ທ່ານ ພຣາໂບໂວ ກ່າວໃນພິທີເປີດໂຄງການທີ່ຈັດຂຶ້ນຢູ່ໂຮງຮຽນປະຖົມSimah Par 5 ໃນເມືອງໂບໂກຣ ແຂວງຊະວາຕາເວັນຕົກຂອງອິນໂດເນເຊຍວ່າ:ໜຶ່ງໃນບັນດາມາດຕະການທີ່ສຳຄັນຂອງໂຄງການແມ່ນການຕິດຕັ້ງຈໍໂທລະພາບໃນໂຮງຮຽນທຸກແຫ່ງ ເພື່ອສະໜັບສະໜູນການຮຽນຜ່ານດີຈີຕອນ.
ທ່ານ ພຣາໂບໂວ ກ່າວຕື່ມວ່າ: ພວກເຮົາສາມາດສົ່ງບົດຮຽນທີ່ດີທີ່ສຸດໂດຍຜ່ານໂຄງການດັ່ງກ່າວ. ໂດຍສະເພາະແມ່ນການສະໜອງຜົນປະໂຫຍດໃຫ້ໂຮງຮຽນຢູ່ເຂດຫ່າງໄກສອກຫຼີກ, ເຂດດ້ອຍພັດທະນາແລະ ເຂດຫ່າງໄກຄວາມຈະເລີນ ລວມທັງໂຮງຮຽນຢູ່ເຂດຊົນນະບົດທີ່ປະສົບກັບສິ່ງທ້າທາຍຕ່າງໆ ໃນການເຂົ້າເຖິງຄູສອນ ຫື ເອກະສານປະກອບການສອນ ທີ່ມີຄຸນນະພາບ.
ນອກຈາກນັ້ນ, ໂຄງການນີ້ຄາດວ່າຈະເລີ່ມຕົ້ນໃນສອງສາມເດືອນຂ້າງໜ້າ. ໂດຍເປົ້າໝາຍແມ່ນຈະຕິດຕັ້ງຈໍດີຈີຕອນໃນທຸກໂຮງຮຽນທົ່ວປະເທດພາຍໃນກາງປີ 2026.
ທ່ານ ພຣາໂບໂວ ໄດ້ເນັ້ນຕື່ມວ່າ:ໂຄງການດັ່ງກ່າວຈະໃຫ້ການສະໜັບສະໜູນຄູສອນ ແລະ ນັກຮຽນທົ່ວປະເທດ, ໂດຍສະເພາະແມ່ນເຂດທີ່ຍັງຂາດຄູສອນທີ່ມີຄວາມຊຳນານແລະຫວັງເປັນຢ່າງຍິ່ງວ່າການສ້າງພື້ນຖານໂຄງລ່າງດີຈີຕອນສໍາລັບການສຶກສາຈະມີບົດບາດສໍາຄັນໃນການປູກຝັງຊັບພະຍາມະນຸດຮຸ່ນໃໝ່ທີ່ແຂ່ງແກ່ງ ແລະ ມີຄວາມສາມາດໃນການການແຂ່ງຂັນ.
ຄໍາເຫັນ