ຫວຽດນາມ ສ້າງແຜນນະໂຍບາຍໂຮມສາມແຂວງເລິມດົ່ງ, ບິ່ງທ້ວນ, ດັກນົງ ເຂົ້າກັນນະໂຍບາຍໃຫຍ່
ວິທະຍຸກະຈາຍສຽງຫວຽດນາມລາຍງານວ່າ: ໃນວັນທີ 9 ມິຖຸນາ ຜ່ານມາ ຢູ່ແຂວງເລິມດົ່ງ, ທ່ານ ໂຕເລິມເລຂາທິການໃຫຍ່ ພັກກອມມູນິດ ຫວຽດນາມ ໄດ້ເປັນປະທານການເຮັດວຽກກັບຄະນະປະຈຳຄະນະພັກແຂວງເລິມດົ່ງ ແລະ ຄະນະປະຈຳບັນດາຄະນະພັກແຂວງບິ່ງທ້ວນ ແລະ ດັກນົງ ກ່ຽວກັບສະພາບການປະຕິບັດບັນດາມະຕິ, ບົດສະຫຼຸບຂອງສູນກາງ, ການສັບຊ້ອນກົງຈັກການຈັດຕັ້ງຂອງ 3 ທ້ອງຖິ່ນຕິດພັນກັບການຈັດກອງປະຊຸມໃຫຍ່ອົງຄະນະພັກທຸກຂັ້ນ ກ້າວໄປເຖິງກອງປະຊຸມໃຫຍ່ຄັ້ງທີ XIV ຂອງພັກ, ວຽກງານປ້ອງກັນຊາດ, ປ້ອງກັນຄວາມສະຫງົບ, ການປະຕິບັດໜ້າທີ່ເຕີບໂຕເສດຖະກິດຢູ່ບັນດາທ້ອງຖິ່ນ ແລະ ວຽກງານຮັບປະກັນການຊ່ວຍເຫຼືອສັງຄົມ. ທ່ານ ໂຕເລິມ ຊີ້ແຈ້ງວ່າແຜນນະໂຍບາຍໂຮມສາມແຂວງເຂົ້າກັນ ເພື່ອສ້າງແຂວງເລິມດົ່ງ (ໃໝ່) ແມ່ນນະໂຍບາຍຊີ້ຂາດ, ທັງມີລັກສະນະຍຸດທະສາດ ແລະ ມີລັກສະນະທີ່ມີຄວາມເປັນໄປໄດ້ເພື່ອແນໃສ່ຍົກສູງປະສິດທິຜົນ, ປະສິດທິພາບໃນການຄຸ້ມຄອງ, ບໍລິຫານ, ຈັດສັນຄືນເຂດພັດະນາຕາມທິດເປີດກ້ວາງ, ມີຄວາມສະໜິດຕິດພັນ ແລະ ຍືນຍົງ.
ທ່ານ ໂຕເລິມ ສະເໜີວ່າ: ການໂຮມບັນດາອົງການ, ສຳນັກງານເຂົ້າກັນ ຕ້ອງດຳເນີນຢ່າງມີວິທະຍາສາດ, ໂປ່ງໃສ, ເປີດເຜີຍ, ມີພາວະວິໄສ. ຕ້ອງຖືຄຸນສົມບັດ, ຄວາມສາມາດ, ອິດທິພົນຊື່ສຽງ, ປະສິດທິຜົນໃນການເຮັດວຽກແມ່ນໄມ້ວັດສູງສຸດໃນການສັບຊ້ອນພະນັກງານ. ທຸກວຽກງານຕ້ອງປະຕິບັດບົນຈິດໃຈວັດທະນະທຳມະນຸດ, ມີຄວາມຮັບຜິດຊອບ, ມີຄວາມເຂົ້າໃຈ, ຖືກຕ້ອງຕາມການຂໍ້ກຳນົດ. ບັນດາຜູ້ທີ່ໄດ້ຮັບການມອບໝາຍໜ້າທີ່ໃໝ່ຕ້ອງໄດ້ຮັບເງື່ອນໄຂກ່ຽວກັບເຮືອນຢູ່, ໂຮງຮຽນໃຫ້ແກ່ລູກຫຼານ, ເງື່ອນໄຂດຳລົງຊີວິດທີ່ຈຳເປັນເພື່ອຄວາມອຸ່ນອ່ຽນໃຈປະຕິບັດວຽກງານ, ອຸທິດສ່ວນຍາວນານ.
ຄໍາເຫັນ