ຫົວໜ້າຄະນະຈັດຕັ້ງສູນກາງພັກເນັ້ນຫຼາຍບັນຫາໃຫ້ແຂວງບໍລິຄໍາໄຊເອົາໃຈໃສ່

ການສະເຫຼີມສະຫຼອງວັນສ້າງຕັ້ງແຂວງບໍລິຄໍາໄຊຄົບຮອບ 40 ປີ(6 ມີນາ 1984-6 ມີນາ 2024)ຈັດຂຶ້ນເມື່ອບໍ່ດົນມານີ້ ພາຍໃຕ້ຄໍາຂວັນທີ່ວ່າ:“ເພີ່ມທະວີບົດບາດການນໍາພາຂອງພັກ, ເສີມຂະຫຍາຍມູນເຊື້ອສາມັກຄີ, ສ້າງການຫັນປ່ຽນສູ່ການພັດທະນາທີ່ເຂັ້ມແຂງ ແລະ ຍືນຍົງ”ແລະ ປະຕິບັດວິໄສທັດຮອດປີ2030 ທີ່ວ່າ:“ສ້າງແຂວງບໍລິຄໍາໄຊເປັນປະຕູເສດຖະກິດ, ແຫຼ່ງຜະລິດພະລັງງານ, ບໍລິການທາງຜ່ານ ແລະ ຄຸ້ມຄອງສິ່ງແວດລ້ອມແບບຍືນຍົງ”.
ໃນໂອກາດເຂົ້າຮ່ວມພິທີດັ່ງກ່າວ,ສະຫາຍ ນາງສີໃສລືເດດມູນສອນກົມການເມືອງສູນກາງພັກຄະນະເລຂາທິການສູນກາງພັກຫົວໜ້າຄະນະຈັດຕັ້ງສູນກາງພັກໄດ້ເນັ້ນໃຫ້ການນໍາແຂວງບໍລິຄໍາໄຊເອົາໃຈໃສ່ບາງບັນຫາດັ່ງນີ້:
1.    ເພີ່ມທະວີການສຶກສາອົບຮົມການເມືອງ-ແນວຄິດ ໃຫ້ສະມາຊິກພັກ-ພະນັກງານ, ທະຫານ, ຕໍາຫຼວດ ແລະ ປະຊາຊົນບັນດາເຜົ່າທຸກຊັ້ນຄົນ ໃຫ້ຮັບຮູ້ເຂົ້າໃຈເຖິງຜົນງານທີ່ເປັນມູນເຊື້ອການນໍາພາ-ຊີ້ນໍາຂອງພັກ ໃນພາລະກິດປົກປັກຮັກສາ ແລະ ກໍ່ສ້າງລະບອບປະຊາທິປະໄຕ ປະຊາຊົນ ຕາມຈຸດໝາຍສັງຄົມນິຍົມ, ພ້ອມກັນສືບສານມູນເຊື້ອອັນພິລະອາດຫານ 40ປີເຂົ້າໃນພາລະກິດການປົກປັກຮັກສາ ແລະ ສ້າງສາພັດທະນາແຂວງ ໃຫ້ໄດ້ຮັບການພັດທະນາໃນທຸກດ້ານຕາມຄໍາຂວັນທີ່ກໍານົດໄວ້ວ່າ: “ເພີ່ມທະວີບົດບາດການນໍາພາຂອງພັກ, ເສີມຂະຫຍາຍມູນເຊື້ອສາມັກຄີ, ສ້າງການຫັນປ່ຽນສູ່ການພັດທະນາທີ່ເຂັ້ມແຂງ ແລະ ຍືນຍົງ”.
2.    ສືບຕໍ່ຄົ້ນຄວ້າກຳແໜ້ນບັນດາແນວທາງ, ແຜນນະໂຍບາຍຂອງພັກວາງອອກ ໂດຍສະເພາະແມ່ນ ມະຕິກອງປະຊຸມໃຫຍ່ຄັ້ງທີXIຂອງພັກ ແລະ ແຜນພັດທະນາເສດຖະກິດ-ສັງຄົມແຫ່ງລັດ 5ປີ ຄັ້ງທີIX ເວົ້າລວມ, ເວົ້າສະເພາະ ມະຕິກອງປະຊຸມໃຫຍ່ຄັ້ງທີVIlຂອງອົງຄະນະພັກແຂວງ ແລະ ແຜນພັດທະນາເສດຖະກິດ-ສັງຄົມ 5ປີ ຄັ້ງທີV ຂອງແຂວງບໍລິຄໍາໄຊໃຫ້ເລິກເຊິ່ງເຖິງຖອງໃນໄລຍະທ້າຍສະໄໝເປັນຕົ້ນບັນດາຄາດໝາຍໃນແຕ່ລະຂົງເຂດວຽກງານທີ່ກໍານົດໃນແຜນພັດທະນາເສດຖະກິດ-ສັງຄົມຂອງແຂວງທີ່ຍັງບໍ່ທັນບັນລຸຕາມຄາດໝາຍ.
3.    ສືບຕໍ່ຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງແຂວງໃນຊຸມປີທີ່ຍັງເຫຼືອຮອດທ້າຍສະໄໝ,ຄວນຖອດຖອນບົດຮຽນວ່າອັນໃດຄວນຍູ້ແຮງສົ່ງເສີມຕື່ມ, ຄວນແກ້ໄຂອັນໃດ?; ເອົາໃຈໃສ່ຂຸດຄົ້ນທ່າແຮງບົ່ມຊ້ອນພາຍໃນແຂວງ, ດຶງດູດການລົງທຶນຈາກພາຍໃນ ແລະຕ່າງປະເທດ ໂດຍມີການອຳນວຍຄວາມສະດວກ,ຄຸ້ມຄອງໃຫ້ໄປຕາມກົດໝາຍ ແລະລະບຽບການ; ໃນນັ້ນ, ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມໃຫ້ຕິດພັນກັບການປະຕິບັດສອງວາລະແຫ່ງຊາດ ໂດຍສະເພາະບັນດາວຽກຈຸດສຸມຕ່າງໆ, ລົງເລິກຊອກຫາສາເຫດຄວາມຫຍຸ້ງຍາກ ເພື່ອຄົ້ນຄວ້າວິທີການ ແລະມາດຕະການແກ້ໄຂບັນດາຂໍ້ຄົງຄ້າງ, ສິ່ງທີ່ຍັງບໍ່ສາມາດປະຕິບັດໃຫ້ບັນລຸຕາມຄາດໝາຍ; ຕ້ອງເອກະພາບສູງ ແລະໄປລວງດຽວກັບທິດທີ່ສູນກາງພັກ, ລັດຖະບານວາງອອກ, ບໍ່ລັ່ງເລທໍ້ຖອຍ, ຕ້ອງເດັດດ່ຽວເຮັດແທ້ທຳຈິງ, ຕ້ອງຖືເອົາວຽກງານດັ່ງກ່າວ ເປັນບັ້ນຮົບສຳຄັນ, ຕ້ອງຍົກສູງຄວາມຮັບຜິດຊອບ ແລະຄວາມສາມາດ ຂອງຄະນະພັກແຕ່ລະຂັ້ນ ໃນການນຳພາ-ຊີ້ນໍາ ຈັດຕັ້ງປະຕິບັດໃຫ້ເຂົ້າສູ່ຕົວຈິງຢ່າງແຂງແຮງ, ເຮັດໃຫ້ມີການຫັນປ່ຽນທີ່ເປັນຮູບປະທໍາແທ້, ຕ້ອງເຮັດໃຫ້ການຈັດຕັ້ງປະຕິບັດວາລະແຫ່ງຊາດ ກາຍເປັນພັນທະໜ້າທີ່ ແລະ ເປັນຄວາມຮັບຜິດຊອບຂອງທົ່ວລະບົບການເມືອງ ແລະ ຂອງໝົດທຸກພາກສ່ວນໃນສັງຄົມຢ່າງແທ້ຈິງ.
4.    ສືບຕໍ່ຍູ້ແຮງການລົງທຶນ ທັງພາຍໃນ ແລະ ຕ່າງປະເທດ ເພື່ອຂະຫຍາຍແຫຼ່ງລາຍຮັບໃຫ້ຫຼາຍກວ່າເກົ່າ; ໄປຄຽງຄູ່ກັບເງື່ອນໄຂສະດວກຫຼາຍດ້ານຂອງແຂວງ ຕ້ອງມີນະໂຍບາຍທີ່ເອື້ອອໍານວຍຄວາມສະດວກຕໍ່ການລົງທຶນ ແລະ ການໄປ-ມາ, ຄ້າ-ຂາຍໃຫ້ຫຼາຍ ດ້ວຍການກຳນົດນະໂຍບາຍທີ່ສອດຄ່ອງກັບສະພາບຈຸດພິເສດ, ທ່າແຮງ ຂອງແຂວງແຕ່ຮັບປະກັນການປະຕິບັດຕາມກົດໝາຍແລະນິຕິກໍາໃຕ້ກົດໝາຍໄປຄຽງຄູ່ກັບການຊຸກຍູ້ສົ່ງເສີມການທ່ອງທ່ຽວທີ່ມີທ່າແຮງແລະມີຊື່ສຽງຂອງແຂວງໃຫ້ກາຍເປັນຂະແໜງການສົ່ງອອກກັບທີ່ທີ່ແຂງແຮງກວ່າເກົ່າ,ປະກອບສ່ວນສໍາຄັນເຂົ້າໃນບັນຍາກາດທີ່ກໍານົດເອົາປີ 2024 ເປັນປີທ່ອງທ່ຽວລາວ.ພ້ອມດຽວກັນໃຫ້ສືບຕໍ່ຍູ້ແຮງການຜະລິດສິນຄ້າທີ່ເປັນທ່າແຮງ ເພື່ອທົດແທນການນໍາເຂົ້າ ແລະສົ່ງເສີມການສົ່ງອອກໃຫ້ຫຼາຍ. ເພື່ອຮັບປະກັນຄາດໝາຍທີ່ກ່າວມາຂ້າງເທິງ ທຸກພາກສ່ວນທີ່ກ່ຽວຂ້ອງຕ້ອງອໍານວຍຄວາມສະດວກແທ້ໆ, ຫຼີກເວັ້ນການສ້າງຄວາມຫຍຸ້ງຍາກລຳຄານໃຫ້ຜູ້ປະກອບການ, ປະຊາຊົນ ຫຼືພໍ່ຄ້າ-ຊາວຂາຍໃນການຜະລິດ ແລະ ຈາລະຈອນສິນຄ້າ ເປັນຕົ້ນ: ບັນດາຂອດການເກັບພາສີ, ອາກອນ, ຄ່າທໍານຽມ, ຄ່າຂົນສົ່ງ ແລະ ຄ່າໃຊ້ຈ່າຍໃນການອະນຸມັດຕ່າງໆ ຄວນກໍານົດໃຫ້ໂປ່ງໃສ ແລະໃຫ້ເໝາະສົມແທ້, ໃຫ້ຖືເອົາການບໍລິການໃຫ້ຄວາມສະດວກ ຫຼາຍກວ່າການຄຸ້ມຄອງຈໍາກັດຮັດແຄບ ແຕ່ຕ້ອງຮັບປະກັນຜົນປະໂຫຍດຂອງຊາດ ແລະປະຊາຊົນເປັນຫຼັກ.
5.    ສືບຕໍ່ຢຶດໝັ້ນໃນທິດນໍາກ່ຽວກັບການພັດທະນາແບບກົມກຽວແລະຍືນຍົງລະຫວ່າງການພັດທະນາເສດຖະກິດກັບການພັດທະນາວັດທະນະທໍາ-ສັງຄົມລະຫວ່າງຄວາມຈະເລີນແລະຄວາມຢູ່ດີກິນດີທາງດ້ານວັດຖຸກັບການສ້າງຄວາມສີວິໄລ ຫຼືອາລິຍະທໍາທາງດ້ານຈິດໃຈ,ແນໃສ່ບັນລຸເປົ້າໝາຍເຮັດໃຫ້ປະຊາຊົນແຂວງມີເງື່ອນໄຂໄດ້ຮັບການພັດທະນາໃນທຸກດ້ານ, ເປັນພົນລະເມືອງທີ່ດີຂອງຊາດແລະເຂົ້າຮ່ວມຢ່າງຕັ້ງໜ້າໃນພາລະກິດປົກປັກຮັກສາແລະພັດທະນາແຂວງ ໃຫ້ບັນລຸຕາມວິໄສທັດທີ່ກໍານົດໄວ້ວ່າ:“ສ້າງແຂວງບໍລິຄໍາໄຊເປັນປະຕູເສດຖະກິດ, ແຫຼ່ງຜະລິດພະລັງງານ, ບໍລິການທາງຜ່ານ ແລະ ຄຸ້ມຄອງສິ່ງແວດລ້ອມແບບຍືນຍົງ”.
6.    ສືບຕໍ່ເຜີຍແຜ່, ເຊື່ອມຊຶມແລະຜັນຂະຫຍາຍຜົນສຳເລັດ 40ປີການສ້າງຕັ້ງແຂວງບໍລິຄຳໄຊໃຫ້ທົ່ວເຖິງທຸກເປົ້າໝາຍ, ຮອດຮາກຖານ, ເອົາໃຈໃສ່ປັບປຸງລະບົບອຳນາດລັດແຕ່ແຂວງລົງຮອດຮາກຖານໃຫ້ໂປ່ງໃສ, ໜັກແໜ້ນ, ເຂັ້ມແຂງ, ເຂັ້ມງວດໃນການເຄົາລົບແລະປະຕິບັດຖືກຕ້ອງຕາມກົດໝາຍແລະລະບຽບການຕ່າງໆທີ່ວາງອອກ, ຫັນເຂົ້າສູ່ການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມດ້ວຍກົດໝາຍໃຫ້ເຂັ້ມງວດຂຶ້ນເລື້ອຍໆ, ຍົກສູງຈິດໃຈຮັບໃຊ້ປະຊາຊົນຕາມມູນເຊື້ອຂອງພັກ. ພ້ອມກັນນັ້ນ, ນໍາພາຊຸກຍູ້ແລະສ້າງເງື່ອນໄຂໃຫ້ແນວລາວສ້າງຊາດ, ສະຫະພັນນັກຮົບເກົ່າແລະບັນດາອົງການຈັດຕັ້ງມະຫາຊົນທຸກຂັ້ນເຂົ້າຮ່ວມໃນການຈັດຕັ້ງເຜີຍແຜ່, ເຊື່ອມຊຶມແລະຜັນຂະຫຍາຍຜົນສຳເລັດ 40ປີການສ້າງຕັ້ງແຂວງຕາມສິດ, ໜ້າທີ່ແລະຄວາມຮັບຜິດຊອບຂອງແຕ່ລະອົງການໃຫ້ມີຊີວິດຊີວາແລະແຂງແຮງກວ່າເກົ່າ, ສ້າງສະມາຊິກອົງການ ໃຫ້ເປັນແບບຢ່າງນຳໜ້າໃນການປະຕິບັດແນວທາງຂອງພັກແລະກົດໝາຍຂອງລັດ.
7.    ສືບຕໍ່ການກະກຽມດໍາເນີນກອງປະຊຸມໃຫຍ່ 3ຂັ້ນຂອງພັກ ດ້ວຍການກໍາແໜ້ນບາດກ້າວ,ຂັ້ນຕອນ, ວິທີການຈັດຕັ້ງປະຕິບັດແຕ່ລະວຽກໃຫ້ລະອຽດບົນພື້ນຖານນັ້ນຕ້ອງສ້າງຄວາມເປັນເອກະພາບສູງພາຍໃນຄະນະພັກແຕ່ລະຂັ້ນໃນການຈັດຕັ້ງປະຕິບັດໂດຍສະເພາະໃຫ້ກໍາແໜ້ນເນື້ອໃນ ຄໍາສັ່ງຂອງຄະນະເລຂາທິການສູນກາງພັກ ເລກທີ 411/ຄລສພ ແລະ ຄໍາແນະນໍາຂອງຄະນະຈັດຕັ້ງສູນກາງພັກ ເລກທີ 211/ຄຈສພ ວ່າດ້ວຍການກະກຽມ ແລະ ດໍາເນີນກອງປະຊຸມໃຫຍ່ 3 ຂັ້ນ ຂອງພັກ. 
(ຂ່າວ: ແສງຈັນ)