ຫວຽດນາມ ຈັດສັນການຈັດຕັ້ງກົງຈັກລະບົບການເມືອງຢ່າງມີປະສິດທິພາບ

ທ່ານ ໂຕເລີມ ເລຂາທິການໃຫຍ່ຄະນະບໍລິຫານງານສູນກາງພັກກອມມູນິດ ຫວຽດນາມຫົວໜ້າຄະນະຊີ້ນຳສູນກາງ ໄດ້ເປັນປະທານກອງປະຊຸມຄັ້ງທຳອິດຂອງຄະນະຊີ້ນຳສູນກາງກ່ຽວກັບການສະຫຼຸບການຜັນຂະຫຍາຍມະຕິເລກທີ 18 ຂອງຄະນະບໍລິຫານງານສູນກາງພັກຊຸດທີ 12 ກ່ຽວກັບຫຼາຍບັນຫາສືບຕໍ່ປ່ຽນແປງໃໝ່ ແລະ ຈັດສັນການຈັດຕັ້ງກົງຈັກລະບົບການເມືອງໃຫ້ກະທັດຮັດ ແລະ ເຄື່ອນໄຫວຢ່າງມີປະສິດທິພາບ.

ຂ່າວລະບຸວ່າ: ທ່ານ ໂຕເລີມ ກ່າວຄຳເຫັນວ່າ: ການປ່ຽນແປງໃໝ່ຈັດສັນການຈັດຕັ້ງກົງຈັກລະບົບການເມືອງໃຫ້ກະທັດຮັດ, ເຂັ້ມແຂງ, ແທດຈິງ ແລະ ມີປະສິດທິຜົນແມ່ນຄວາມຮຽກຮ້ອງຕ້ອງການອັນຮີບດ່ວນຂອງສະພາບການໃນປັດຈຸບັນ; ນີ້ແມ່ນວຽກງານສຳຄັນພິເສດທີ່ໄດ້ຮັບຄວາມສົນໃຈຈາກປະຊາຊົນ. ທ່ານເລຂາທິການໃຫຍ່ກ່າວວ່າ: ຫວ່າງມໍ່ໆມານີ້, ກົມການເມືອງໄດ້ເຫັນດີເປັນເອກະພາບກັນໂດຍການຕັດສິນໃຈທາງດ້ານການເມືອງຢ່າງແຂງແຮງເພື່ອປະຕິບັດແຜນນະໂຍບາຍສະຫຼຸບມະຕິ 18 ໃນທົ່ວລະບົບການເມືອງເພື່ອເປັນພື້ນຖານວາງນະໂຍບາຍຊີ້ຂາດປ່ຽນແປງໃໝ່ໃນການຈັດສັນການຈັດຕັ້ງກົງຈັກລະບົບການເມືອງໃຫ້ກະທັດຮັດ ມີປະສິດທິຜົນຕອບສະໜອງຄວາມຮຽກຮ້ອງຕ້ອງການ ການພັດທະນາຂອງປະເທດໃນໄລຍະໃໝ່.