ໃນວັນທີ 25 ພະຈິກ 2024ນີ້, ທ່ານ ວັນໄຊ ພອງສະຫວັນ ເຈົ້າແຂວງຄໍາມ່ວນ ໄດ້ຕ້ອນຮັບ ທ່ານ ໂທມາສ ລາມາຣ ອຸປະທູດ ແຫ່ງຣາຊະອານາຈັກລຸກຊໍາບວກ ປະຈຳ ສປປ ລາວ, ໂດຍມີລັດຖະມົນຕີ ແລະ ອະດີດລັດຖະມົນຕີກະຊວງສາທາລະນະສຸກ ພ້ອມດ້ວຍຄະນະ, ໃນໂອກາດທີ່ທ່ານໄດ້ເດີນທາງມາຢ້ຽມຢາມ ແລະ ເຮັດວຽກຢູ່ແຂວງຄໍາມ່ວນ.
ໂອກາດນີ້, ທ່ານ ວັນໄຊ ພອງສະຫວັນ ໄດ້ສະແດງຄວາມຍິນດີຕ້ອນຮັບ ຕໍ່ການມາຢ້ຽມຢາມ ແລະ ເຮັດວຽກຂອງທ່ານອຸປະທູດໃນຄັ້ງນີ້ ຊຶ່ງເປັນການປະກອບສ່ວນອັນສຳຄັນເຂົ້າໃນການພົວພັນຮ່ວມມື ກໍຄືຜັນຂະຫຍາຍໝາກຜົນຂອງການຊ່ວຍເຫຼືອຈາກລັດຖະບານ ລຸກຊໍາບວກ ເຂົ້າໃນຂົງເຂດວຽກງານຕ່າງໆຢູ່ໃນແຂວງຄຳມ່ວນ ໃຫ້ໄດ້ຮັບການພັດທະນາຍິ່ງໆຂຶ້ນ. ພ້ອມທັງສະເໜີມາຍັງທ່ານອຸປະທູດ ຊ່ວຍຄົ້ນຄວ້າໃຫ້ການສະໜັບສະໜູນ ຊ່ວຍເຫຼືອໃນການກໍ່ສ້າງ ແລະ ປັບປຸງໂຮງໝໍແຂວງ, ບັນດາໂຮງໝໍເມືອງພາຍໃນແຂວງ ລວມເຖິງການປັບປຸງທາງດ້ານອຸປະກອນ, ການປິ່ນປົວ ເພື່ອບໍລິການຄົນເຈັບໃຫ້ມີຄວາມສະດວກ, ວ່ອງໄວ ແລະ ຮັບປະກັນທາງດ້ານຄຸນນະພາບ.
ທ່ານ ໂທມາສ ລາມາຣ ໄດ້ສະແດງຄວາມຂອບໃຈຕໍ່ ທ່ານເຈົ້າແຂວງທີ່ໄດ້ໃຫ້ການຕ້ອນຮັບໃນຄັ້ງນີ້ ແລະ ໄດ້ແຈ້ງແຜນການເຄື່ອນໄຫວໃຫ້ທ່ານເຈົ້າແຂວງໄດ້ຮັບຊາບ. ໂຄງການພັດທະນາຂອງລຸກຊໍາບວກ ແມ່ນປະກອບດ້ວຍຫຼາຍຂະແໜງການ. ໃນນັ້ນ ໂຄງການປັບປຸງວຽກງານສາທາລະນະສຸກ ກໍເປັນໂຄງການໜຶ່ງທີ່ໃຫຍ່ ຢູ່ໃນແຂວງຄຳມ່ວນ, ການພັດທະນາທ້ອງຖິ່ນ, ພັດທະນາກະສິກຳ, ປັບປຸງພື້ນຖານໂຄງລ່າງ, ການທ່ອງທ່ຽວ, ວຽກອົງການປົກຄອງ ແລະ ການປັບປຸງວິດຖ່າຍ ກໍເປັນພາກສ່ວນໜຶ່ງທີ່ໂຄງການພັດທະນາລຸກຊໍາບວກໄດ້ໃຫ້ການສະໜັບສະໜູນ.
ໃນໂອກາດນີ້, ທ່ານ ໂທມາສ ລາມາຣ ພ້ອມຄະນະ ຍັງໄດ້ໄປຢ້ຽມຢາມ ແລະ ຕິດຕາມ, ກວດກາ ສະພາບລວມຂອງໂຮງໝໍແຂວງຄຳມ່ວນ ເພື່ອຈະນໍາໄປຄົ້ນຄວ້າ ປຶກສາຫາລື ແລະ ມີແຜນການຈະຊ່ວຍເຫຼືອ ກໍ່ສ້າງ, ປັບປຸງໃນຕໍ່ໜ້າ.
(ຂ່າວ-ພາບ: ກອງຄໍາ)
ຄໍາເຫັນ