ພິທີສະເຫຼີມສະຫຼອງ ວັນໄຊຊະນະບັ້ນຮົບດຽນບຽນຝູ້ ຄົບຮອບ 70 ປີ (07/05/1954-07/05/2024) ໄດ້ຈັດຂຶ້ນຢ່າງຍິ່ງໃຫຍ່ ໃນວັນທີ 7 ພຶດສະພານີ້ ທີ່ ແຂວງດຽນບຽນຝູ້ ສສ ຫວຽດນາມ ໃຫ້ກຽດເຂົ້າຮ່ວມມີ ສະຫາຍ ຟ້າມ ມິງຈິງ ກໍາມະການກົມການເມືອງສູນກາງພັກ ນາຍົກລັດຖະມົນຕີ ແຫ່ງ ສສ ຫວຽດນາມ, ມີຄະນະຜູ້ແທນຈາກ ສປປ ລາວ ນຳໂດຍ ສະຫາຍ ພົນເອກ ຈັນສະໝອນ ຈັນຍາລາດ ກໍາມະການກົມການເມືອງສູນກາງພັກ ຮອງນາຍົກລັດຖະມົນຕີ ລັດຖະມົນຕີກະຊວງປ້ອງກັນປະເທດ, ມີຄະນະຜູ້ແທນຂັ້ນສູງຈາກກຳປູເຈຍ, ມີອະດີດການນໍາພັກ, ລັດ, ແນວໂຮມປະເທດຊາດຫວຽດນາມ, ນັກຮົບປະຕິວັດ, ພະນັກງງານອະວຸໂສບຳນານ ແລະ ພາກສ່ວນກ່ຽວຂ້ອງ ເຂົ້າຮ່ວມ.
ສະຫາຍ ຟ້າມ ມິງຈິງ ໄດ້ກ່າວເປີດພິທີຢ່າງເປັນທາງການ ໂດຍໄດ້ຍົກໃຫ້ເຫັນມູນເຊື້ອແຫ່ງການຕໍ່ສູ້ອັນພິລະອາດຫານຂອງນັກຮົບວິລະຊົນ ຫວຽດນາມ ໃນບັ້ນຮົບດຽນບຽນຝູ້ ຊຶ່ງວັນໄຊສະນະດຽນບຽນຝູ້ ໄດ້ຢັ້ງຢືນເຖິງຄວາມກ້າຫານ, ຄວາມສໍານິຊຳນານ, ການນຳພາອັນສະຫຼາດສ່ອງໃສຂອງພັກກອມມູນິດຫວຽດນາມ ນໍາໂດຍ ປະທານ ໂຮ່ຈິມິນ ຜູ້ນໍາທີ່ແສນເຄົາລົບຮັກຂອງປະຊາຊົນຫຽດນາມ, ພ້ອມທັງ ສະແດງໃຫ້ເຫັນເຖິງຄວາມເຂັ້ມແຂງຂອງ ກອງທັບປະຊາຊົນຫວຽດນາມ ແລະ ກຳລັງແຮງແຫ່ງຄວາມສາມັກຄີອັນຍິ່ງໃຫຍ່ ຂອງປະຊາຊົນຫວຽດນາມ ແລະ ການປະກອບສ່ວນຢ່າງຈິງໃຈຈາກ ສປ ຈີນ, ອະດີດສະຫະພາບໂຊຫວຽດ, ບັນດາປະເທດສັງຄົມນິຍົມ ແລະ ບັນດາປະເທດເພື່ອນມິດ ທີ່ຮັກຫອມສັນຕິພາບທົ່ວໂລກ, ພິເສດ ແມ່ນ ສປປ ລາວ ແລະ ກຳປູເຈຍ ທີ່ຄຽງບ່າຄຽງໄຫຼ່ຕໍ່ສູ້ຈົນໄດ້ຮັບໄຊຊະນະ ຊຶ່ງໄຊຊະນະດຽນບຽນຝູ້ ໄດ້ທຳລາຍແຜນການ ນາວາ ຢ່າງສິ້ນເຊີງ, ເປັນໄຊຊະນະອັນໃຫຍ່ຫຼວງຂອງນ້ຳໃຈສາມັກຄີ, ມິດຕະພາບຂອງ 3 ປະເທດອິນດູຈີນ ຫວຽດນາມ-ລາວ-ກຳປູເຈຍ ຊຶ່ວ ປະທານ ໂຮ່ຈິມິນ ຢືນຢັນວ່າ: “ໄຊຊະນະດຽນບຽນຝູ້ ແມ່ນຂີດໝາຍປະຫວັດສາດອັນສະຫງ່າງາມ”, ນັ້ນບໍ່ພຽງແຕ່ເປັນໄຊຊະນະອັນໃຫຍ່ຫຼວງ ສຳລັບປະຊາຊົນຂອງພວກເຮົາ, ແຕ່ຍັງເປັນໄຊຊະນະທົ່ວໄປຂອງປະຊາຊົນທີ່ຖືກກົດຂີ່ຂົ່ມເຫັງທັງໝົດໃນໂລກ. ໄຊຊະນະດັ່ງກ່າວ, ຍັງເປັນບ່ອນອີງທີ່ໜັກແໜ້ນ, ທັງເປັນແວ່ນແຍງ ທີ່ໃສແຈ້ງ ໃຫ້ແກ່ບັນດາປະຊາຊາດທີ່ຕົກເປັນຫົວເມືອງຂຶ້ນ ໄດ້ລຸກຂຶ້ນຕໍ່ສູ້ຕ້ານກັບການກົດຂີ່ຂູດຮີດ ແລະ ແອກຄອບຄອງເມືອງຂຶ້ນ ຢູ່ຫຼາຍບ່ອນໃນທົ່ວໂລກ, ປະກອບສ່ວນອັນສົມກຽດເຂົ້າໃນພາລະກິດຕໍ່ສູ້ອັນຍິ່ງໃຫຍ່ຂອງມວນມະນຸດ ທີ່ກ້າວໜ້າເພື່ອສັນຕິພາບ, ເອກະລາດ, ປະຊາທິປະໄຕ ແລະ ຄວາມກ້າວໜ້າ ຂອງສັງຄົມ.
ໃນວັນທີ 7 ພຶດສະພາ 1954 ທຸງຊາດກອງທັບປະຊາຊົນຫວຽດນາມ ໄດ້ປິວສະບັດຂຶ້ນ ເໜືອຂຸມຄອງ ເປັນສັນຍາລັກ ສະແດງໃຫ້ເຫັນວ່າ ບັ້ນຮົບດຽນບຽນຝູ້ ໄດ້ສິ້ນສຸດລົງ ດ້ວຍໄຊຊະນະອັນສະຫງ່າງາມ ແລະ ເປັນໄຊຊະນະ ທີ່ສົ່ງສຽງກ້ອງກັງວານໄປທົ່ວ 5 ທະວີບ, ສັ່ນສະເທືອນໄປທົ່ວໂລກ, ໄດ້ຮັບການບັນທຶກໃນປະຫວັດສາດຂອງຊົນຊາດ ໃນສະຕະວັດທີ 20, ມີຄວາມໝາຍອັນໃຫຍ່ຫຼວງ ສຳລັບ ຊາວຫວຽດນາມ ແລະ ປະຊາຊົນ ທີ່ຮັກຫອມສັນຕິພາບໃນໂລກ ໄດ້ບັງຄັບໃຫ້ ຈັກກະພັດລ່າເມືອງຂຶ້ນແບບເກົ່າ ລົງນາມໃນສົນທິສັນຍາ ທີ່ ນະຄອນເຈນີວາ ວ່າດ້ວຍການຢຸດຕິສົງຄາມ ແລະ ຟື້ນຟູສັນຕິພາບຢູ່ອິນດູຈີນ; ໄຊຊະນະດຽນບຽນຝູ້ ໄດ້ກາຍເປັນຄວາມເອກອ້າງທະນົງໃຈ ຂອງປະຊາຊົນຫວຽດນາມ ໃນພາລະກິດສ້າງສາພັດທະນາປະເທດຊາດ ຊົ່ວກາລະນານ, ມານະຈິດຂອງດຽນບຽນຝູ້ ຍັງໃສແຈ້ງ, ຍັງເປັນກຳລັງແຮງປຸກລະດົມອັນຍິ່ງໃຫຍ່ ຂອງປະຊາຊົນຫວຽດນາມ ໃນພາລະກິດປ່ຽນແປງໃໝ່ ແນໃສ່ປະຕິບັດຈຸດໝາຍ “ປະຊາຊົນຮັ່ງມີ, ປະເທດຊາດເຂັ້ມແຂງ, ສັງຄົມມີຄວາມສະເໝີພາບ, ປະຊາທິປະໄຕ, ສີວິໄລ”. ພ້ອມນີ້, ໄຊຊະນະດຽນບຽນຟູ ບໍ່ພຽງແຕ່ແມ່ນໄຊຊະນະ ຂອງປະຊາຊົນຫວຽດນາມ ແຕ່ຍັງແມ່ນໄຊຊະນະຂອງປະຊາຊົນລາວ ແລະ ປະຊາຊົນກຳປູເຈຍ ທີ່ໄດ້ຮ່ວມສຳພັນສູ້ຮົບ, ຮ່ວມຂຸມຄອງຕ້ານກັບສັດຕູໂຕດຽວກັນ ເພື່ອປົດປ່ອຍຕົນເອງ.
ໃນໂອກາດດຽວກັນ, ສະຫາຍ ຟ້າມ ມິງຈິງ ໄດ້ຕາງໜ້າໃຫ້ຄະນະບໍລິຫານງານສູນກາງພັກກອມມູນິດຫວຽດນາມ, ປະທານປະເທດ ແລະ ລັດຖະບານ ປະດັບຫຼຽນໄຊອິດສະຫຼະ ຊັ້ນ 1 ໃຫ້ແກ່ ອົງຄະນະພັກ ອໍານາດການປົກຄອງ ແລະ ປະຊາຊົນ ດຽນບຽນຝູ້ ຕື່ມອີກ.
ຂ່າວ-ພາບ: ຂປລ
ຄໍາເຫັນ