EU ຕັ້ງເປົ້າໝາຍຫຼຸດການປ່ອຍແກັສເຮືອນແກ້ວ 90% ໃນປີ 2040

ຂ່າວຕ່າງປະເທດລາຍງານ ເມື່ອບໍ່ດົນມານີ້, ສະຫະພາບເອີຣົບ (EU) ໄດ້ຮຽກຮ້ອງໃຫ້ບັນດາປະເທດສະມາຊິກຫຼຸດຜ່ອນການປ່ອຍແກັສເຮືອນແກ້ວ 90% ພາຍໃນປີ 2040.
    ທ່ານ ວອບເກ ເຮີກສະຕຣາ ຜູ້ແທນດ້ານນະໂຍບາຍສະພາບອາກາດຂອງ EU ກ່າວວ່າ: ຈະພະຍາຍາມຢ່າງເຕັມທີ່ເພື່ອການປ່ຽນຜ່ານທີ່ຍຸຕິທຳ ຊຶ່ງຈະເຮັດໃຫ້ທຸລະກິດຕ່າງໆຮຸ່ງເຮືອງ ແລະຮັບປະກັນວ່າຈະບໍ່ມີໃຜຖືກຖິ້ມໄວ້ທາງຫຼັງໃນລະຫວ່າງທີ່ EU ພະຍາຍາມບັນລຸເປົ້າໝາຍຄວາມເປັນກາງທາງກາກບອນພາຍໃນປີ 2050. ທ່ານ ເຮີກສະຕຣາ ກ່າວວ່າ: ຖ້າຫາກອ້າງອີງຈາກວິທະຍາສາດດີທີ່ສຸດທີ່ມີຢູ່ ແລະ ການປະເມີນຜົນກະທົບໂດຍລະອຽດທ່ານແນະນຳວ່າເປົ້າໝາຍປີ 2040 ຄວນເປັນການຫຼຸດການປ່ອຍແກັສເຮືອນແກ້ວ 90% ເມື່ອທຽບກັບລະດັບໃນປີ 1990. ເຖິງຢ່າງໃດກໍຕາມ, ທ່ານນາງ ອົວຊູລາ ຟອນ ແດ ເລເຢນ ປະທານຄະນະກຳມາທິການເອີຣົບ (EC) ຊີ້ໃຫ້ເຫັນວ່າ: ບັນຫາສິ່ງແວດລ້ອມເຕັມໄປດ້ວຍການເມືອງເຊັ່ນ: ການຍົກເລີກແຜນຫຼຸດການໃຊ້ສານຈຳກັດສັດຕູພືດໃຫ້ເຫຼືອເຄິ່ງໜຶ່ງພາຍໃນສະຕະວັດນີ້ ເນື່ອງຈາກຂໍ້ສະເໜີດັ່ງກ່າວກາຍເປັນສັນຍາລັກຂອງການແບ່ງຂົ້ວ ແລະ ເຮັດໃຫ້ເກີດຄວາມແຕກແຍກລະຫວ່າງຝ່າຍນິຕິບັນຍັດຂອງ EU ກັບປະເທດສະມາຊິກ. ທັງນີ້, ປະເທດສະມາຊິກຂອງ EU ທັງ 27 ປະເທດກຳລັງດຳເນີນການຕາມເປົ້າໝາຍໃນການຫຼຸດການປ່ອຍແກັສເຮືອນແກ້ວ 55% ພາຍໃນປີ 2030 ແຕ່ຄວາມບໍ່ພໍໃຈທີ່ເພີ່ມຂຶ້ນອາດຈະຂັດຂວາງຄວາມພະຍາຍາມທີ່ຈະປະຕິບັດຕາມເປົ້າໝາຍຫຼຸດການປ່ອຍແກັສເຮືອນແກ້ວ 90% ພາຍໃນປີ 2040.
    ຍິ່ງໄປກວ່ານັ້ນ, ອຸດສາຫະກຳບາງແຫ່ງຍັງສະແດງທ່າທີຄັດຄ້ານນະໂຍບາຍສະພາບອາກາດຂອງ EU ອີກທັງຜູ້ນຳປະເທດຫຼາຍຄົນຕ່າງກໍຮຽກຮ້ອງໃຫ້ກຸ່ມທີ່ຄັດຄ້ານຢຸດຕິກົດລະບຽບດ້ານສິ່ງແວດລ້ອມຊຸດໃໝ່ເປັນການຊົ່ວຄາວເຊັ່ນດຽວກັນ.