ຈັດພິທີສະຫວັນນະເຂດ ປະກາດການຈັດຕັ້ງພະນັກງານ ນຳພາ-ຄຸ້ມຄອງ

ແຂວງສະຫວັນນະເຂດ ໃນວັນທີ 8 ກຸມພາ 2024 ໄດ້ຈັດພິທີປະກາດການຈັດຕັ້ງພະນັກງານນໍາພາ-ຄຸ້ມຄອງຂັ້ນແຂວງຂຶ້ນໃນວັນທີ 8 ກຸມພາ ນີ້, ທີ່ຫ້ອງປະຊຸມຫ້ອງວ່າການແຂວງ ພາຍໃຕ້ການເປັນປະທານຂອງທ່ານ ບົວສອນ ມະຫາວົງ ຄະນະປະຈຳພັກແຂວງ ຫົວໜ້າຄະນະຈັດຕັ້ງແຂວງ, ມີຄະນະບໍລິຫານງານຊາວໜຸ່ມແຂວງ, ຄະນະຫ້ອງວ່າການປົກຄອງແຂວງ ແລະ ແຂກຖືກເຊີນເຂົ້າຮ່ວມ.
    ໃນພິທີ, ຕາງໜ້າຄະນະຈັດຕັ້ງແຂວງໄດ້ຜ່ານມະຕິຕົກລົງຂອງຄະນະປະຈຳພັກແຂວງ ເລກທີ 125/ຄປພຂ ລົງວັນທີ 6 ກຸມພາ 2024 ວ່າດ້ວຍການແຕ່ງຕັ້ງເລຂາຄະນະບໍລິຫານງານຊາວໜຸ່ມແຂວງສະຫວັນນະເຂດ ໂດຍຄະນະປະຈຳພັກແຂວງຕົກລົງ: ແຕ່ງຕັ້ງ ທ່ານ ນາງ ບັງອອນ ພິມມະສານ ເປັນເລຂາຄະນະບໍລິຫານງານຊາວໜຸ່ມແຂວງສະຫວັນນະເຂດ, ຜ່ານຂໍ້ຕົກລົງຂອງທ່ານເຈົ້າແຂວງສະຫວັນນະເຂດ ສະບັບເລກທີ 242/ຈຂ ລົງວັນທີ 1 ກຸມພາ 2024 ວ່າດ້ວຍການຍົກຍ້າຍພະນັກງານ ຊຶ່ງໃນນີ້ ເຈົ້າແຂວງຕົກລົງ: ຍົກຍ້າຍ ທ່ານ ສົມບູນ ແກ້ວສະຫວັນ ຮອງຫົວໜ້າພະແນກພາຍໃນແຂວງ ໄປປະຈຳການຢູ່ຫ້ອງວ່າການປົກຄອງເມືອງພະລານໄຊ, ຜ່ານຂໍ້ຕົກລົງຂອງທ່ານເຈົ້າແຂວງສະຫວັນນະເຂດ ສະບັບເລກທີ  245/ຈຂ ລົງວັນທີ 1 ກຸມພາ 2024 ວ່າດ້ວຍການແຕ່ງຕັ້ງພະນັກງານ. ໃນນີ້, ເຈົ້າແຂວງຕົກລົງ ແຕ່ງຕັ້ງ ທ່ານ ສົມສະໜຸກ ເພັດຊົມພູ ເປັນຮອງຫົວໜ້າພະແນກພາຍໃນແຂວງ.
    ໃນໂອກາດນີ້, ທ່ານ ບົວສອນ ມະຫາວົງ ໄດ້ໃຫ້ກຽດໂອ້ລົມຕໍ່ກອງປະຊຸມ ໂດຍສະເພາະແມ່ນພະນັກງານການນຳທີ່ໄດ້ຖືກແຕ່ງຕັ້ງໃໝ່ ໃຫ້ເຮັດສຳເລັດໜ້າທີ່ການເມືອງອັນມີກຽດທີ່ພັກ-ລັດມອບໝາຍໃຫ້ດ້ວຍຄວາມຮັບຜິດຊອບສູງ.
(ຂ່າວ: ສະຫວັນ)