ດັ່ງນັ້ນ, ມາຮອດຕອນແລງວັນທີ 3 ຕຸລາຜ່ານມາ ໄດ້ປິດລົງດ້ວຍຜົນສໍາເລັດອັນຈົບງາມ ຮັກສາໄດ້ຮີດຄອງປະເພນີລາວ ໂດຍເປັນກຽດເຂົ້າຮ່ວມຂອງທ່ານ ຄໍາພັນ ສິດທິດໍາພາ ເຈົ້າແຂວງວຽງຈັນ, ມີຮອງເຈົ້າແຂວງ,ບັນດາຄະນະກໍາມະການຈັດງານຂັ້ນແຂວງ, ຂັ້ນເມືອງ, ເຈົ້າເມືອງ 11 ເມືອງ, ມີບັນດາບໍລິສັດ, ນັກທຸລະກິດ, ຜູ້ໃຫ້ການສະໜັບສະໜູນ, ຄະນະນໍາເຮືອຊ່ວງ, ນັກກິລາ, ແຂກຖືກເຊີນ ພ້ອມດ້ວຍປະຊາຊົນອ້ອມຂ້າງພາຍໃນແຂວງເຂົ້າຮ່ວມ.
ທ່ານນາງ ວົງເດືອນ ວັດຕະໂສ ເຈົ້າເມືອງທຸລະຄົມ ປະທານຈັດງານບຸນຊ່ວງເຮືອປະເພນີປະຈຳປີ 2024ກ່າວວ່າ: ການຈັດງານໃນຄັ້ງນີ້ເພື່ອອະນຸລັກຮັກສາມູນເຊື້ອວັດທະນະທຳ, ຮີດຄອງປະເພນີອັນດີງາມ ເພື່ອເພີ່ມພູນຄູນສ້າງມໍລະດົກທາງດ້ານວັດທະນະທຳ ແມ່ນໜຶ່ງໃນຮີດ 12ຄອງ 14, ແມ່ນຮີດຄອງປະເພນີອັນດີງາມຂອງທ້ອງຖິ່ນ, ຂອງຊາວລ້ອງງື່ມ ກໍຄືຊາດລາວເຮົາ ທີ່ໄດ້ສືບສານຕໍານານຕາມຮອຍບັນພະບູລຸດສືບທອດກັນມາແຕ່ບູຮານນະການ, ຮຸ່ນຄົນນີ້ຕໍ່ຮຸ່ນຄົນໃໝ່ຕິດຕໍ່ກັນມາເຖິງປັດຈຸບັນ; ການແຂ່ງຂັນຊ່ວງເຮືອປະເພນີ ແມ່ນເປັນກິລາທາງໜ້ານໍ້າປະເພດໜຶ່ງ ຈັດຂຶ້ນເພື່ອຄອບໄຂວ່ບູຊາເຈົ້າຖິ່ນເຈົ້າຖານ, ເຈົ້າແມ່ນໍ້າວັງປາ ສະແດງຄວາມຮູ້ບຸນຄຸນຕໍ່ນໍ້າ, ແມ່ນໍ້າທີ່ໄດ້ໃຫ້ຄຸນປະໂຫຍດຢ່າງຫຼວງຫຼາຍຕໍ່ການດໍາລົງຊີວິດຂອງຄົນເຮົາ ເປັນຕົ້ນການຄົມມະນາຄົມ, ການຫາປາ, ການສະໜອງນໍ້າເຂົ້າສູ່ການຜະລິດ, ການຊົມໃຊ້ໃນຄົວເຮືອນແຕ່ລະວັນ, ການຜະລິດກະແສໄຟຟ້າ ແລະ ອື່ນໆ ຖ້າຂາດນໍ້າແມ່ນຂາດຊີວິດ.
ງານບຸນຊ່ວງເຮືອປະເພນີຍັງເປັນການກະຕຸກຊຸກຍູ້ການຜະລິດແກ້ໄຂຊີວິດການເປັນຢູ່, ແກ້ໄຂຂໍ້ຫຍຸ້ງຍາກເສດຖະກິດ-ການເງິນ, ສ້າງລາຍໄດ້ທາງກົງ-ທາງອ້ອມໃຫ້ແກ່ພີ່ນ້ອງປະຊາຊົນ, ເປັນການຊົມເຊີຍຜົນງານ ການເກັບກູ້ຜົນຜະລິດລະດູຝົນ ຕິດພັນກັບການວາງສະແດງ, ແລກປ່ຽນສິນຄ້າ, ຂາຍຜະລິດຕະພັນກະສິກຳ-ຫັດຖະກຳທີ່ຜະລິດໄດ້ຜ່ານມາ, ເປັນການປຸກລະດົມຂະບວນການຢ່າງແຂງແຮງ, ສ້າງໃຫ້ມີຫຼາຍກິດຈະກຳເພື່ອດຶງດູດ, ໂຄສະນາ ແລະ ຮອງຮັບໃຫ້ແກ່ການເປີດປີທ່ອງທ່ຽວ 2024 ແລະອື່ນໆ.ພາຍໃນງານມີຕະຫຼາດນັດວາງສະແດງ-ຂາຍສິນຄ້າປະເພດຕ່າງໆ ເປັນຕົ້ນສິນຄ້າໂອດັອບຈາກ 11 ເມືອງ, ບູດວາງສະແດງ ແລະ ບໍລິການຂອງທະນາຄານ, ລັດວິສາຫະກິດ, ຫົວໜ່ວຍທຸລະກິດ, ເຄື່ອງອຸປະໂພກ-ບໍລິໂພກ, ອາຫານການກິນ, ມີການເສບຄົບງັນດ້ວຍວົງດົນຕີ, ຟ້ອນລາຍງ້າວຂອງບ້ານປາກກະຍຸງ, ສິລະປະ-ວັນນະຄະດີຂອງນັກຮຽນ ເພື່ອເປັນສີສັນໃຫ້ແກ່ງານ.
ສໍາລັບການແຂ່ງຂັນຊ່ວງເຮືອປະເພນີໃນປີນີ້, ມີເຮືອກິລາຊາຍ 12 ສີພາຍເຂົ້າຮ່ວມແຂ່ງຂັນ40 ລໍາ,ເຮືອປະເພນີຊາຍ55 ສີພາຍມີ 17 ລໍາ.ຜ່ານການແຂ່ງຂັນຊ່ວງເຮືອປະເພນີຊາຍ 55 ສີພາຍ ຊະນະເລີດ (ທີ 1) ເຮືອບ້ານເກິນກາງ ໄດ້ຮັບເງິນລາງວັນ 50 ລ້ານກີບ ພ້ອມຂັນເງິນລາງວັນ 1 ໜ່ວຍ; ທີ 2 ເຮືອບ້ານຫາດສວນໄດ້ຮັບເງິນລາງວັນ 40 ລ້ານກີບ ພ້ອມຂັນເງິນລາງວັນ 1 ໜ່ວຍ; ທີ 3 ເຮືອບ້ານຕານປ່ຽວ ໄດ້ຮັບເງິນລາງວັນ 30 ລ້ານກີບ ພ້ອມຂັນເງິນລາງວັນ 1 ໜ່ວຍ; ທີ 4 ເຮືອບ້ານແຈ້ງໄດ້ຮັບເງິນລາງວັນ 20 ລ້ານກີບ ພ້ອມຂັນເງິນລາງວັນ 1 ໜ່ວຍ. ສໍາລັບເຮືອກິລາຊາຍ 12 ສີພາຍ ທີ 1 ເຮືອ ອະພິມາ-ຊັນນີ່ແອັດແຊັດ ເມືອງວັງວຽງໄດ້ຮັບເງິນລາງວັນ 30 ລ້ານກີບພ້ອມຂັນເງິນລາງວັນ 1 ໜ່ວຍ ແລະ ຂັນໂລ້ລາງວັນ (ຂັນກິລາ) 1 ໜ່ວຍ; ທີ 2 ເຮືອແຟມີລີ 1-ຮ້ານຂາຍຄໍາ LK ໄດ້ຮັບເງິນລາງວັນ 20 ລ້ານກີບ ພ້ອມຂັນໂລ້ລາງວັນ 1 ໜ່ວຍ; ທີ 3 ເຮືອ PNM ທິດານ້ອຍ 888 ໄດ້ຮັບເງິນລາງວັນ 15 ລ້ານກີບ ພ້ອມຂັນໂລ້ລາງວັນ 1 ໜ່ວຍ; ທີ 4 ເຮືອກຸຫຼາບແດງ-ສຸກພອນໄຊໄດ້ຮັບເງິນລາງວັນ 10 ລ້ານກີບ ພ້ອມຂັນໂລ້ລາງວັນ 1 ໜ່ວຍ. ໃນນັ້ນ, ຍັງມີລາງວັນເຮືອງາມ, ເຮືອໄຟຕື່ມອີກ. ເປັນກຽດມອບລາງວັນຊ່ວງເຮືອໃນຄັ້ງນີ້ໂດຍມີທ່ານເຈົ້າແຂວງວຽງຈັນ, ມີຮອງເຈົ້າແຂວງ, ເຈົ້າເມືອງຕາມລໍາດັບ.
ຂ່າວ-ພາບ: ວັນເພັງ
ຄໍາເຫັນ