ເດືອນຜ່ານມາອັດຕາຄວາມທຸກຍາກຂອງອາກຊັງຕິນເພີ່ມຂຶ້ນ 57%

ຂ່າວຕ່າງປະເທດລາຍງານ ເມື່ອທ້າຍອາທິດຜ່ານມາ, ມະຫາວິທະຍາໄລຄາທໍລິກແຫ່ງອາກຊັງຕິນໄດ້ເປີດເຜີຍບົດລາຍງານໂດຍລະບຸວ່າ: ອັດຕາຄວາມທຸກຍາກຂອງປະຊາຊົນໃນປະເທດສູງເຖິງ 57,4% ໃນເດືອນມັງກອນຜ່ານມາ ເປັນສະຖິຕິສູງທີ່ສຸດນັບຕັ້ງແຕ່ປີ 2004.
    ຂະນະທີ່ອັດຕາຄວາມທຸກຍາກຂອງຊາວອາກຊັງຕິນຢູ່ທີ່ 49,5% ເມື່ອປີຜ່ານມາ ສະຖານະການທີ່ເກີດຂຶ້ນໃນປັດຈຸບັນໝາຍຄວາມວ່າ 6 ໃນ 10 ຂອງຊາວອາກຊັງຕິນມີຄຸນນະພາບຊີວິດຢູ່ໃນຂັ້ນຄວາມທຸກຍາກ. ເຖິງຢ່າງໃດກໍຕາມ, ກະຊວງເສດຖະກິດຂອງອາກຊັງຕິນໄດ້ເປີດເຜີຍບົດລາຍງານການເກີນດູນງົບປະມານ ປະມານ 51.841 ລ້ານເປໂຊ ເມື່ອເດືອນມັງກອນຜ່ານມາ ຖືວ່າເປັນຄັ້ງທຳອິດຕັ້ງແຕ່ເດືອນສິງຫາ 2012 ທີ່ງົບປະມານຂອງອາກຊັງຕິນມີລະດັບເກີນດູນ.
    ທັງນີ້, ທ່ານ ຂາບິເອ ມິເລ ປະທານາທິບໍດີອາກຊັງຕິນ ຊຶ່ງເຂົ້າມາບໍລິຫານປະເທດໃນເດືອນທັນວາ 2023ປັບຫຼຸດອັດຕາແລກປ່ຽນລະຫວ່າງເງິນເປໂຊອາກຊັງຕິນກັບເງິນໂດລາຫຼາຍກວ່າ 50% ຕັ້ງແຕ່ໄລຍະທຳອິດຂອງການຮັບຕຳແໜ່ງ ເພື່ອຈັດການກັບວິກິດການເງິນເຟີ້, ພາລະໜີ້ສິນ ແລະ ການຂາດດູນງົບປະມານ.