ຜູ້ວ່າຣາຊະການຈັງຫວັດນະຄອນພະນົມ ຣາຊະອານາຈັກໄທ ໃນໂອກາດສຳເລັດການປະຕິບັດໜ້າທີ່.
ໂອກາດນີ້, ທ່ານ ວັນໄຊ ພອງສະຫວັນ ໄດ້ສະແດງຄວາມຊົມເຊີຍ ແລະ ຕີລາຄາສູງຕໍ່ ທ່ານ ວັນໄຊ ຈັນພອນ ທີ່ປະສົບຜົນສໍາເລັດໃນການປະຕິບັດໜ້າທີ່ເປັນຜູ້ວ່າຣາຊະການຈັງຫວັດນະຄອນພະນົມ ແຫ່ງຣາຊະອານາຈັກໄທ ຊຶ່ງໄລຍະການປະຕິບັດໜ້າທີ່ເປັນຜູ້ວ່າຣາຊະການ ທ່ານໄດ້ປະກອບສ່ວນໃນການຊຸກຍູ້ສົ່ງເສີມມິດຕະພາບ ແລະ ການພົວພັນຮ່ວມມື ລະຫວ່າງ 2 ແຂວງ ຄໍາມ່ວນ ແລະ ນະຄອນພະນົມ ດ້ວຍດີຕະຫຼອດມາ. ພ້ອມນີ້, ທ່ານ ເຈົ້າແຂວງຄໍາມ່ວນ ຍັງໄດ້ສະເໜີຜ່ານທ່ານຜູ້ວ່າຄົນເກົ່າ ໄປຍັງຜູ້ທີ່ມາປ່ຽນແທນໃຫ້ສືບຕໍ່ຮັກສາມູນເຊື້ອມິດຕະພາບ ແລະ ການຮ່ວມມື ນີ້ໄວ້ໂດຍສະເພາະແມ່ນສືບຕໍ່ປະຕິບັດຕາມເນື້ອໃນບົດບັນທຶກການຮ່ວມມືສອງຝ່າຍ, ເປັນຕົ້ນແມ່ນການຮ່ວມມືໃນດ້ານການຄ້າ-ການລົງທຶນ, ການທ່ອງທ່ຽວ, ການພົວພັນໄປມາຫາສູ່ເຊິ່ງກັນ ແລະ ກັນ, ການແລກປ່ຽນທາງດ້ານວັດທະນະທໍາ ແລະ ດ້ານອື່ນໆ ໃຫ້ນັບມື້ໄດ້ຮັບການເສີມຂະຫຍາຍ.
ທ່ານຜູ້ວ່າຈັງຫວັດນະຄອນພະນົມ ກໍໄດ້ສະແດງຄວາມຂອບໃຈ ມາຍັງທ່ານເຈົ້າແຂວງຄໍາມ່ວນ ແລະ ຄະນະ ທີ່ໃຫ້ກຽດຕ້ອນຮັບຢ່າງອົບອຸ່ນ, ພ້ອມທັງຢືນຢັນວ່າຈະສືບຕໍ່ຊຸກຍູ້ສົ່ງເສີມການພົວພັນ ແລະ ການຮ່ວມມືສອງຝ່າຍ ຄໍາມ່ວນ-ນະຄອນພະນົມ ໃຫ້ມີບາດກ້າວຂະຫຍາຍຕົວຍິ່ງຂຶ້ນ, ທັງນີ້ກໍເພື່ອນໍາເອົາຜົນປະໂຫຍດຕົວຈິງມາສູ່ປະຊາຊົນສອງແຂວງໃນຕໍ່ໜ້າ.
(ຂ່າວ: ມະນີວັນ)
ຄໍາເຫັນ