ເຈົ້າແຂວງຄຳມ່ວນລົງຢ້ຽມຢາມຄ້າຍຄຸມຂັງ-ດັດສ້າງ ປກສ ແຂວງ

ໃນວັນທີ 3 ເມສາຜ່ານມາ, ທ່ານ ວັນໄຊ ພອງສະຫວັນ ເຈົ້າແຂວງຄໍາມ່ວນ ພ້ອມດ້ວຍມຄະນະ ໄດ້ລົງຢ້ຽມຢາມຄ້າຍຄຸມຂັງ-ດັດສ້າງ ປກສ ແຂວງຄຳມ່ວນ (ຄຳຂີ້ໄກ່), ໂດຍມີທ່ານ ພົ.ວ ທິບພະຈັນ ໂພໄຊ ຫົວໜ້າກອງບັນຊາການ ປກສ ແຂວງ, ມີຄະນະຄ້າຍຄຸມຂັງ-ດັດສ້າງ ຮ່ວມຕ້ອນຮັບ ພ້ອມທັງໄດ້ຮັບຟັງການລາຍງານກ່ຽວກັບການເຄື່ອນໄຫວຈັດຕັ້ງປະຕິບັດວຽກງານຂອງຄ້າຍຄຸມຂັງ-ດັດສ້າງໃນໄລຍະທີ່ຜ່ານມາ. ຄ້າຍຄຸມຂັງ-ດັດສ້າງ ປກສ ແຂວງຄຳມ່ວນ ຕັ້ງຢູ່ 3 ຈຸດຄື: ຄ້າຍຄຸມຂັງ-ດັດສ້າງ ຄຳຂີ້ໄກ່, ຄ້າຍຄຸມຂັງ ນາແດນ ແລະ ຄ້າຍຄຸມຂັງ ຫ້ວຍຄຳມ້າ. ປັດຈຸບັນແມ່ນມີນັກໂທດ, ຜູ້ຖືກຫາ ແລະ ຜູ້ຖືກດັດສ້າງ ລວມທັງໝົດ 1.752 ຄົນ ຍິງ 170 ຄົນ.  ໃນນັ້ນ, ເປັນຄົນຕ່າງປະເທດ 21 
    ໂອກາດນີ້, ທ່ານເຈົ້າແຂວງຄໍາມ່ວນ ໄດ້ເນັ້ນໃຫ້ຄະນະພັກ-ຄະນະຄ້າຍຄຸມຂັງ ເອົາໃຈໃສ່ເພີ່ມທະວີສຶກສາອົບຮົມທາງດ້ານການເມືອງ-ແນວຄິດໃຫ້ແກ່ພະນັງານໃຫ້ມີຄວາມອຸ່ນອ່ຽນທຸ່ນທ່ຽງ, ມີສະຕິຄວາມເປັນເຈົ້າໃນການປະຕິບັດໜ້າທີ່ຂອງຕົນ, ເພີ່ມທະວີໃນການຄຸ້ມຄອງ, ຕິດຕາມ, ກວດການັກໂທດໃຫ້ປະຕິບັດລະບຽບວິໄນຂອງຄ້າຍຢ່າງເຂັ້ມງວດ ພ້ອມທັງມີການສົ່ງເສີມສ້າງວຽກເຮັດ ເພື່ອມີລາຍຮັບມາຈູນເຈືອຊີວິດການເປັນຢູ່ຂອງນັກໂທດຢູ່ພາຍໃນຄ້າຍ ກາຍເປັນຄວາມຮູ້ຕິດຕົວ ແລະ ກາຍເປັນອາຊີບ ນຳໄປໝູນໃຊ້ເພື່ອສ້າງລາບຮັບໃຫ້ຕົນເອງ ແລະ ຄອບຄົວໃນການດໍາລົງຊິວິດຕໍ່ໄປ. ເພີ່ມທະວີສຶກສາອົບຮົມນັກໂທດ, ຜູ້ຖືກຫາ ແລະ ຜູ້ຖືກດັດສ້າງ ໂດຍມີວິທີການ, ກົນໄກໃນການອົບຮົມ ເພື່ອໃຫ້ເຂົາເຈົ້າຮັບຮູ້ ແລະ ສຳນຶກ ໃນສິ່ງທີ່ກະທຳຜິດໃນໄລຍະຜ່ານມາ ເພື່ອຈະໄດ້ປ່ຽນແປງຕົນເອງໃຫ້ກາຍເປັນຄົນດີ ໃນເມື່ອເວລາທີ່ພົ້ນໂທດກັບໄປໃຊ້ຊີວິດປົກກະຕິຢູ່ໃນສັງຄົມ. ສ່ວນບາງຂໍ້ສະເໜີຂອງຄ້າຍຄຸມຂັງ ເປັນຕົ້ນແມ່ນ ທາງດ້ານພາຫະນະ, ເຄື່ອງໃຊ້ຫ້ອງການ, ການປັບປຸງ ກໍ່ສ້າງອາຄານ, ນໍ້າບາດານ ແລະ ອື່ນໆ ແມ່ນຈະໄດ້ນຳໄປປຶກສາຫາລືໃນຄະນະນຳຂອງແຂວງ ເພື່ອຄົ້ນຄວ້າແກ້ໄຂໃນຕໍ່ໜ້າ.
    ໃນໂອກາດທີ່ລົງເຄື່ອນໄຫວຢ້ຽມຢາມຄັ້ງນີ້, ທ່ານເຈົ້າແຂວງ ຍັງໄດ້ມອບເງິນຈໍານວນ 100 ລ້ານກີບ ເພື່ອຮັບໃຊ້ເຂົ້າໃນວຽກງານບໍລິຫານຄຸ້ມຄອງ ຂອງຄ້າຍຄຸມຂັງ-ດັດສ້າງ ໃຫ້ມີຄວາມສະດວກຂຶ້ນ.
(ພາບ-ຂ່າວ: ກອງຄໍາ)