ຄົບຮອບ 50 ປີທັງເປັນການສ້າງຂະບວນການຕ້ອນຮັບວັນສ້າງຕັ້ງແນວລາວສ້າງຊາດ ຄົບຮອບ 75 ປີ (13 ສິງຫາ 1950-13 ສິງຫາ 2025) ທ່ານນາງ ອິນລາວັນ ແກ້ວບຸນພັນ ກຳມະການສູນກາງພັກຮອງປະທານສູນກາງແນວລາວສ້າງຊາດ (ສນຊ) ໄດ້ນໍາພາກົມໂຄສະນາ ສນຊເຄື່ອນໄຫວຢ້ຽມຢາມທັດສະນະສຶກສາສາລາກະວີບ້ານນາ ງົວ ແລະ ກວຽນຢູ່ບ້ານໝາກໜາວໃຕ້ ເມືອງປາກງື່ມ ນະຄອນຫຼວງວຽງຈັນ ໂດຍໄດ້ຮັບການຕ້ອນຮັບຈາກທ່ານ ທອງໃບ ໂພທິສານ ກຳມະການ ສນຊຄະນະທີ່ປຶກສາວຽກງານຂົນຂວາຍປະຊາຊົນ ສນຊປະທານສະມາຄົມນັກປະພັນລາວ ແລະ ເປັນເຈົ້າຂອງສາລາກະວີບ້ານນາ ງົວ ແລະ ກວຽນ ແລະ ໄດ້ທ່ຽວຊົມການວາງສະແດງຮູບພາບ, ປຶ້ມປະເພດຕ່າງໆຂອງສາລາກະວີບ້ານນາ ງົວ ແລະ ກວຽນ.
ທ່ານ ທອງໃບ ໂພທິສານ ໄດ້ໃຫ້ຮູ້ວ່າ:“ສາລາກະວີບ້ານນາ ງົວ ແລະ ກວຽນ” ແມ່ນໄດ້ໃສ່ຕາມບົດປະພັນວັນນະຄະດີ ບົດກະວີທີ່ທ່ານໄດ້ຮັບລາງວັນວັນນະກຳສ້າງສັນດີເດັ່ນ “ງົວ ແລະ ກວຽນ” ຫຼືຊີໄຣ(SEA.Write) ຊຶ່ງບົດກະວີດັ່ງກ່າວໄດ້ສ່ອງແສງເຖິງວິຖີການດຳລົງຊີວິດແບບຊົນນະບົດ, ແບບຊາວໄຮ່-ນາ, ການປູກ-ການລ້ຽງ ແລະ ການຕໍ່າຫູກ-ທໍໄໝໃນເມື່ອກ່ອນ; ການສ້າງ “ສາລາກະວີບ້ານນາ ງົວ ແລະ ກວຽນ” ແມ່ນເປັນການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XI ຂອງແນວລາວສ້າງຊາດ ເປັນຕົ້ນແມ່ນ 4 ການເສີມສ້າງຂອງວຽກງານແນວລາວສ້າງຊາດ. ດັ່ງນັ້ນ, ປີ 2021 ຈຶ່ງໄດ້ເລີ່ມສ້າງສາລາກະວີບ້ານນາ ງົວ ແລະ ກວຽນ ຮອດເດືອນພະຈິກປີ 2024 ຈຶ່ງສຳເລັດ ແລະ ເປີດນໍາໃຊ້ເປັນທາງການໂດຍໄດ້ເກັບກຳ, ທ້ອນໂຮມເອົາບັນດາຜົນງານບົດປະເພດຕ່າງ, ຮູບພາບ ແລະ ປະຫວັດການເຄື່ອນໄຫວຂອງນັກປະພັນ-ນັກກະວີທີ່ມີຊື່ສຽງຂອງສປປ ລາວມາຮວມກັນຢູ່ສາລາແຫ່ງນີ້ໄວ້ເປັນທີ່ລະນຶກ. ນອກຈາກນັ້ນ, ຍັງມີການວາງສະແດງຮູບພາບວິຖີການດຳລົງຊີວິດຂອງປະຊາຊົນລາວບັນດາເຜົ່າໃນເມື່ອກ່ອນທີ່ຫາເບິ່ງໄດ້ຍາກໃນປັດຈຸບັນ ເນື່ອງຈາກວິຖີຊີວິດໃນປັດຈຸບັນຂອງປະເທດເຮົາໄດ້ມີການພັດທະນາ ແລະ ໄດ້ປ່ຽນໄປຕາມການເວລາ. ພ້ອມນີ້, ຍັງເປັນບ່ອນສຶກສາຮ່ຳຮຽນຂອງນັກຂີດ-ຂຽນ, ນັກສຶກສາ, ນັກຮຽນ ແລະ ພໍ່ແມ່ປະຊາຊົນຜູ້ທີ່ມີຄວາມສົນໃຈຢາກມາສຶກສາຄົ້ນຄວ້າ; ເປັນບ່ອນເຕົ້າໂຮມບັນດານັກປະພັນ-ນັກກະວີມາພົບປະສ້າງສັນແລກປ່ຽນບົດຮຽນປະສົບການຊຶ່ງກັນ ແລະ ກັນ.
ທ່ານ ທອງໃບ ໂພທິສານ ຍັງໃຫ້ຮູ້ອີກວ່າ: ສຳລັບທິດທາງແຜນການໃນຕໍ່ໜ້າ ຈະສືບຕໍ່ເປີດເປັນປົກກະຕິ, ໂຄສະນາໃຫ້ສັງຄົມຮັບຮູ້ຢ່າງກວ້າງຂວາງກວ່າເກົ່າ, ສືບຕໍ່ຈັດຝຶກອົບຮົມຍົກລະດັບການຂີດຂຽນບົດປະເພດຕ່າງໆ, ພ້ອມທັງມີການແຂ່ງຂັນຂຽນໃຫ້ຊາວໜຸ່ມ-ເຍົາວະຊົນ ແລະ ສືບຕໍ່ປັບປຸງຫ້ອງວາງສະແດງປຶ້ມປະເພດຕ່າງໆໃຫ້ມີຄວາມທັນສະໄໝ, ເປັນລະບຽບ ແລະ ງົດງາມກວ່າເກົ່າ.ໃນປີ 2025 ນີ້, ເປັນວັນສະເຫຼີມສະຫຼອງ 3 ວັນປະຫວັດສາດ ແລະ ວັນສ້າງຕັ້ງແນວລາວສ້າງຊາດ ຄົບຮອບ 75 ປີ, ໃນນາມເປັນກຳມະການ ສນຊ ແລະ ປະທານສະມາຄົມນັກປະພັນລາວຈະສືບຕໍ່ປະກອບສ່ວນສ້າງຂະບວນການແຂ່ງຂັນຂຽນບົດ, ຂຽນກະວີປະເພດຕ່າງໆຕາມທີ່ຕົນເອງໄດ້ຮັບການມອບໝາຍໃຫ້ມີຂະບວນການຟົດຟື້ນ.
ຂ່າວ: ເຢ, ພາບ: ໄຊວ່າງ
ຄໍາເຫັນ