ເຈົ້າແຂວງຫຼວງນໍ້າທາ ມອບເຄື່ອງຊ່ວຍເຫຼືອໃຫ້ຜູ້ປະສົບໄພນໍ້າຖ້ວມ ຢູ່ເມືອງນາແລ

 ໃນໂອກາດດັ່ງກ່າວ ທ່ານ ບຸນຈັນ ສຸດທິປັນຍາ ເຈົ້າເມືອງນາແລ ໄດ້ລາຍງານສະພາບລວມຜົນເສຍຫາຍຈາກໄພພິບັດນໍ້າຖ້ວມ, ການແກ້ໄຂເບື້ອງຕົ້ນ, ການຕິດຕາມສະຖານະການຫຼັງຈາກນໍາບົກແຫ້ງ. ຄະນະຮັບຜິດຊອບໄພພິບັດຂັ້ນເມືອງໄດ້ລົງສົມທົບກັບອໍານາດການປົກຄອງບ້ານ, ເກັບກໍາຂໍ້ມູນໃນເບື້ອງຕົ້ນ. ເມືອງນາແລ ໄດ້ຮັບຜົນກະທົບຈາກໄພພິບັດນໍ້າຖ້ວມ ໃນລະຫ່ວາງ ວັນທີ 9 -11 ກັນຍາ 2024 ມີທັງໝົດ 14 ບ້ານ, ມີ 199 ຄອບຄົວ ທີ່ຢູ່ລຽບສາຍນໍ້າທາ, ບ້ານທີ່ໄດ້ຮັບຜົນກະທົບຫຼາຍກ່ວາໝູ່ມີ 3 ບ້ານ ຄື: ບ້ານ ທົ່ງຖອນ, 96 ຄອບຄົວ, ບ້ານ ພູລາ 42 ຄອບຄົວ , ບ້ານ ສາງອາກ 34 ຄອບຄົວ, ມີໂຮງຮຽນ 2 ແຫ່ງຄື: ໂຮງຮຽນ ມສ ເມືອງ, ໂຮງຮຽນມໍຕົ້ນພູລາ. ເຄື່ອງທີ່ນໍາມາມອບໃນຄັ້ງນີ້, ປະກອບມີ ເຂົ້າສານ, ອາຫານແຫ້ງ, ເຄື່ອງນຸ່ງຮົ່ມ, ນໍ້າດື່ມ ມອບໂດຍ ທ່ານເຈົ້າແຂວງຫຼວງນໍ້າທາ ຕ່າງໜ້າຮັບ ໂດຍອໍານາດການປົກຄອງບ້ານທີ່ຖືກໄພພິບັດ,
ໃນໂອກາດນີ້, ທ່ານເຈົ້າແຂວງຫຼວງນໍ້າທາ ໄດ້ຊີ້ແຈ້ງຕໍ່ອໍານາດການປົກຄອງບ້ານ, ອົງການຈັດຕັ້ງຂັ້ນບ້ານທຸກຂັ້ນ ນໍາເອົາເຄື່ອງທີ່ນໍາມາມອບໃນຄັ້ງນີ້ ໄປແຈກຍ້າຍໃຫ້ພໍ່ແມ່ປະຊາຊົນໃຫ້ທົ່ວເຖິງ, ຊີ້ນໍາໃຫ້ອໍານາດການປົກຄອງບ້ານ ລະດົມພໍ່ແມ່ປະຊາຊົນອອກແຮງງານລວມ ອະນາໄມເຮືອນຊານບ້ານຊ່ອງ ມ້ຽນມັດສິງເສດເຫຼືອຕ່າງໆໃຫ້ສະອາດງາມຕາ ເພື່ອຮັກສາສິ່ງແວດລ້ອມ ຟື້ນພູຊິວິດການເປັນຢູ່ໃຫ້ດີຂຶ້ນ.
(ຂ່າວ: ກອງແກ້ວ ແສນທະວີ)