ເຈົ້າແຂວງເຊກອງ ຕິດຕາມຄວາມຄືບໜ້າການບູລະນະຖານທີ່ໝັ້ນ ຈຸດເລີ່ມຕົ້ນການປະຕິວັດລາວໃຕ້

ໃນວັນທີ 10 ກຸມພາ ຜ່ານມາ, ທ່ານ ເຫຼັກໄຫຼ ສີວິໄລ ເຈົ້າແຂວງເຊກອງ ພ້ອມດ້ວຍຄະນະ ແລະ ພາກສ່ວນກ່ຽວຂ້ອງ ໄດ້ລົງເຄື່ອນໄຫວຊຸກຍູ້ ຕິດຕາມຄວາມຄືບໜ້າ ການບູລະນະຖານທີ່ໝັ້ນ ຈຸດເລີ່ມຕົ້ນການປະຕິວັດລາວໃຕ້ ຢູ່ເຂດບ້ານດາກປໍາ ເມືອງດາກຈຶງ.
ການບູລະນະຖານທີ່ໝັ້ນ ຈຸດເລີ່ມຕົ້ນການປະຕິວັດລາວໃຕ້ໂດຍມີປະທານ ຄໍາໄຕ ສີພັນດອນ ອະດີດປະທານພັກອະດີດປະທານປະເທດແຫ່ງ ສປປ ລາວ ເປັນຜູ້ນໍາພາ-ບັນຊາ ໄດ້ເລີ່ມລົງມືຈັດຕັ້ງປະຕິບັດໃນເດືອນທັນວາ 2023 ເປັນຕົ້ນມາ ຕາມໜ້າວຽກບູລະນະທີ່ໄດ້ຮັບການອະນຸມັດ ມາຮອດປັດຈຸບັນສໍາເລັດຫຼາຍກວ່າ 50% ແລະ ຈະໃຫ້ສໍາເລັດເປີດບໍລິການໃຫ້ນັກທ່ອງທ່ຽວໄດ້ເຂົ້າໄປທ່ຽວຊົມໃນຕົ້ນເດືອນເມສາ 2024 ພ້ອມກັບການສະເຫຼີມສະຫຼອງວັນສ້າງຕັ້ງແຂວງເຊກອງ ຄົບຮອບ 40 ປີ. 
ໃນໂອກາດນີ້, ທ່ານ ເຫຼັກໄຫຼ ສີວິໄລ ໄດ້ໃຫ້ຮູ້ວ່າ: ດັ່ງທີ່ພວກເຮົາຮູ້ນໍາກັນແລ້ວວ່າ ການບູລະນະຖານທີ່ໝັ້ນ ຈຸດເລີ່ມຕົ້ນການປະຕິວັດລາວໃຕ້ ແມ່ນມີຄວາມໝາຍສໍາຄັນເປັນຢ່າງຍິ່ງ ເພື່ອຈາລຶກຄຸນງາມຄວາມດີ, ຮັກສາໄວ້ເປັນສະຖານທີ່ທ່ອງທ່ຽວ, ເປັນບ່ອນສຶກສາອົບຮົມມູນເຊື້ອປະຕິວັດ, ບ່ອນສຶກສາຮໍ່າຮຽນ ແລະ ຮຽນຮູ້ກ່ຽວກັບປະຫວັດສາດ ຂອງການປະຕິວັດລາວໃຕ້ ແລະ ເປັນການສະເຫຼີມສະຫຼອງວັນເກີດຂອງປະທານ ຄໍາໄຕ ສີພັນດອນ ຄົບຮອບ 100 ປີ (8 ກຸມພາ 1924-8 ກຸມພາ 2024). ສະນັ້ນ, ຮຽກຮ້ອງໃຫ້ບັນດາຂະແໜງການຕ່າງໆທີ່ກ່ຽວຂ້ອງ ແລະ ພໍ່ແມ່ປະຊາຊົນ ຈົ່ງອໍານວຍຄວາມສະດວກ ແລະ ຮ່ວມມື ພ້ອມກັນປະຕິບັດບັນດາໜ້າວຽກຕ່າງໆ ໂດຍສະເພາະແມ່ນການປັບປຸງ-ສ້ອມແປງເສັ້ນທາງເຂົ້າຫາຖານທີ່ໝັ້ນ,ການປຸກສ້າງເຮືອນຈໍາລອງ,ການຕິດຕັ້ງປ້າຍບອກທາງ ແລະ ວຽກບູລະນະຟື້ນຟູອື່ນໆ ໃຫ້ສໍາເລັດທັນຕາມກໍານົດເວລາທີ່ວາງໄວ້.
(ຂ່າວ-ພາບ: ສັນຍາ)