 |
ການລົງເຄື່ອນໄຫວຢ້ຽມຢາມຄັ້ງນີ້, ຄະນະທ່ານຮອງນາຍົກ ໄດ້ຮັບຟັງການລາຍງານສະພາບລວມ, ວິໃສທັດ ແລະ ແຜນການພັດທະນາຂອງບໍລິສັດ. ຊຶ່ງບໍລິສັດ ຝຸ່ນໂປຕາສ ອາຊີ-ໂປຕາສ ສາກົນ ລາວ ແມ່ນໄດ້ຍຶດຖືຮູບແບບການພັດທະນາ ຫັນເປັນອຸດສາຫະກຳ, ຕົວເມືອງ, ກະສິກຳທັນສະໄໝ ແລະ ຫັນບຸກຄະລາກອນເປັນທ້ອງຖິ່ນ, ເປັນ 4 ທິດການພັດທະນາທີ່ປະສານກົມກຽວກັນ, ບົນພື້ນຖານການພັດທະນາທຸລະກິດຫຼັກຝຸ່ນໂປຕາສ ໃຫ້ເຕີບໃຫຍ່ເຂັ້ມແຂງ, ບໍລິສັດຍັງໄດ້ພັດທະນາໂຄງການ “ນິຄົມອຸດສາຫະກຳ ອາຊີ-ໂປຕາສ” ເພື່ອດຶງດູດເອົາ ທຶນຕ່າງປະເທດ ຄຸນນະພາບສູງເຂົ້າມາລົງທຶນ, ຖືເອົາການຫັນເປັນອຸດສາຫະກຳເປັນຫົວຈັກຂັບເຄື່ອນຊ່ວຍຍູ້ແຮງການພັດທະນາເສດຖະກິດຂອງລາວ. ມາຮອດປະຈຸບັນ, ບໍລິສັດໄດ້ລົງທຶນຢູ່ລາວຫຼາຍຕື້ໂດລາສະຫະລັດ, ມອບພັນທະພາສີ-ອາກອນໃຫ້ລັດຖະບານລາວ ຫຼາຍຮ້ອຍລ້ານໂດລາ, ສ້າງວຽກເຮັດງານທໍາໃຫ້ທ້ອງຖິ່ນຈໍານວນຫຼາຍ ພ້ອມທັງໄດ້ປະກອບສ່ວນພັດທະນາພື້ນຖານໂຄງລ່າງ ເພື່ອເຮັດໃຫ້ຊີວິດການເປັນຢູ່ຂອງປະຊາຊົນໃນເຂດອ້ອມຂ້າງໂຄງການນັບມື້ໄດ້ຮັບການປັບປຸງດີຂຶ້ນ.
 |
ໂອກາດນີ້, ທ່ານ ພົອ ຈັນສະໝອນ ຈັນຍາລາດ ໄດ້ມີຄໍາເຫັນ ຊຶ່ງທ່ານໄດ້ຊົມເຊີຍຕໍ່ຜົນງານ ແລະ ຜົນສໍາເລັດຂອງບໍລິສັດໃນໄລຍະຜ່ານມາ ຊຶ່ງເປັນການປະກອບສ່ວນອັນສໍາຄັນເຂົ້າໃນການພັດທະນາເສດຖະກິດ-ສັງຄົມ ໃຫ້ແກ່ທ້ອງຖິ່ນ ກໍຄືລັດຖະບານຂອງ ສປປ ລາວ, ສິ່ງສໍາຄັນເເມ່ນການປະກອບສ່ວນໃນການສ້າງວຽກເຮັດງານທໍາຂອງພໍ່ແມ່ປະຊາຊົນ. ການລົງທຶນຂອງ ບໍລິສັດ ຢູ່ໃນ ສປປ ລາວ ຍັງເປັນການຮັດແໜ້ນຄວາມສາມັກຄີຮັກແພງ ລະຫວ່າງ ສອງຊາດ ລາວ-ຈີນ ຕາມ 1 ແລວທາງ 1 ເສັ້ນທາງ.
(ຂ່າວ-ພາບ: ກອງຄໍາ)
ຄໍາເຫັນ