ສູນກາງພັກ, ລັດຖະບານ, ສະພາແຫ່ງຊາດ, ກໍາລັງປະກອບອາວຸດ, ແນວລາວສ້າງຊາດ, ອົງການຈັດຕັ້ງມະຫາຊົນ ແລະ ປະຊາຊົນລາວບັນດາເຜົ່າ ໄດ້ພ້ອມກັນຈັດພິທີໂຮມຊຸມນຸມໃຫຍ່ ສະເຫຼີມສະ ຫຼອງວັນໄຊຊະນະ ບັ້ນຮົບດຽນບຽນຝູ້ ຄົບຮອບ 70 ປີ (7/5/1954-7/5/2024) ຂຶ້ນໃນວັນທີ 7 ພຶດສະພານີ້ ທີ່ຫໍປະຊຸມແຫ່ງຊາດ ໂດຍການເຂົ້າຮ່ວມ ແລະ ກ່າວຄໍາປາໄສຂອງ ສະຫາຍ ນາງ ປານີ ຢາທໍ່ຕູ້ ກໍາມະການກົມການເມືອງສູນກາງພັກ ຮອງປະທານປະເທດ; ມີ ສະຫາຍ ສອນໄຊ ສີພັນດອນ ກໍາມະການກົມການເມືອງສູນກາງພັກ ນາຍົກລັດຖະມົນຕີ, ສະຫາຍ ຫວຽນບາຮຸ່ງ, ເອກອັກຄະລັດຖະທູດຜູ້ມີອຳນາດເຕັມແຫ່ງ ສສ ຫວຽດນາມ ປະຈໍາ ສປປ ລາວ ພ້ອມດ້ວຍບັນດາສະຫາຍການນໍາພັກ-ລັດ, ອະດີດການນໍາພັກ-ລັດ ແລະ ບັນດານັກຮຽນ-ນັກສຶກສາ ລາວ-ຫວຽດນາມ ເຂົ້າຮ່ວມຢ່າງຄຶກຄື້ນ.
ກ່ອນເຂົ້າພິທີທາງການ, ບັນດາສະຫາຍທີ່ເຂົ້າຮ່ວມ ໄດ້ພ້ອມກັນຮັບຊົມສາລະຄະດີ ກ່ຽວກັບບັ້ນຮົບໄຊຊະນະດຽນບຽນຝູ້ ແລະ ຊົມສິລະປະ-ວັນນະຄະດີ ທີ່ສ່ອງແສງເຖິງບັ້ນຮົບດັ່ງກ່າວ ແລະ ສື່ສານຢ່າງຊາບຊຶ້ງເຖິງສາຍພົວພັນມິດຕະພາບລາວ-ຫວຽດນາມ; ພ້ອມນີ້, ກໍໄດ້ພ້ອມກັນເຄົາລົບທຸງຊາດ ແລະ ກົ້ມຫົວໄວ້ອາໄລ. ຈາກນັ້ນ, ສະຫາຍ ຄໍາພັນ ເຜີຍຍະວົງ ຄະນະເລຂາທິການສູນກາງພັກ ຫົວໜ້າຄະນະໂຄສະນາອົບຮົມສູນກາງພັກ ປະທານສະພາທິດສະດີສູນກາງພັກ ກໍໄດ້ກ່າວຈຸດປະສົງຂອງພິທີໂຮມຊຸມນຸມໃຫຍ່ຄັ້ງນີ້ວ່າ: ການຈັດພິທີໂຮມຊຸມນຸມໃຫຍ່ສະເຫຼີມສະຫຼອງວັນໄຊຊະນະບັ້ນຮົບດຽນບຽນຝູ້ ຄົບຮອບ 70 ປີ ໃນມື້ນີ້ ເປັນການຫວນຄືນມູນເຊື້ອວິລະກໍາອັນລໍ້າເລີດ, ຄວາມອາດຫານກ້າແກ່ນຂອງກອງທັບ ແລະ ປະຊາຊົນຫວຽດນາມໃນສະໜາມຮົບການຕໍ່ສູ້ທີ່ດຸເດືອດ, ຂ້ຽວຂາດທີ່ສຸດໃນພາລະກິດປະຕິວັດຊາດ ເພື່ອບຸກໂຈມຕີເອົາໄຊຊະນະຈາກພວກລ່າເມືອງຂຶ້ນຝຣັ່ງຜູ້ຮຸກຮານ ແລະ ການແຊກແຊງຊ່ວຍໜູນຂອງຈັກກະ ພັດອາເມຣິກາ ທີ່ໃຊ້ເວລາ 56 ວັນຄືນ; ເປັນການທົບທວນຄືນປະຫວັດສາດ ແຫ່ງການພົວພັນອັນຍາວນານຂອງສອງຊາດລາວ-ຫວຽດນາມໃນການຮ່ວມສໍາພັນສູ້ຮົບຢ່າງໜຽວແໜ້ນ ຊຶ່ງເປັນການຢັ້ງຢືນຢ່າງໜັກແໜ້ນເຖິງຄວາມຜູກພັນອັນໝັ້ນໜຽວ ດ້ວຍໄມຕີຈິດມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດລາວ-ຫວຽດນາມ ທີ່ເປັນມູນເຊື້ອອັນດີງາມຕະຫຼອດມາ.
ສະຫາຍ ນາງ ປານີ ຢາທໍ່ຕູ້ ໄດ້ກ່າວປາໄສ ໂດຍມີເນື້ອໃນບາງຕອນວ່າ: ກ່ອນໜ້ານີ້ 70 ປີ, ພາຍຫຼັງທີ່ຈັກກະພັດຝຣັ່ງ ໄດ້ກັບຄືນມາຮຸກຮານອິນດູຈີນອີກຄັ້ງໃໝ່ ໃນປີ 1946, ປະຊາຊົນສາມຊາດ ລາວ, ຫວຽດນາມ ແລະ ກຳປູເຈຍ ໄດ້ພ້ອມກັນລຸກຂຶ້ນເພື່ອສືບຕໍ່ຕໍ່ສູ້ຕ້ານກັບພວກຈັກກະພັດຜູ້ຮຸກຮານ. ສະເພາະປະຊາຊົນຫວຽດນາມ ກໍໄດ້ສືບຕໍ່ຕໍ່ສູ້ພາຍໃຕ້ການນຳພາຂອງພັກແຮງງານຫວຽດນາມ (ພັກກອມມູນິດຫວຽດນາມ ໃນປັດຈຸບັນ) ໂດຍແມ່ນ ປະທານ ໂຮ່ຈິມິນ ເປັນຜູ້ສ້າງຕັ້ງ ແລະ ນຳພາ. ການຕໍ່ສູ້ຕ້ານພວກຈັກກະພັດຝຣັ່ງ ໄດ້ດຳເນີນເປັນເວລາ 8 ປີ, ດ້ວຍທາດແທ້ກະຫາຍສົງຄາມ, ພວກເຂົາໄດ້ສ້າງແຜນ ການນາວາ ເພື່ອຫວັງຈະບຽດຍຶດເອົາປະເທດຫວຽດນາມພາຍໃນ 18 ເດືອນ, ດ້ວຍການທ້ອນໂຮມກຳລັງ, ສ້າງຖານທີ່ໝັ້ນທີ່ເຂັ້ມເເຂງ ຢູ່ດຽນບຽນຝູ້ ໂດຍໃຊ້ກຳລັງ 21 ກອງພັນ, ມີອາວຸດຍຸດໂທປະກອນຄົບຊຸດທີ່ທັນສະໄໝ, ພ້ອມທັງຈັດວາງກຳລັງຕາມຈຸດປ້ອມໝັ້ນ 49 ເເຫ່ງຢູ່ 3 ເຂດ.
ເຫັນໄດ້ກົນອຸບາຍອັນເລິກເເລບຂອງພວກຈັກກະພັດຝຣັ່ງ, ເຫັນໄດ້ໂອກາດທີ່ສຸກງອມມາເຖິງ ແລະ ບົນພື້ນຖານການວິເຄາະ, ຕີລາຄາສະພາບການຂອງໂລກ ກໍຄືພາຍໃນປະເທດ, ຕົ້ນເດືອນທັນວາ ປີ 1953, ກົມການເມືອງສູນກາງພັກຫວຽດນາມ ໄດ້ຕົກລົງເປີດບັ້ນຮົບດຽນບຽນຟູ, ປະທານ ໂຮ່ ຈິມິນ ໄດ້ຊີ້ນຳວ່າ: ບັ້ນຮົບດຽນບຽນຝູ້ ເປັນບັ້ນຮົບທີ່ມີຄວາມໝາຍສຳຄັນ ທາງດ້ານການທະຫານ; ການເມືອງ ແລະ ການຕ່າງປະເທດ. ສະນັ້ນ, “ຕ້ອງຕີໃຫ້ຊະນະ ແລະ ຕ້ອງໄຊຊະນະ ຢ່າງເເນ່ນອນ”. ໂດຍປະຕິບັດຕາມຄຳສັ່ງຂອງກອງບັນຊາການດ້ານຮົບ ໂດຍແມ່ນ ນາຍພົນເອກ ວໍ້ຫງວ້ຽນຢາບ ເປັນຜູ້ຊີ້ນຳ ແລະ ບັນຊາໂດຍກົງ, ໃນຕອນເຊົ້າຂອງວັນທີ 1 ພຶດສະພາ ປີ 1954, ກອງກຳລັງທະຫານຫວຽດນາມ ໄດ້ບຸກໂຈມຕີເຂົ້າທັງ 3 ດ້ານ ຄື: ດ້ານຕາເວັນອອກ, ຕາເວັນຕົກ ແລະ ຕາເວັນອອກສ່ຽງເໜືອ... ມາຮອດຕອນທ່ຽງຂອງວັນທີ 7 ພຶດສະພາ, ກອງທັບຫວຽດນາມ ໄດ້ເປັນເຈົ້າການ ທົ່ວສະໜາມຮົບ, ຮອດຕອນແລງຂອງວັນທີ 7 ພຶດສະພາ, ດຽນບຽນຝູ້ ໄດ້ຮັບການປົດປ່ອຍຢ່າງສົມບູນ, ສາມາດດັບສູນ ແລະ ຈັບທະຫານຝຣັ່ງ ໄດ້ເປັນໝື່ນກວ່າບັກ, ນັບທັງຜູ້ບັນຊາການດ້ານຮົບຂອງຝຣັ່ງ ນາຍພົນ ເດີກາດຕຣີ ແລະ ອື່ນໆ. ໄຊຊະນະດຽນບຽນຝູ້ ເປັນເຫດການທີ່ດັງກ້ອງກັງວານ ແລະ ສັ່ນສະເທືອນໄປທົ່ວໂລກ ແລະ ມີຄວາມໝາຍສຳຄັນໃນປະຫວັດສາດຂອງມວນມະນຸດ. (ຂ່າວ-ພາບ: ສຸກສະຫວັນ)
ຄໍາເຫັນ