ແອວນີໂຢ ອາດຈະເຮັດໃຫ້ອຸນຫະພູມສິງກະໂປເພີ່ມສູງຂຶ້ນ

ຂ່າວຕ່າງປະເທດລາຍງານ ເມື່ອບໍ່ດົນມານີ້, ສິງກະໂປໄດ້ເປີດເຜີຍບົດລາຍງານການປະເມີນສະພາບພູມອາກາດປະຈຳປີໂດຍລະບຸວ່າ: ສິງກະໂປບັນທຶກສະຖິຕິຂອງປີ 2023 ວ່າເປັນປີທີ່ຮ້ອນທີ່ສຸດເປັນອັນດັບທີ 4 ເນື່ອງຈາກອິດທິພົນຂອງປະກົດການແອວນີໂຢໃນໄລຍະ 6 ເດືອນທ້າຍປີ ແລະ ຄາດວ່າອຸນຫະພູມຈະເພີ່ມສູງຂຶ້ນໃນປີ 2024 ນີ້ ເມື່ອປະກົດການແອວນີໂຢອ່ອນກຳລັງລົງ.
    ສຳນັກງານອຸຕຸນິຍົມວິທະຍາສິງກະໂປ (MSS) ລະບຸວ່າ: ສະຖານີສະພາບອາກາດຊາງງີບັນທຶກອຸນຫະພູມສະເລ່ຍລາຍປີເມື່ອປີຜ່ານມາໄດ້ 28,2 ອົງສາ ຊຶ່ງສູງກວ່າຄ່າສະເລ່ຍໄລຍະຍາວຢູ່ທີ່0,4 ອົງສາ ເຮັດໃຫ້ໂຕເລກ 28,2 ອົງສາກາຍເປັນອຸນຫະພູມທີ່ຮ້ອນທີ່ສຸດເປັນອັນດັບທີ 4 ນັບຕັ້ງແຕ່ປີ 1929 ຫຼື ປະມານ 95 ປີກ່ອນ. ສິງກະໂປບັນທຶກອຸນຫະພູມສູງສຸດຂອງປີຜ່ານມາໃນວັນທີ 13ກຸມພາ ຢູ່ທີ່ 37 ອົງສາ ຊຶ່ງເທົ່າກັບສະຖິຕິອຸນຫະພູມລາຍວັນສູງສຸດທີ່ເຄີຍບັນທຶກໄວ້ໄດ້ນັບຕັ້ງແຕ່ປີ 1929 ເປັນຕົ້ນມາ. MSS ຊີ້ໃຫ້ເຫັນວ່າ ປະກົດການແອວນີໂຢສົ່ງຜົນໃຫ້ອຸນຫະພູມຂອງສິງກະໂປໃນປີ 2023 ອົບອຸ່ນຫຼາຍກວ່າປົກກະຕິ ເນື່ອງຈາກອຸນຫະພູມພື້ນຜິວນ້ຳທະເລເໜືອມະຫາສະໝຸດປາຊີຟິກເຂດຮ້ອນພາກກາງ ແລະ ພາກຕາເວັນອອກເພີ່ມສູງຂຶ້ນ. ເຖິງຢ່າງໃດກໍຕາມ, ອຸນຫະພູມທີ່ອົບອຸ່ນທີ່ສຸດມີທ່າອ່ຽງຈະເກີດຂຶ້ນປະມານເດືອນມີນາ-ເດືອນພຶດສະພາ ເມື່ອປະກົດການແອວນີໂຢອ່ອນກຳລັງລົງໃນປີຖັດໄປ.
    MSS ຄາດຄະເນວ່າ: ອຸນຫະພູມສູງສຸດລາຍວັນສະເລ່ຍໝົດປີຈະເພີ່ມຂຶ້ນເປັນ 28,5 ອົງສາ ແລະ 32,9 ອົງສາໃນທ້າຍສະຕະວັດນີ້.