ຂ່າວຕ່າງປະເທດລາຍງານວ່າ: ໃນບົດຄວາມທີ່ພິມເຜີຍແຜ່ໃນໜັງສືພິມ Washington Post ໃນວັນທີ 28 ມັງກອນ ຜ່ານມາ ລະບຸວ່າ:ທ່ານ ເອຣິກ ຊະມິດ ອະດີດ CEO ຂອງ Google ໄດ້ກ່າວເຖິງການເຕີບໂຕຂອງ DeepSeekແອັບchatbotທີ່ເປັນຜູ້ຊ່ວຍຂອງປັນຍາປະດິດ (AI)ຂອງຈີນ ວ່າເປັນ "ຈຸດປ່ຽນທີ່ສຳຄັນ" ໃນການແຂ່ງຂັນ AI ທົ່ວໂລກ.
ທ່ານ ຊະມິດ ເນັ້ນໜັກເຖິງຄວາມສາມາດໃນການແຂ່ງຂັນຂອງຈີນກັບບໍລິສັດເຕັກໂນໂລຊີຍັກໃຫຍ່ທີ່ມີຊັບພະຍາກອນໜ້ອຍກວ່າ ສະທ້ອນໃຫ້ເຫັນຄວາມຈຳເປັນທີ່ ສະຫະລັດ ອາເມຣິກາຕ້ອງເລັ່ງພັດທະນາ AI open-source ໃຫ້ຫຼາຍຂຶ້ນ, ພ້ອມທັງຮຽກຮ້ອງໃຫ້ເພີ່ມການລົງທຶນໃນໂຄງສ້າງພື້ນຖານຂອງ AI ແລະ ໂຄງການລິເລີ່ມຕ່າງໆເຊັ່ນ:Stargate ແລະການກະຕຸ້ນໃຫ້ກຸ່ມຫ້ອງທົດລອງຄົ້ນຄວ້າຊັ້ນນຳແບ່ງປັນວິທີການຝຶກອົບຮົມຂອງເຂົາເຈົ້າ.
Deepseek ເປັນ ບໍລິສັດ AI ຂອງຈີນທີ່ສ້າງຕັ້ງຂຶ້ນໃນປີ 2023 ແລະ ໄດ້ເປີດໂມເດລລຸ້ນຫຼ້າສຸດຄື: Deepseek-R1ໃນເດືອນມັງກອນ 2025 ຊຶ່ງໄດ້ຮັບຄວາມສົນໃຈຢ່າງຫຼວງຫຼາຍ ຈາກທັກສະການໃຫ້ເຫດຜົນຂັ້ນສູງ. ໂມເດລລຸ້ນນີ້ມີປະສິດທິພາບທຽບເທົ່າກັບລະບົບປັນຍາປະດິດຊັ້ນນໍາເຊັ່ນ:ChatGPT ຂອງ OpenAI, ແຕ່ມີຄ່າໃຊ້ຈ່າຍໃນການພັດທະນາຕ່ໍາກວ່າຫຼາຍ.
ການເປີດນຳໃຊ້Deepseek-R1 ສ້າງຄວາມສັ່ນສະເທືອນໃນທົ່ວອຸດສາຫະກໍາເຕັກໂນໂລຊີ, ສົ່ງຜົນໃຫ້ລາຄາຫຸ້ນຂອງບໍລິສັດຍັກໃຫຍ່ຈໍານວນໜຶ່ງເຊັ່ນ:Microsoft, Meta ແລະ Nvidia, ຫຼຸດລົງຢ່າງຫຼວງຫຼາຍໃນວັນ27 ມັງກອນ ຜ່ານມາ.
ທ່ານ ຊະມິດ ຍັງເນັ້ນໜັກເຖິງຄວາມສຳຄັນຂອງການພັດທະນາOpen Sourceເພື່ອຮັບມືກັບຄວາມກ້າວໜ້າຂອງDeepSeek. ໂດຍຮຽກຮ້ອງໃຫ້ສະຫະລັດ ອາເມຣິກາ ຊຸກຍູ້ການຮ່ວມມື ພັດທະນາແກ້ໄຂ AI ທີ່ມີຄວາມສາມາດໃນການແຂ່ງຂັນ ແລະຮັບມືກັບການປ່ຽນແປງຂອງການແຂ່ງຂັນ AI ທົ່ວໂລກ.
ຄໍາເຫັນ