ໃນວັນທີ 6 ພະຈິກນີ້ ທີ່ບ້ານນາຕານເມືອງໄຊທານີນະຄອນຫຼວງວຽງຈັນ.ເປັນກຽດຕ້ອນຮັບທ່ານຮອງເຈົ້າຄອງ ພ້ອມດ້ວຍຄະນະ ໂດຍທ່ານນາງ ອານິດ ສີວິໄຊ ປະທານບໍລິສັດ ທະເວວ ພັດທະນາກະສິກໍາຄົບວົງຈອນ ແລະ ຜະລິດຕະພັນລາວ ຈໍາກັດ, ເລຂາພັກບ້ານ, ນາຍບ້ານນາຕານ ພ້ອມດ້ວຍຄູ-ອາຈານ ແລະ ນັກຮຽນ.
ພາຍຫຼັງ, ທ່ານຮອງເຈົ້າຄອງ ໄດ້ລົງຢ້ຽມຢາມເນື້ອທີ່ການຜະລິດກະສິກໍາ, ຊົມຜົນລະປູກພືດຜັກຕ່າງໆຂອງໂຄງການ, ຍັງໄດ້ຮັບຟັງການລາຍງານ ບົດສັງລວມຫຍໍ້ກ່ຽວກັບສັນຍາ ຈາກຜູ້ຕາງໜ້າພະແນກແຜນການ ແລະ ການລົງທຶນ ນວຊຶ່ງບົດສັງລວມຫຍໍ້ກ່ຽວກັບສັນຍາ ວ່າດ້ວຍສໍາປະທານທີ່ດິນລັດ ແລະ ໜອງນໍ້າ ເພື່ອລົງທຶນປູກໝາກໄມ້ ແລະ ລ້ຽງກຸ້ງກ້າມນໍ້າຈືດເປັນສິນຄ້າຈໍາໜ່າຍພາຍໃນ ແລະ ສົ່ງອອກຕ່າງປະເທດ ຕັ້ງຢູ່ ບ້ານນາຕານເມືອງໄຊທານີນວ ໂດຍການມີສ່ວນຮ່ວມ ຂອງປະຊາຊົນ ບ້ານນາຕານ ສະບັບລົງວັນທີ 16 ມີນາ 2023, ຜ່ານການຈັດຕັ້ງປະຕິບັດໂຄງການເຫັນວ່າ ມາຮອດປັດຈຸບັນແມ່ນໄດ້ສໍາເລັດໜ້າວຽກຂອງໂຄງການແລ້ວ.
ຈາກນັ້ນ, ທ່ານນາງ ອານິດ ສີວິໄຊ ໄດ້ກ່າວວ່າ: ມາຮອດປັດຈຸບັນ ພືດຜັກຕ່າງໆທີ່ທົດລອງປູກໃນສວນຂອງໂຄງການ ເຫັນວ່າ ມີທ່າກ້າວ, ການເຮັດວຽກງານກະສິກໍາ ແມ່ນກິນບໍ່ມີມື້ໝົດ, ວິທີການປູກແມ່ນຖືກຕາມເຕັກນິກ, ປີ 2025 ວາງແຜນເລີ່ມການຂາຍ, ປີ 2026 ພ້ອມທີ່ຈະໃຫ້ນັກຮຽນ-ນັກສຶກສາໄດ້ໄປທັດສະນະສຶກສາ. ຈໍານວນຜົນລະປູກປັດຈຸບັນມີ: ຕົ້ນໝາກພ້າວ, ຕົ້ນມ່ວງ, ຕົ້ນໄຜ່, ຕົ້ນລະມຸດ, ໝາກໂມ, ຕົ້ນສາລີ, ຕົ້ນຂະຈອນ, ຜັກແປ້ນ, ຕົ້ນໝາກນອດ, ໝາກກະທັນ, ຕົ້ນອະງຸ່ນ, ກຸ້ງນໍ້າຈືດ ແລະ ພືດຜັກອື່ນໆ. ຈາກນັ້ນ ທ່ານອານິດ ສີວິໄຊ ຍັງໄດ້ສະເໜີ ຕໍ່ຄະນະນໍາ ນວ ວ່າ: ຢາກໃຫ້ ພັກ, ລັດ ຊ່ວຍຊຸກຍູ້, ສົ່ງເສີມປະຊາຊົນຕື່ມ ເພື່ອຊ່ວຍໂຄງການດໍາເນີນວຽກງານໄດ້ຢ່າງສະດວກ ແລະ ມີປະສິດທິຜົນ, ຊ່ວຍໂຄສະນາ ເຜີຍແຜ່ ປະຊາຊົນ ຮັບຮູ້ເຖິງຈຸດປະສົງຫຼັກ ຂອງໂຄງການ ແລະ ວຽກງານອື່ນໆ.
ໂອກາດນີ້, ທ່ານຮອງເຈົ້າຄອງຍັງໄດ້ກ່າວວ່າ: ໃຫ້ບໍລິສັດ ສືບຕໍ່ເອົາໃຈໃສ່ການຜະລິດສືບຕໍ່ຕາມຜັງຂອງໂຄງການທີ່ວາງໄວ້, ສ້າງໃຫ້ເປັນແຫຼ່ງທ່ອງທ່ຽວ ເພື່ອກະຈາຍເຕັກນິກ ການປູກ-ການລ້ຽງ ຂອງວິຊາການ ໃຫ້ກັບປວງຊົນ ເຂດບ້ານນາຕານຢ່າງກວ້າງຂວາງ, ບ້ານ, ເມືອງ ຊ່ວຍຊຸກຍູ້ ພໍ່, ແມ່, ປະຊາຊົນ ໂດຍສະເພາະ ຄອບຄົວ ຜູ້ທີ່ມີຄວາມຫ້າວຫັນ, ຄອບຄົວຕົວແບບ ໃນການຜະລິດ ເອົາເຂົ້າໄປຝຶກອົບຮົມນໍາໂຄງການກ່ອນ ພາຍຫຼັງຄອບຄົວ ທີ່ໄດ້ຜ່ານການອົບຮົມ ສຳນິຊໍານານງານໃນການປູກຝັງ-ລ້ຽງສັດແລ້ວ ການປູກພືກຜັກຕ່າງໆ ຈະໄດ້ຮັບການຮ່ວມມື ຈາກປະຊາຊົນ.
ໂຄງການດັ່ງກ່າວນີ້ ນອກຈາກປະຊາຊົນໄດ້ມີສ່ວນຮ່ວມ, ຍັງສ້າງວຽກເຮັດງານທໍາ ແລະ ຍັງຜະລິດກະສິກໍາສະອາດ, ຮັກສານົກເປັດນໍ້າ ແລະ ເປັນສະຖານທີ່ທັດສະນະສຶກສາ ໃຫ້ກັບນັກຮຽນ-ນັກສຶກສາ, ອະນຸລັກລະບົບນິເວດ ໃຫ້ມີຄວາມຍືນຍົງ ຍ້ອນວ່າ ສະຖານທີ່ດັ່ງກ່າວ ແມ່ນແຫຼ່ງນໍ້າທໍາມະຊາດທີ່ກວ້າງ ເໝາະສົມກັບຊີວະນາໆພັນໄດ້ຢູ່ອາໄສ.
(ຂ່າວ-ພາບ: ແສງຈັນ)
ຄໍາເຫັນ