ໂດຍ: ສ.ບຸດປະຊາ
ໃນອາທິດຜ່ານມາ, ປະຊາຊົນລາວບັນດາເຜົ່າ ໃນບັນດາແຂວງ ແລະ ນະຄອນຫຼວງວຽງຈັນ ລ້ວນແຕ່ໄດ້ພົບພໍ້ກັບເຫດການໄຟຟ້າຂັດຂ້ອງ, ໄຟຕົກ-ໄຟມອດ ຊຶ່ງແຕ່ລະຄັ້ງແມ່ນຕ້ອງໃຊ້ເວລາດົນນານພໍສົມຄວນ ຈຶ່ງສາມາດແກ້ໄຂບັນຫາ ແລະ ປ່ອຍໄຟຟ້າ ຄືນສູ່ສະພາບປົກກະຕິໄດ້ ຊຶ່ງປັດໄຈທີ່ພາໃຫ້ເກີດເຫດການດັ່ງກ່າວ ແມ່ນມີຫຼາຍປັດໄຈ ໂດຍເພສ EDL LAOS ກໍໄດ້ມີຂໍ້ມູນຊີ້ແຈງຂອງລັດວິສາຫະກິດໄຟຟ້າລາວ ເມື່ອວັນທີ 7 ເມສາ ຜ່ານມາ ພ້ອມທັງຂໍຄວາມເຫັນໃຈຈາກສັງຄົມ.
ໃນໄລຍະຜ່ານມາ ລັດວິສາຫະກິດໄຟຟ້າລາວ ແມ່ນໄດ້ລົງທຶນຢ່າງມະຫາສານສຸມໃສ່ວຽກງານການກໍ່ສ້າງລະບົບສາຍສົ່ງ-ສະຖານີໄຟຟ້າ ແຮງສູງ ແລະ ແຫຼ່ງຜະລິດຈໍານວນໜຶ່ງ ເປັນຂອງຕົນເອງ ເພື່ອຮັບໃຊ້ການສະໜອງໄຟຟ້າຢູ່ພາຍໃນໃຫ້ພຽງພໍ. ສ່ວນລະບົບຈໍາໜ່າຍໄຟຟ້າທົ່ວປະເທດ ແມ່ນບໍ່ໄດ້ຮັບການລົງທຶນພັດທະນາເປັນໂຄງການ ມີແຕ່ນໍາໃຊ້ງົບປະມານບໍລິຫານ ປະຈໍາປີ ຟຟລ ເຂົ້າໃນການບໍາລຸງຮັກສາ ແລະ ສ້ອມແປງ; ສະພາບລະບົບຕາຂ່າຍໄຟຟ້າ ມີຄວາມຍາວ (ເກີນມາດຕະຖານກໍານົດ) ລະບົບເກົ່າແກ່ເຊື່ອມໂຊມ, ເປ່ເພຕາມອາຍຸການ. ກົງກັນຂ້າມ ປະລິມານຄວາມຕ້ອງການຊົມໃຊ້ໄຟຟ້າ ພັດມີທ່າອ່ຽງເພີ່ມຂຶ້ນໃນແຕ່ລະປີ ໂດຍສະເພາະປີນີ້ແມ່ນເພີ່ມຂຶ້ນແບບກ້າວກະໂດດ (ສະເພາະນະຄອນຫຼວງວຽງຈັນເພີ່ມຂຶ້ນ 28%), ເນື່ອງຈາກ ສະພາບອາກາດຮ້ອນຜິດປົກກະຕິ, ສະພາບການ ແລະ ລາຄານໍ້າມັນເຊື້ອໄຟບໍ່ປົກກະຕິເຮັດໃຫ້ປະຊາຊົນຫັນມາຊົມໃຊ້ລົດໄຟຟ້າ ປ່ຽນແທນລົດທີ່ນໍາໃຊ້ນໍ້າມັນ ຕາມແນວທາງຂອງລັດຖະບານ ຊຶ່ງເຫັນວ່າໂຕເລກມີທ່າກ້າວເພີ່ມຂຶ້ນ ຈາກສະຖິຕິການນໍາເຂົ້າລົດໄຟຟ້າ ແຕ່ປີ 2019-2023 ມີທັງໝົດຫຼາຍກວ່າ 5.000 ຄັນ ແລະ ຄາດຄະເນຈະເພີ່ມຂຶ້ນປະມານ 15.000 ຄັນ ໃນປີ 2030.
ໃນໄລຍະມີການຊົມໃຊ້ໄຟຟ້າຫຼາຍຈະເຮັດໃຫ້ລະບົບຈໍາໜ່າຍຈຸດບໍລິເວນນັ້ນ ແລະ ເຂດໃກ້ຄຽງ ເກີດມີບັນຫາແຮງດັນຕົກ ຫຼື ໄຟຟ້າບໍ່ພຽງພໍ ຊຶ່ງເປັນສິ່ງທ້າທາຍໜຶ່ງຕໍ່ກັບລະບົບຈໍາໜ່າຍໄຟຟ້າ ຂອງ ຟຟລ ກໍລະນີການເພີ່ມຂຶ້ນຂອງ ເຄື່ອງປັບອາກາດ ແລະ ການນໍາໃຊ້ເຄື່ອງສາກ ໃນເວລາດຽວກັນ ຈະສົ່ງຜົນກະທົບຕໍ່ລະບົບຈໍາໜ່າຍພາກທີ່ຢູ່ອາໄສ ຖ້າຫາກການສາກລົດໄຟຟ້າ EV ຈໍານວນຫຼາຍ ຈະເຮັດໃຫ້ການຊົມໃຊ້ກໍາລັງໝໍ້ແປງເຕັມ ຫຼື ເກີນກໍາລັງທີ່ຈະຈ່າຍໄຟໃຫ້ໄດ້ (Over Load) ແລະ ບັນຫາການຕິດຕັ້ງສາຍເກາະຫ້ອຍໂທລະຄົມ ແລະ ບັນດາອຸປະກອນສື່ສານຕ່າງໆໃສ່ເສົາຕາຂ່າຍໄຟຟ້າເປັນຈຳນວນຫຼາຍ ສ່ຽງຕໍ່ເສົາຫັກ-ເສົາລົ້ມ ແລະ ການຕິດຕັ້ງທີ່ຂາດການບໍລິຫານຈັດການທີ່ດີ ກໍອາດມີຄວາມສ່ຽງຕໍ່ເຫດອັກຄີໄພຕ່າງໆເກີດຂຶ້ນ ດັ່ງທີ່ພົບເຫັນໃນປັດຈຸບັນ.
ນອກນີ້, ພາຍຸລະດູຮ້ອນ ໃນອາທິດຜ່ານມາເຮັດໃຫ້ ຝົນຕົກ ຟ້າຮ້ອງ ຟ້າຜ່າ ລົມແຮງ ພັດເອົາວັດຖຸ ແລະ ສິ່ງປຸກສ້າງຕ່າງໆໄປພາດສາຍໄຟ ກໍເປັນເຫດໃຫ້ສາຍໄຟຂາດ, ເສົາໄຟຫັກ ດອກກັນໄຟແຕກ ຈຶ່ງເຮັດໃຫ້ລະບົບໄຟໄດ້ຮັບຄວາມເສຍຫາຍ ເປ່ເພ, ນອກຈາກນັ້ນ ອຸບັດເຫດທີ່ເກີດຈາກລົດຕໍາເສົາໄຟ ຕົ້ນໄມ້ລົ້ມ/ຫັກທັບສາຍໄຟ ເສົາໄຟລົ້ມ ສາຍໄຟຂາດ ໝໍ້ແປງລະເບີດ ກໍເປັນອີກສາເຫດທີ່ລະບົບໄຟຟ້າຖືກຕັດແບບອັດຕະໂນມັດ.
ຕໍ່ສະພາບການດັ່ງກ່າວ, ລັດວິສາຫະກິດໄຟຟ້າລາວ ກໍບໍ່ໄດ້ນິ້ງນອນໃຈ ຕໍ່ກັບເຫດການທີ່ເກີດຂຶ້ນ ເພື່ອໃຫ້ການບໍລິການໄຟຟ້າແກ່ສັງຄົມໄດ້ຢ່າງຕໍ່ເນື່ອງ ແລະ ແກ້ໄຂໃຫ້ທັນກັບເຫດການ ເຊັ່ນ: ການເສີມ ແລະ ຍົກກຳລັງໝໍ້ແປງໄຟຟ້າ ການປ່ຽນຖ່າຍສາຍໄຟຈາກນ້ອຍເປັນໃຫຍ່ ຂອງຝ່າຍປະຕິບັດການໄຟຟ້າພາກກາງທີ່ຄຸ້ມຄອງ 9 ຕົວເມືອງ ຂອງ ນະຄອນຫຼວງວຽງຈັນ ຄື: ໃນລະຫວ່າງເດືອນ 2-5/2024 ຕິດຕັ້ງໝໍ້ແປງເສີມ 59 ໜ່ວຍ ມີກໍາລັງຕິດຕັ້ງ 6.450 ກິໂລໂວນອໍາແປ, ສັບປ່ຽນໝໍ້ແປງ ຈໍານວນ 34 ໜ່ວຍ ມີກໍາລັງຕິດຕັ້ງ 24.445 ກິໂລໂວນອໍາແປ ແລະ ຍົກກໍາລັງໝໍ້ແປງ 68 ໜ່ວຍ ມີກໍາລັງຕິດຕັ້ງ 14.625 ກິໂລໂວນອໍາແປ.
ເຖິງແມ່ນວ່າ ມີການເສີມ ແລະ ຍົກກຳລັງໝໍ້ແປງໄຟຟ້າກໍຕາມ ການເກີດເຫດ ສຸກເສີນ ແລະ ອຸບັດເຫດທາງລະບົບໄຟຟ້າເຊັ່ນ: ໝໍ້ແປງໄຟຟ້າລະເບີດຫຼາຍໜ່ວຍພ້ອມກັນເນື່ອງມາຈາກການໃຊ້ໄຟຟ້າເກີນກຳລັງໝໍ້ແປງ ແລະ ເສົາໄຟຫັກ/ລົ້ມ ສາຍໄຟຂາດ ຍ້ອນພາຍຸເຫດການເຫຼົ່ານີ້ເຮັດໃຫ້ມີຜົນກະທົບເປັນວົງກວ້າງ ປະກອບກັບເຄື່ອງມືສ້ອມແປງ ອຸປະກອນປ່ຽນຖ່າຍ ພາຫະນະຮັບໃຊ້ ແລະ ອ້າຍນ້ອງພະນັກງານວິຊາການ ມີຂີດຈຳກັດ ຈຶ່ງໄດ້ລະດົມກຳລັງຈາກພື້ນທີ່ອື່ນທີ່ບໍ່ໄດ້ຮັບຜົນກະທົບເຂົ້າຊ່ວຍກັນ ຊຶ່ງຕ້ອງໃຊ້ເວລາໃນການແກ້ໄຂ.
ສະນັ້ນ, ຂໍໃຫ້ສັງຄົມໄດ້ຮັບຊາບ ເຂົ້າໃຈ ແລະ ໃຫ້ອະໄພຕໍ່ເຫດການສະໜອງໄຟຟ້າບໍ່ໄດ້ຕາມປົກກະຕິນີ້ດ້ວຍ. ເມື່ອມີເຫດການກ່ຽວກັບໄຟຟ້າ ຂໍໃຫ້ປະຊາຊົນຕິດຕໍ່ຫາລັດວິສາຫະກິດໄຟຟ້າລາວ ຊຶ່ງປັດຈຸບັນແມ່ນມີສູນບັນຊາລະບົບໄຟຟ້າ, ສູນບໍລິການ Call center 1199 ຮັບແຈ້ງເຫດ ແລະ ສູນບໍລິການສ້ອມແປງໄຟຟ້າປະຈໍາເມືອງ ມີພະນັກງານ-ວິຊາການ ຄອຍບໍລິການແກ້ໄຂສ້ອມແປງໄຟຕົກໄຟມອດຕະຫຼອດ 24 ຊົ່ວໂມງ.
ຄໍາເຫັນ