ຮອງປະທານສນຊ ພົບປະຄະນະຄົນເຊື້ອຊາດລາວຢູ່ຕ່າງປະເທດ

ໃນວັນທີ 5 ກຸມພານີ້ທີ່ສູນກາງແນວລາວສ້າງຊາດ(ສນຊ), ທ່ານ ຈັນເພັງ ສຸດທິວົງ ຮອງປະທານສນຊ ໄດ້ຕ້ອນຮັບການເຂົ້າພົບປະຢ້ຽມຢາມຂອງຄະນະສະມາຄົມກິລາເຕະບານ ຂອງພີ່ນ້ອງຄົນເຊື້ອຊາດລາວຢູ່ປະເທດອາເມຣິກາ ນຳພາໂດຍທ່ານນາງ ຖາວອນ ຊະນະຂຸນເພັດ ຕົວແທນຄະນະບໍລິຫານງານທີມເຕະບານລາວ-ອາເມຣິກາ ພ້ອມດ້ວຍຄະນະນັກກິລາຂອງພີ່ນ້ອງຄົນເຊື້ອຊາດລາວຢູ່ປະເທດອາເມຣິກາ.
ໂອກາດນີ້, ທ່ານຮອງປະທານສນຊ ໄດ້ສະແດງຄວາມຍິນດີຕ້ອນຮັບອັນອົບອຸ່ນຕໍ່ຄະນະທີ່ໄດ້ມາຢ້ຽມຢາມ ສປປ ລາວ ໃນຄັ້ງນີ້. ທ່ານໄດ້ຍົກໃຫ້ເຫັນສະພາບລວມການສ້າງສາພັດທະນາປະເທດຊາດ, ຍົກໃຫ້ເຫັນພາລະບົດບາດສິດ ແລະ ໜ້າທີ່ຂອງອົງການແນວລາວສ້າງຊາດ; ແຜນພັດທະນາອົງການແນວລາວສ້າງຊາດແຕ່ປີ 2021-2026 ໂດຍສະເພາະແຜນງານ ແລະ ກິດຈະກຳທີ່ຕິດພັນກັບວຽກງານຄົນເຊື້ອຊາດລາວປະຈຳຢູ່ຕ່າງປະເທດໃຫ້ຄະນະຮັບຊາບ. ພ້ອມກັນນັ້ນທ່ານໄດ້ຮຽກຮ້ອງໃຫ້ພີ່ນ້ອງຄົນເຊື້ອຊາດລາວ ຈົ່ງສືບຕໍ່ສຶກສາອົບຮົມໃຫ້ລູກຫຼານທີ່ດຳລົງຊີວິດຢູ່ຕ່າງປະເທດ ຈົ່ງຮັກສາວັດທະນະທຳ-ຮີດຄອງປະເພນີອັນດີງາມຂອງຊາດ, ນຳພາລູກຫຼານມາຢ້ຽມຢາມ, ທ່ອງທ່ຽວ ແລະດຳເນີນກິດຈະກຳຕ່າງໆຢູ່ ສປປ ລາວ ເພື່ອເປັນການປະກອບສ່ວນເຂົ້າໃນການສ້າງສາປະເທດຊາດ.
ທ່ານນາງ ຖາວອນ ຊະນະຂຸນເພັດ ໄດ້ກ່າວສະແດງຄວາມຂອບໃຈເປັນຢ່າງຍິ່ງຕໍ່ທ່ານຮອງປະທານສນຊທີ່ໄດ້ຕ້ອນຮັບຢ່າງອົບອຸ່ນ ແລະ ໄດ້ລາຍງານຈຸດປະສົງການມາຢ້ຽມຢາມ  ແລະ ເຮັດວຽກຢູ່ ສປປ ລາວໃນຄັ້ງນີ້ ໃຫ້ ທ່ານຈັນເພັງ ສຸດທິວົງ  ໄດ້ຮັບຊາບ. ພ້ອມກັນນັ້ນ, ຄະນະພີ່ນ້ອງຄົນເຊື້ອຊາດລາວຍັງໄດ້ໄປທັດສະນະສຶກສາ ແລະ ທ່ຽວຊົມຫໍມູນເຊື້ອແນວລາວສ້າງຊາດຕື່ມອີກ.
ຂ່າວ-ພາບ: ເຢ