ເອຢິບ ຊຸກຍູ້ການສຳຫຼວດ ແລະ ຂຸດຄົ້ນນ້ຳມັນອາຍແກັສໃນອ່າວຊູແອດ

ສຳນັກຂ່າວສານຫວຽດນາມ ປະຈຳ ນະຄອນຫຼວງໄຄໂຣ ລາຍງານວ່າ: ໃນວັນທີ 26 ມີນາ ຜ່ານມາບໍລິສັດນ້ຳມັນ OSOCO ຂອງເອຢິບ ໄດ້ລົງນາມໃນສັນຍາຂຸດຄົ້ນ ແລະ ຜະລິດນ້ຳມັນ ສອງສະບັບຢູ່ອ່າວຊູແອດກັບຄູ່ຮ່ວມມືຂອງບໍລິສັດ ລວມມີ: ບໍລິສັດ ADES Holding Co (ຊາອຸດິດ ອາຣັບບີ), ບໍລິສັດ Gharib Integrated Oil Services Co (ອີຢິບ) ແລະ ບໍລິສັດ SUCO (ອີຢິບ).
ຂ່າວລະບຸວ່າ: ສັນຍາດັ່ງກ່າວທີ່ໄດ້ລົງນາມໂດຍການເປັນປະທານຂອງ ທ່ານ ທາເລັກ ເອລ-ໂມລາ ລັດຖະມົນຕີວ່າການກະຊວງນ້ຳມັນ ແລະ ຊັບພະຍາກອນບໍ່ແຮ່ ເອຢິບ ຊຶ່ງແມ່ນໝາກຜົນຂອງແຜນການປະມູນສາກົນຄັ້ງທຳອິດ ໂດຍກອງປະຊຸມໃຫຍ່ບໍລິສັດນ້ຳມັນເຊື້ອໄຟເອຢິບ ເລີ່ມດຳເນີນໃນເດືອນກັນຍາ ປີ 2023 ໃນອ່າວຊູແອດ.
ຕາມແຜນການ, ເອຢິບ ໄດ້ດຳເນີນການຂຸດຄົ້ນ 23 ເຂດໃໝ່, ໃນນັ້ນລວມມີ 10 ເຂດທະເລຊາຍຕາເວັນຕົກ, 2 ເຂດທະເລຊາຍຕາເວັນອອກ, 7 ເຂດອ່າວຊູແອດ ແລະ 4 ເຂດທະເລຊາຍຕາເວັນຕົກຢູ່ທະເລແດງ.
ທ່ານ ທາເລັກ ເອລ-ໂມລາ ໃຫ້ຮູ້ວ່າ: ສັນຍາຫຼ້າສຸດແມ່ນແນໃສ່ປັບປຸງການຂຸດຄົ້ນບັນດາແຫຼ່ງນ້ຳມັນ, ເພີ່ມທະວີການຜະລິດ, ປັບປຸງປະສິດທິຜົນເສດຖະກິດ ແລະ ຫຼຸດຜ່ອນການນຳເຂົ້ານ້ຳມັນຂອງ ເອຢິບ. ຄາດວ່າ, ບັນດາບໍລິສັດນ້ຳມັນ-ອາຍແກັສ ຂອງເອຢິບ ຈະລົງທຶນປະມານ 490 ລ້ານໂດລາ ເຂົ້າໃນການສຳຫຼວດ ແລະ ຂຸດຄົ້ນ ໃນປີງົບປະມານ 2024-2025.
ໃນໄລຍະ 5 ປີຜ່ານມາ, ເອຢິບ ແລະ ຄູ່ຮ່ວມມືຈາກບັນດາບໍລິສັດສາກົນ, ໄດ້ຂຸດເຈາະນ້ຳມັນອາຍແກັສທຳມະຊາດໃໝ່ 576 ແຫ່ງ ແລະ ຄົ້ນພົບແຫຼ່ງນ້ຳມັນ ແລະ ອາຍແກັສ 289 ແຫ່ງ.