ມີສະຫາຍ ມອນໄຊ ລາວມົວຊົ່ງ ກຳມະການສໍາຮອງສູນກາງພັກເລຂາຄະນະບໍລິຫານງານພັກເລຂາ ຄຊປປລ, ມີບັນດາສະຫາຍກຳມະການກົມການເມືອງສູນກາງພັກ, ຄະນະເລຂາທິການສູນກາງພັກ, ບັນດາສະຫາຍກຳມະການສູນກາງພັກ, ການນໍາພັກ-ລັດ, ບັນດາສະຫາຍອະດີດການນໍາຂັ້ນສູງພັກ-ລັດ, ພະນັກງານປະຕິວັດອາວຸໂສ, ອະດີດການນໍາສູນກາງຊາວໜຸ່ມປະຊາຊົນປະຕິວັດລາວ (ສຊປລ), ຊາວໜຸ່ມ-ເຍົາວະຊົນ, ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
ໃນວາລະກ່ອນເຂົ້າສູ່ພິທີທາງການ, ສະຫາຍ ທອງລີ ສີສຸລິດ ຮອງເລຂາຄະນະບໍລິຫານງານພັກຮອງເລຂາ ຄຊປປລ ໄດ້ຂໍຮຽນເຊີນບັນດາສະຫາຍ ທີ່ເຂົ້າຮ່ວມພິທີແບບປົກກະຕິ ແລະ ຜ່ານລະບົບທາງໄກທົ່ວປະເທດ ລຸກຂຶ້ນເຄົາລົບທຸງ ບັນເລງກອງດຸລິຍາງ+ຮ້ອງເພງຊາດຕາມລໍາດັບ. ຈາກນັ້ນ, ບັນດາສະຫາຍ ຜູ້ເຂົ້າຮ່ວມໄດ້ຮັບຊົມວິດີໂອສາລະຄະດີເລື່ອງສັ້ນ 70 ປີ ມູນເຊື້ອແຫ່ງການເຕີບໃຫຍ່ຂະຫຍາຍຕົວໃນຕະຫຼອດໄລຍະຜ່ານມາ ຈົນຮອດປັດຈຸບັນ, ຮັບຊົມການສະແດງສິລະປະ. ຫຼັງຈາກນັ້ນ, ສະຫາຍ ມອນໄຊ ລາວມົວຊົ່ງ ໄດ້ຂຶ້ນກ່າວມີຄໍາເຫັນຕໍ່ວັນສ້າງຕັ້ງ ຄຊປປລ ພ້ອມຍົກໃຫ້ເຫັນມູນເຊື້ອແຫ່ງການເຕີບໃຫຍ່ຂະຫຍາຍຕົວ ຂອງຄຊປປລເປັນມູນເຊື້ອທີ່ອາດຫານກ້າແກ່ນ ແລະ ສະຫງ່າລາສີ ຊຶ່ງຍາມໃດກໍຕິດພັນກັບມູນເຊື້ອຂອງຊາດ,ຂອງພັກ, ຂອງກໍາລັງປະກອບອາວຸດ, ຂອງທຸກຂະແໜງການ ແລະ ທ້ອງຖິ່ນເພາະວ່າທຸກຍຸກທຸກສະໄໝຊາວໜຸ່ມລາວແມ່ນມີບົດບາດຕັດສິນ ແລະ ເປັນກໍາລັງແຮງອັນໃຫຍ່ຫຼວງໃຫ້ແກ່ທຸກຍຸກທຸກສະໄໝ.
ໃນພິທີ, ສະຫາຍ ທອງລຸນ ສີສຸລິດ ໄດ້ຂຶ້ນກ່າວສູນທອນພົດ ຊຶ່ງມີເນື້ອໃນສໍາຄັນບາງຕອນວ່າ: ໃນພາລະກໍາປະຫວັດສາດແຫ່ງການສ້າງສາແລະພັດທະນາປະເທດຊາດ ຖ້າເວົ້າເຖິງການພັດທະນາຊາວໜຸ່ມ-ເຍົາວະຊົນແມ່ນພວກເຮົາກໍາລັງເວົ້າເຖິງອະນາຄົດຂອງຊາດນັ້ນຮຽກຮ້ອງຊາວໜຸ່ມບັນດາເຜົ່າຕ້ອງເພີ່ມທະວີຄວາມຂະຫຍັນຂັນແຂງ,ຄວາມຮັບຜິດຊອບຢ່າງເດັດດ່ຽວຂ້ຽວຂາດບໍ່ຫວັ່ນກວ່າຕໍ່ພາຍຸລົມແດງ, ຕ້ອງອຸທິດກໍາລັງແຮງໃຈ, ແຮງກາຍແລະສະຕິປັນຍາອັນໜຸ່ມແໜ້ນຂອງຕົນເຂົ້າສູ່ພາລະກິດການປະຕິວັດຈຶ່ງຈະມີຜົນສໍາເລັດໄດ້.ໃນນັ້ນ, ຄະນະຊາວໜຸ່ມປະຊາຊົນປະຕິວັດລາວຖືເປັນແກນນໍາຂອງຊາວໜຸ່ມໂດຍກົງເຂົ້າສູ່ພາລະກິດອັນຍິ່ງໃຫຍ່ດັ່ງກ່າວ,ເພື່ອເຮັດຫຼ້ອນໜ້າທີ່ພາລະບົດບາດທີ່ກ່າວມານັ້ນ, ຂ້າພະເຈົ້າຮຽກຮ້ອງໃຫ້ຄະນະຊາວໜຸ່ມປະຊາຊົນປະຕິວັດລາວທຸກສະຫາຍເອົາໃຈໃສ່ສືບຕໍ່ເຕົ້າໂຮມຄວາມສາມັກຄີພາຍໃນພັກປຸກລະດົມຊາວໜຸ່ມ, ເຍົາວະຊົນເຂົ້າຮ່ວມຂະບວນການໃຫ້ຫຼາຍຂຶ້ນແລະກວ້າງຂວາງແຕ່ຂັ້ນສູນກາງຮອດທ້ອງຖິ່ນ,ຮາກຖານກ່ອນອື່ນໝົດຕ້ອງເປັນເອກະພາບໃນການປົກປັກຮັກສາແລະສ້າງສາພັດທະນາປະເທດຊາດກ້າວຂຶ້ນສູ່ຈຸດໝາຍສັງຄົມນິຍົມຢ່າງໜັກແໜ້ນ,ຕ້ອງຍົກສູງການສຶກສາອົບຮົມພະນັກງານຊາວໜຸ່ມ, ສະມາຊິກຊາວໜຸ່ມກໍຄືຊາວໜຸ່ມ-ເຍົາວະຊົນລາວບັນດາເຜົ່າໃຫ້ມີຄຸນທາດການເມືອງໜັກແໜ້ນ, ມີຄຸນສົມບັດສິນທຳປະຕິວັດ, ມີນ້ຳໃຈຮັກຊາດ, ຮັກລະບອບປະຊາທິປະໄຕປະຊາຊົນ, ຮູ້ປົກປັກຮັກສາແລະເສີມຂະຫຍາຍມູນເຊື້ອອັນດີງາມຂອງຕົນ,ປັບປຸງແບບແຜນການດຳລົງຊີວິດທີ່ດີ, ດຸໝັ່ນໃນການສຶກສາຮ່ຳຮຽນ, ຍົກລະດັບຄວາມຮູ້, ຄວາມສາມາດຂອງຕົນໃຫ້ສູງຂຶ້ນໄປເລື້ອຍໆເພື່ອໃຫ້ກາຍເປັນຜູ້ຊຳນານງານແລະກາຍເປັນຜູ້ສືບທອດທີ່ດີີຂອງຊາດ.
ຄະນະຊາວໜຸ່ມ, ຂະແໜງການຕ່າງໆຂອງລັດ, ອົງການຈັດຕັ້ງມະຫາຊົນແລະສັງຄົມຕ້ອງພ້ອມພຽງກັນສ້າງຊາວໜຸ່ມ, ເຍົາວະຊົນເຮັດແນວໃດໃຫ້ຮຸ່ນຄົນເຫຼົ່ານີ້ມີຄຸນສົມບັດ, ມີຄວາມສາມາດແລະເປັນເຈົ້າການປະກອບສ່ວນພັດທະນາປະເທດຢ່າງແຂງແຮງເພື່ອຈະກາຍເປັນຜູ້ສືບທອດແຫ່ງຍຸກສະໄໝສົມກັບຄໍາຂະໜານນາມປະທານໄກສອນພົມວິຫານທີ່ວ່າ:ຊາວໜຸ່ມຈົ່ງເປັນດັ່ງນົກອິນຊີທີ່ບໍ່ຫວັ່ນກົວຕໍ່ພາຍຸລົມແດງຈົ່ງກາຍເປັນສິນໄຊແຫ່ງຍຸກສະໄໝພວກເຮົາ. ນົກອິນຊີກໍຕ້ອງແຂງແຮງບິນໃຫ້ໄວບິນໃຫ້ສູງ, ສິນໄຊກໍຕ້ອງມີຫຼ່ຽມມີລາຍໃຫ້ຫຼາຍຂຶ້ນ, ຊາວໜຸ່ມຮຸ່ນກ່ອນແມ່ນເຮັດໄດ້ຫຼາຍອັນສາມາດປົດປ່ອຍປະເທດຊາດໄດ້ແລ້ວຊາວໜຸ່ມຮຸ່ນປັດຈຸບັນຈະເຮັດຫຍັງແດ່ຈະສືບຕໍ່ແນວໃດເພື່ອໃຫ້ສັງຄົມອີ່ມໜໍາສໍາລານ.
ໂອກາດນີ້, ສະຫາຍ ທອງລຸນ ສີສຸລິດ ໄດ້ໃຫ້ກຽດມອບຫຼຽນໄຊອິດສະຫຼະຊັ້ນ III ໃຫ້ ຄຊປປລທີ່ມີຜົນງານດີເດັ່ນໃນການນໍາພາ-ຊີ້ນໍາວຽກງານຊາວໜຸ່ມເຍົາວະຊົນລາວບັນດາເຜົ່າໃນຂອບເຂດທົ່ວປະເທດຕະຫຼອດໄລຍະ (2016-2025), ເນື່ອງໃນໂອກາດວັນສ້າງຕັ້ງ ຄຊປປລ ຄົບຮອບ 70 ປີຢ່າງສົມກຽດ.
(ຂ່າວ-ພາບ: ວັນເພັງ)
ຄໍາເຫັນ