ລັດຖະມົນຕີກະຊວງ ສຶກສາທິການ ແລະ ກິລາ (ສສກ), ພ້ອມຄະນະ ໃນໂອກາດເຄື່ອນໄຫວຢ້ຽມຢາມ ແລະ ຊີ້ນໍາວຽກງານສຶກສາ ຢູ່ແຂວງຄໍາມ່ວນ.
ໂອກາດນີ້ ທ່ານ ເຈົ້າແຂວງໄດ້ກ່າວສະແດງຄວາມຕ້ອນຮັບ, ພ້ອມທັງໄດ້ລາຍງານສະພາບໂດຍລວມຂອງວຽກງານການສຶກສາຕໍ່ ທ່ານລັດຖະມົນຕີກະຊວງ ສສກ ໄດ້ຮັບຊາບ ໂດຍສະເພາະບັນຫາຂໍ້ສະດວກ, ຂໍ້ຫຍຸ້ງຍາກ ໃນຂະແໜງການສຶກສາໃນຜ່ານມາ ເປັນຕົ້ນມາດຕະຖານດ້ານການຮຽນ-ການສອນ, ການຂາດແຄນຄູສອນ, ການປະລະການຮຽນຂອງນັກຮຽນ ລວມເຖິງການປະກອບສ່ວນຂອງແຂວງດ້ານຕ່າງໆ ເຂົ້າໃນການຮຽນ, ການຊ່ວຍເຫຼືອສັງຄົມ, ການຊ່ວຍເຫຼືອຈາກລັດຖະບານ ສສ ຫວຽດນາມ ຊ່ວຍສ້າງພື້ນຖານໂຄ່ງລ່າງ (ກໍ່ສ້າງໂຮງຮຽນ) ຢູ່ແຂວງຄໍາມ່ວນ. ພ້ອມນີ້ຍັງໄດ້ສະເໜີຜ່ານທ່ານ ລັດຖະມົນຕີ ໄປຍັງລັດຖະບານຊ່ວຍເບິ່ງງົບປະມານໃນແຕ່ລະປີເພີ່ມຕື່ມ, ເພື່ອແນໃສ່ຮັບໃຊ້ເຂົ້າໃນວຽກງານຂະແໜງການສຶກສາໄດ້ມີຄວາມເຂັ້ມແຂງ ດີຂຶ້ນກວ່າເກົ່າ.
ທ່ານ ລັດຖະມົນຕີກະຊວງ ສສກ ໄດ້ສະແດງຄວາມຂອບໃຈມາຍັງທ່ານເຈົ້າແຂວງຕໍ່ການຕ້ອນຮັບໃນຄັ້ງນີ້ ແລະ ຊົມເຊີຍທີ່ແຂວງຄໍາມ່ວນໄດ້ເອົາໃຈໃສ່ຊຸກຍູ້ຂະແໜງການສຶກສາດ້ວຍດີຕະຫຼອດມາ ພ້ອມທັງສະເໜີມາຍັງແຂວງຄໍາມ່ວນຊ່ວຍຊຸກຍູ້ລະດົມຊອກຫາວິທີ ເພື່ອໃຫ້ຄົນມີຄວາມມັກຮັກໃນອາຊີບ ແລະ ສະໝັກໃຈໃນການຮຽນຄູ, ປຸກລະດົມອັດຕາການເຂົ້າຮຽນຢູ່ແຂວງຄໍາມ່ວນໃຫ້ຫຼາຍຂຶ້ນກວ່າເກົ່າ, ຄຽງຄູ່ກັນນັ້ນກໍ່ສ້າງຈິດສໍານຶກໃນການມັກຮັກ ການຮຽນໃຫ້ເປັນຂະບວນ ແນໃສ່ເຮັດໃຫ້ວຽກງານຂະແໜງສຶກສາໄດ້ມີຄວາມເຂັ້ມແຂງ ແລະ ບັນລຸຕາມແຜນການຈັດຕັ້ງປະຕິບັດບັນດາຕົວຊີ້ວັດທີ່ວາງໄວ້.
(ຂ່າວ: ມະນີວັນ)
ຄໍາເຫັນ