ກອງບັນຊາການປ້ອງກັນຄວາມສະຫງົບ (ປກສ) ເມືອງຫົງສາ ແຂວງໄຊຍະບູລີ ໄດ້ຈັດກອງປະຊຸມສະຫຼຸບການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສດຕິດປີ 2021-2023 ຂຶ້ນເມື່ອບໍ່ດົນມານີ້ ທີ່ກອງບັນຊາການດັ່ງກ່າວ ໂດຍການເປັນປະທານຂອງ ທ່ານ ຄຳຫຼ້າ ຜີວວັນນາ ເຈົ້າເມືີອງຫົງສາ ປະທານປ້ອງກັນຊາດ (ປກຊ) - ປ້ອງກັນຄວາມສະຫງົບ (ປກສ) ເມືີອງ, ມີທ່ານ ພັອ ຄໍາສິນ ຜີວວັນນາ ຫົວໜ້າຫ້ອງການເມືີອງ ກອງບັນຊາການ ປກສ ແຂວງ, ທ່ານ ພັທ ທອງໄຫຼ ເພັດດາວົງ ຫົວໜ້າກອງບັນຊາການ ປກສ ເມືອງ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
ທ່ານ ພັທ ທອງໄຫຼ ເພັດດາວົງ ໄດ້ຂຶ້ນຜ່ານບົດສະຫຼຸບການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ (ໄລຍະປີ 2021-2023) ວ່າ: ຕະຫຼອດໄລຍະຜ່ານມາ, ຄະນະພັກ-ຄະນະບັນຊາໄດ້ເອົາໃຈໃສ່ເປັນພິເສດໃນການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສດຕິດ ໂດຍຈັດຕັ້ງປະຕິບັດຕາມ 6 ວຽກຈຸດສຸມຂອງວາລະແຫ່ງຊາດ ຊຶ່ງໄດ້ກຳນົດພື້ີນທີ່, ຈຸດຫຼໍ່ແຫຼມທີ່ມີຄວາມສ່ຽງພົວພັນຢາເສບຕິດມີ 8 ຈຸດ, ກວມເອົາ 7 ບ້ານ ແລະ 1 ໂຄງການ. ໄດ້ຂຶ້ນບັນຊີເປົ້າໝາຍພົວພັນຢາເສບຕິດທັງໝົດ 873 ຄົນ ຍິງ 70 ຄົນ. ໃນນີ້ເປົ້າໝາຍຄ້າຂາຍມີ 86 ຄົນ ຍິງ 28 ຄົນ (ແກ້ໄຂແລ້ວ 71 ຄົນ ຍິງ 21 ຄົນ, ຍັງບໍ່ທັນແກ້ໄຂ 15 ຄົນ ຍິງ 7 ຄົນ). ເປົ້າໝາຍເສບຢາມີ 787 ຄົນ ຍິງ 42 ຄົນ (ແກ້ໄຂແລ້ວ 626 ຄົນ ຍິງ 38 ຄົນ). ປັດຈຸບັນເປົ້າໝາຍທີ່ເສບຍັງບໍ່ທັນໄດ້ແກ້ໄຂຈຳນວນ 161 ຄົນ ຍິງ 6 ຄົນ. ນອກນັ້ນ, ເຈົ້າໜ້າທີ່ຍັງສາມາດແກ້ໄຂມ້າງລາຍຄະດີຢາເສບຕິດໄດ້ 67 ລາຍ, ກັກຕົວຜູ້ຖືີກຫາ 81 ຄົນ ຍິງ 19 ຄົນ. ຢຶດຂອງກາງປະເພດຢາບ້າຈໍານວນ 20.689.655 ເມັດ, ຢາໄອຈຳນວນ 543 ຫໍ່ນໍ້າໜັກ 565,5 ກິໂລກຣາມ, ໃບກະທ່ອມຈຳນວນ 2,2 ກິໂລກຣາມ, ຢາສູບໄຟຟ້າ 8 ອັນ, ລົດໃຫຍ່ 7 ຄັນ, ລົດຈັກ 5 ຄັນ, ໂທລະສັບມືີຖືີ 24 ເຄື່ີອງ, ປືີນສັ້ນ 1 ກະບອກ ພ້ອມລູກປືີນ 15 ລູກ, ເງິນກີບ 10.488.000 ກີບ, ເງິນບາດ 5.500 ບາດ ແລະ ວັດຖຸຂອງກາງອຶ່ີນໆຈຳນວນໜຶ່ງ (ສ່ວນຂອງກາງ ແລະ ຜູ້ກະທຳຜິດແມ່ນໄດ້ນຳສົ່ງກອງບັນຊາການ ປກສ ແຂວງສຳເລັດ).
ໃນໂອກາດນີ້, ທ່ານປະທານກອງປະຊຸມ ໄດ້ຮຽກຮ້ອງໃຫ້ທຸກພາກສ່ວນຈົ່ງສືບຕໍ່ຮັບປະກັນສະຖຽນລະພາບທາງດ້ານການເມືອງ, ເປັນຫຼັກແຫຼ່ງໃນການຈັດຕັ້ງປະຕິບັດວຽກງານ ປກຊ-ປກສ ທົ່ວປວງຊົນຮອບດ້ານ ຫັນກຳລັງລົງກໍ່ສ້າງຮາກຖານການເມືອງພັດທະນາຊົນນະບົດຮອບດ້ານ ຕິດພັນກັບວຽກງານ 3 ສ້າງຂອງພັກເດັດດ່ຽວສະກັດກັ້ນທຸກກົນອຸບາຍຫັນປ່ຽນໂດຍສັນຕິຂອງອິດທິກຳລັງປໍລະປັກ, ທັບມ້າງໜໍ່ແໜງທີ່ກໍ່ໃຫ້ເກີດຄວາມບໍ່ສະຫງົບ, ສືບຕໍ່ປະຕິບັດ 2 ວາລະແຫ່ງຊາດຂອງພັກ ແລະ ລັດຖະບານໃຫ້ເຂັ້ມງວດ. ສືບຕໍ່ປະຕິບັດແນວທາງປ່ຽນແປງໃໝ່ຂອງພັກ, ປະຕິບັດໜ້າທີ່ການເມືອງຂອງຕົນໃຫ້ມີໝາກຜົນດີກວ່າເກົ່າ, ສ້າງ ແລະ ປັບ ປຸງກົມກອງໄປຕາມທິດສ້າງກົມກອງມີແບບແຜນທັນສະໄໝເທື່ອລະກ້າວ, ເຊີດຊູສະຕິລະວັງຕົວ ແລະ ມີສະຕິໃນການປົກປັກຮັກສາແນວທາງນະໂຍບາຍຂອງພັກ-ລັດ, ສືບຕໍ່ປົກປັກຮັກສາ ແລະ ເສີມຂະຫຍາຍມູນເຊື້ອອັນດີງາມຂອງຕົນ, ຕັ້ງໜ້າປັບປຸງກຳລັງໃນທຸກດ້ານໃຫ້ໜັກແໜ້ນ ແລະ ເຂັ້ມແຂງແນໃສ່ແກ້ໄຂບັນຫາຢາເສບຕິດຢູ່ພາຍໃນເມືອງໃຫ້ນັບມື້ຫຼຸດໜ້ອຍຖອຍລົງເທື່ອລະກ້າວ.
ຂ່າວ-ພາບ: ກິດຕິສັກ ບົວໄລ
ຄໍາເຫັນ