ຫສນຍ ຈັດສຳມະນາ ສ້າງຄວາມເຂັ້ມແຂງໃນການສ້າງນິຕິກຳໃຕ້ກົດໝາຍ

ໃນວັນທີ 8 ກຸມພານີ້ທີ່ແຂວງຫຼວງພະບາງ, ຫ້ອງວ່າການສໍານັກງານນາຍົກລັດຖະມົນຕີ (ຫສນຍ) ໄດ້ຈັດກອງປະຊຸມສຳມະນາ ສ້າງຄວາມເຂັ້ມແຂງ ໃນການສ້າງນິຕິກຳໃຕ້ກົດໝາຍ ໃຫ້ບັນດາ 8 ແຂວງພາກເໜືອ,ພາຍໃຕ້ການເປັນປະທານຮ່ວມຂອງ ທ່ານ ນາງ ທິບພະກອນ ຈັນທະວົງສາ ຮອງລັດຖະມົນຕີ ຮອງຫົວໜ້າ ຫສນຍ ແລະທ່ານ ບຸນເລື່ອມ ມະນີວົງຮອງເຈົ້າແຂວງຫຼວງພະບາງ; ມີບັນດາທ່ານຮອງເຈົ້າແຂວງ, ເລຂາທິການສະພາປະຊາຊົນບັນດາແຂວງພາກເໜືອ ພ້ອມດ້ວຍພະນັກງານ ຈາກຂະແໜງການກ່ຽວຂ້ອງ ຂັ້ນສູນກາງ ແລະ ບັນດາແຂວງພາກເໜືອ ເຂົ້າຮ່ວມ 200 ກວ່າທ່ານ.
ກອງປະຊຸມຄັ້ງນີ້, ຈະດຳເນີນແຕ່ວັນທີ 8-9 ກຸມພາ 2024 ໂດຍຈັດຂຶ້ນ ເພື່ອຍົກລະດັບຄວາມຮູ້ຄວາມສາມາດ ໃຫ້ຜູ້ທີ່ເຮັດວຽກງານການສ້າງນິຕິກຳໃຕ້ກົດໝາຍ ຂັ້ນສູນກາງ ແລະ ທ້ອງຖິ່ນ ສາມາດດຳເນີນຖືກຕ້ອງ ແລະ ສອດຄ່ອງຕາມຫຼັກການ, ລະບຽບການ ແລະ ຂັ້ນຕອນໃນການສ້າງ ແລະ ປັບປຸງນິຕິກໍາ, ແນໃສ່ເຮັດໃຫ້ການສ້າງ ແລະ ປັບປຸງນິຕິກຳ ມີປະສິດທິພາບ, ປະສິດທິຜົນ, ມີຜົນສຳເລັດຕາມແຜນການທີ່ກຳນົດໄວ້ ໃນແຕ່ລະໄລຍະ, ທັງເປັນບ່ອນອີງທີ່ສໍາຄັນ ໃຫ້ແກ່ບັນດາກະຊວງ, ອົງການຂັ້ນສູນກາງ ແລະ ທ້ອງຖິ່ນ ໂດຍສະເພາະ ກະຊວງຍຸຕິທໍາ,ກຳມາທິການກົດໝາຍ ສະພາແຫ່ງຊາດ, ຫສນຍ, ສະພາປະຊາຊົນແຂວງ ແລະ ພາກສ່ວນກ່ຽວຂ້ອງ ທີ່ມີຄວາມຮັບຜິດຊອບ ແລະ ມີສ່ວນຮ່ວມ ໃນການສ້າງ ແລະ ປັບປຸງນິຕິກຳ ແຕ່ລະຂັ້ນ, ຄຽງຄູ່ກັນນັ້ນ ກໍເພື່ອສືບຕໍ່ສ້າງຄວາມເຂັ້ມແຂງດ້ານວິຊາການ ໃຫ້ຂັ້ນສູນກາງ ແລະ ທ້ອງຖິ່ນ.
ສໍາລັບເນື້ອໃນຂອງກອງປະຊຸມຄັ້ງນີ້, ຜູ້ເຂົ້າຮ່ວມ ຈະໄດ້ຮັບຟັງການລາຍງານ 7 ເອກະສານສໍາຄັນ ຄື: 1) ການສ້າງຕິນິກຳ ຢູ່ຂັ້ນທ້ອງຖິ່ນ; 2) ຂັ້ນຕອນ ແລະ ວິທີການສົ່ງຮ່າງກົດໝາຍໃຫ້ສະພາປະຊາຊົນ ຂັ້ນແຂວງ ໄປປຶກສາຫາລືກັບປະຊາຊົນ; 3) ການເປັນເສນາທິການໃຫ້ລັດຖະບານ ຂອງ ຫສນຍ ໃນການສ້າງ ແລະ ປັບປຸງນິຕິກຳ; 4) ຜັນຂະຫຍາຍ ສັນຍາສາກົນ ເປັນນິຕິກຳ ຢູ່ຂັ້ນທ້ອງຖິ່ນ; 5) ການໂຄສະນາເຜີຍແຜ່ນິຕິກໍາ; 6) ການຕິດຕາມກວດກາ ການຈັດຕັ້ງປະຕິບັດນິຕິກຳຢູ່ສະພາປະຊາຊົນ ຂັ້ນແຂວງ; 7) ການພິຈາລະນາຮັບຮອງເອົານິຕິກໍາຂອງທ້ອງຖິ່ນ. ນອກນັ້ນ, ຍັງຈະໄດ້ແລກປ່ຽນຄຳຄິດເຫັນກ່ຽວກັບຜົນສຳເລັດ, ຂໍ້ຈຳກັດ, ສິ່ງທ້າທ້າຍ ແລະ ໂອກາດ ໃນຂະບວນການສ້າງນິຕິກຳ ເພື່ອເປັນຂໍ້ມູນນຳໄປປັບປຸງຄຸນນະພາບຂອງນິຕິກຳ ໃຫ້ສາມາດຈັດຕັ້ງປະຕິບັດໄດ້ຢ່າງມີປະສິດທິພາບ ແລະ ປະສິດທິຜົນ. 
ໃນໂອກາດກ່າວເປີດ, ຄະນະປະທານກອງປະຊຸມ ໄດ້ຮຽກຮ້ອງມາຍັງຜູ້ເຂົ້າຮ່ວມ ຈົ່ງພ້ອມກັນເອົາໃຈໃສ່ຕິດຕາມດ້ວຍຄວາມເປັນເຈົ້າການ ແລະ ຮັບຜິດຊອບສູງ, ພ້ອມກັນປະກອບຄຳເຫັນຢ່າງມີຈຸດສຸມ, ນຳສະເໜີວິທີແກ້ໄຂທີ່ເໝາະສົມ, ສອດຄ່ອງກັບສະພາບຕົວຈິງ ຢ່າງກົງໄປກົງມາ, ບໍ່ແກ່ຍາວເວລາ, ລົງເລິກປະກອບຄຳເຫັນ ຕໍ່ການແກ້ໄຂບັນຫາທີ່ເກີດຂຶ້ນ ໃນປັດຈຸບັນ ແລະ ສິ່ງທ້າທາຍໃນຕໍ່ໜ້າ. ພາຍຫຼັງສຳເລັດກອງປະຊຸມສຳມະນາໃນຄັ້ງນີ້ ຈະໄດ້ນຳເອົາບົດຮຽນໄປຜັນຂະຫຍາຍ ໃຫ້ເກີດໝາກຜົນເປັນຮູບປະທຳຕົວຈິງ.
(ພາບ-ຂ່າວ: ກົມປະຊາສຳພັນ ຫສນຍ)