາໃນປະເພດທີມດ່ຽວຊາຍໄດ້ກ່າວວ່າ: ຮູ້ສຶກດີໃຈ ແລະ ພາກພູມໃຈທີ່ຕົນເອງ ແລະ ທີມງານສາມາດຍາດໄດ້ຫຼຽນຄໍາ ພ້ອມດຽວກັນຈະຕັ້ງໃຈຝຶກຝົນຫຼໍ່ຫຼອມຕົນເອງຈະຕັ້ງໃຈຝຶກຊ້ອມກິລາໃຫ້ຫຼາຍຂຶ້ນກວ່າເກົ່າເພື່ອເຂົ້າຮ່ວມການແຂ່ງຂັນກິລາໃນລາຍການຕ່າງໆໃນຄັ້ງຕໍ່ໄປເພື່ອຫວັງຍາດໄດ້ຜົນງານໃຫ້ດີຂຶ້ນກວ່າເກົ່າ.
ສໍາລັບ ລາຍການແຂ່ງຂັນກະຕໍ້ປະເພດ ທີມດ່ຽວຍິງ ຫຼຽນຄຳ ແຂວງບໍລິຄຳໄຊ ສາມາດເອົາຊະນະແຂວງວຽງຈັນ 2-1 ເຊັດ: ດ້ວຍຄະແນນ 15-8, 11-15 ແລະ 15-11, ແຂວງວຽງຈັນໄດ້ຫຼຽນເງິນ ແລະ ຫຼຽນທອງຮ່ວມເປັນຂອງ ນະຄອນຫຼວງວຽງຈັນ ແລະ ແຂວງສະຫວັນນະເຂດ.
ການແຂ່ງຂັນກິລາກະຕໍ້ ມີນັກກິລາຈາກ 13 ແຂວງເຂົ້າຮ່ວມຊີງໄຊ 6 ລາຍການ ປະກອບມີ: ທີມຊຸດຄູ່ຊາຍ, ທີມຍິງ 4 ຄົນ, ທີມດ່ຽວຍິງ-ຊາຍ, ທີມຄູ່ຍິງ ແລະ ທີມຄູ່ຊາຍ. ພິທີມອບຫຼຽນລາງວັນໄດ້ຈັດຂຶ້ນໃນວັນທີ18ທັນວານີ້ທີ່ເດີນກິລາແຂວງສາລະວັນ.
(ຂ່າວ-ພາບ:ບຸນອູ້ມ)