ຮອງນາຍົກລັດຖະມົນຕີ ໂອ້ລົມຜູ້ແທນສະຫະພັນນັກຮົບເກົ່າແຫ່ງຊາດລາວ
...........
ໃນວັນທີ 15 ກຸມພາ ຜ່ານມາ, ສະຫາຍ ພົນເອກ ວິໄລ ຫຼ້າຄຳຟອງ ກຳມະການກົມການເມືອງສູນກາງພັກ ຮອງນາຍົກລັດຖະມົນຕີ ລັດຖະມົນຕີກະຊວງປ້ອງກັນຄວາມສະຫງົບ ໂອ້ລົມຕໍ່ກອງປະຊຸມຄົບຄະນະບໍລິຫານງານສະຫະພັນນັກຮົບເກົ່າແຫ່ງຊາດລາວ ຄັ້ງທີ 2 ສະໄໝທີ lV, ຢູ່ສະໂມສອນກອງບັນຊາການທະຫານແຂວງຫຼວງພະບາງ, ໂດຍມີສະຫາຍ ພົນໂທ ແສງນວນ ໄຊຍະລາດ ເລຂາຄະນະບໍລິຫານງານພັກ ປະທານສະຫະພັນນັກຮົບເກົ່າແຫ່ງຊາດລາວ, ສະຫາຍ ຄຳຂັນ ຈັນທະວີສຸກ ກຳມະການສູນກາງພັກ ເຈົ້າແຂວງຫຼວງພະບາງ, ມີຜູ້ແທນສະຫະພັນນັກຮົບເກົ່າຈາກສູນກາງ, ທ້ອງຖິ່ນ, ແຂກຮັບເຊີນເຂົ້າຮ່ວມ.
ໃນໂອກາດນີ້, ສະຫາຍ ພົນເອກ ວິໄລ ຫຼ້າຄຳຟອງ ໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານ ແລະຄຸນງາມຄວາມດີຂອງສະຫະພັນນັກຮົບເກົ່າແຫ່ງຊາດ ທີ່ພ້ອມກັນຍາດມາໄດ້ໃນໄລຍະຜ່ານມາ, ພ້ອມທັງຍົກໃຫ້ເຫັນບົດບາດຄວາມສຳຄັນ ແລະ ຜົນງານອັນໃຫຍ່ຫຼວງຂອງນັກຮົບເກົ່າ ໃນພາລະກິດຕໍ່ສູ້ປົດປ່ອຍຊາດ ກໍຄືໃນພາລະກິດການປົກປັກຮັກສາ ແລະ ການພັດທະນາປະເທດຊາດ, ຍົກໃຫ້ເຫັນຜົນງານການປະກອບສ່ວນຂອງນັກຮົບເກົ່າ ແລະ ສະມາຊິກນັກຮົບເກົ່າ ຕະຫຼອດໄລຍະການຈັດຕັ້ງປະຕິບັດມະຕິກອງປະຊຸມໃຫຍ່ຜູ້ແທນນັກຮົບເກົ່າທົ່ວປະເທດ ຄັ້ງທີ IV ຜ່ານມາ, ຊີ້ໃຫ້ເຫັນສະພາບການທີ່ພົ້ນເດັ່ນ ຂອງສາກົນ ແລະ ພາກພື້ນ ກໍຄືຂໍ້ສະດວກ, ຂໍ້ຫຍຸ້ງຍາກຢູ່ພາຍໃນປະເທດ ທີ່ພວກເຮົາຈະຕ້ອງໄດ້ພ້ອມກັນສູ້ຊົນເສີມຂະຫຍາຍມູນເຊື້ອຮັກຊາດ ແລະ ຕັດສິນໃຈສູງຜ່ານຜ່າໄປໃຫ້ເຖິງຈຸດໝາຍທີ່ໄດ້ກຳນົດໄວ້. ນອກຈາກນີ້, ສະຫາຍຍັງໄດ້ຮຽກຮ້ອງໃຫ້ທົ່ວສະຫະພັນນັກຮົບເກົ່າແຫ່ງຊາດລາວ ຕ້ອງໄດ້ເພີ່ມທະວີໃນການກໍ່ສ້າງພັກໃຫ້ມີຄວາມປອດໃສ, ເຂັ້ມແຂງ, ໜັກແໜ້ນ; ເອົາໃຈໃສ່ກໍ່ສ້າງພະນັກງານໃຫ້ໄດ້ຕາມມາດຕະຖານ ແລະ ມີຮຸ່ນສືບທອດປ່ຽນແທນ; ຄົ້ນຄວ້າຫັນແນວທາງນະໂຍບາຍຂອງພັກ ເປັນແຜນການ, ແຜນງານເຄື່ອນໄຫວຕົວຈິງຂອງສະຫະພັນນັກຮົບເກົ່າແຕ່ລະຂັ້ນ; ປະກອບສ່ວນເຂົ້າໃນການສຶກສາອົບຮົມຄົນຮຸ່ນໜຸ່ມໃຫ້ຫຼາຍກວ່າເກົ່າ, ຊຸກຍູ້ຂະບວນການແຂ່ງຂັນ 3 ດີ 6 ຮັກສາ, ຕິດພັນກັບການແຂ່ງຂັນຮັກຊາດ ແລະ ພັດທະນາ, ເຄື່ອນໄຫວປະຕິບັດພາລະບົດບາດໃນການປົກປ້ອງສິດຜົນປະໂຫຽດອັນຊອບທຳຂອງນັກຮົບເກົ່າ.
ກະຊວງປ້ອງກັນປະເທດ, ກະຊວງປ້ອງກັນຄວາມສະຫງົບ ແລະ ສະຫະພັນນັກຮົບເກົ່າ ຕ້ອງປະສານສົມທົບແໜ້ນນຳກັນ ເພື່ອຄຸ້ມຄອງ, ເບິ່ງແຍງດູແລ ແລະ ປະຕິບັດນະໂຍບາຍຕໍ່ນາຍ ແລະ ພົນທະຫານ, ນາຍ ແລະ ພົນຕຳຫຼວດທີ່ພັກຜ່ອນບຳນານ, ພະນັກງານ-ນັກຮົບຜູ້ເສຍອົງຄະຍ້ອນການສູ້ຮົບ ແລະ ຮັບໃຊ້ການສູ້ຮົບໃຫ້ນັບມຶ້ດີຂຶ້ນກວ່າເກົ່າ.
ຄໍາເຫັນ