ທ່າເຮືອທ່ອງທ່ຽວແຫ່ງນີ້ຕັ້ງຢູ່ເຂດຕືກໂຈວ ກວມເອົາເນື້ອທີ່ 4.2 ເຮັກຕາ, ມີລະດັບນໍ້າເລິກ 3 ແມັດ ແລະ ສາມາດຮອງຮັບເຮືອບັນທຸກຜູ້ໂດຍສານ ຫຼື ນັກທ່ອງທ່ຽວໄດ້ເຖິງ 300 ຄົນ.
ທ່ານ ຮຸນມາເນັດ ນາຍົກລັດຖະມົນຕີກໍາປູເຈຍ ກ່າວຄໍາເຫັນໃນພິທີເປີດວ່າ:ທ່າເຮືອທ່ອງທ່ຽວດັ່ງກ່າວຈະມີບົດບາດສໍາຄັນໃນການດຶງດູດນັກທ່ອງທ່ຽວເຂົ້າມາທ່ຽວຊົມເຂດແຄມທະເລ ແລະ ໝູ່ເກາະນັບມື້ນັບຫຼາຍຂຶ້ນ. ພ້ອມທັງຈະກະຕຸ້ນຂະແໜງການທ່ອງທ່ຽວຂອງແຂວງກຳປອດ ຊຶ່ງມີບົດບາດສຳຄັນໃນການປັບປຸງເສດຖະກິດທ້ອງຖິ່ນ ແລະ ຊີວິດການເປັນຢູ່ຂອງປະຊາຊົນ, ທ່າເຮືອແຫ່ງນີ້ຍັງເຊື່ອມຕໍ່ນັກທ່ອງທ່ຽວທາງທະເລຈາກໄທ ແລະ ຫວຽດນາມ ອີກດ້ວຍ.
ທ່ານ ເພິງ ໂພເນຍ ລັດຖະມົນຕີກະຊວງໂຍທາທິການ ແລະ ຂົນສົ່ງຂອງກຳປູເຈຍ ກ່າວວ່າ:ການກໍ່ສ້າງທ່າເຮືອເລີ່ມຕົ້ນໃນເດືອນສິງຫາ ປີ 2018 ແລະ ສຳເລັດໃນເດືອນມິຖຸນາ 2022, ໂດຍໄດ້ຮັບສິນເຊື່ອ 10 ລ້ານໂດລາ ຈາກທະນາຄານພັດທະນາອາຊີແລະມາຮອດປັດຈຸບັນ, ກຳປູເຈຍມີທ່າເຮືອ 119 ແຫ່ງ ຊຶ່ງລວມທ່າເຮືອທະເລ 31 ແຫ່ງ ແລະ ທ່າເຮືອແມ່ນໍ້າ 88 ແຫ່ງ.
ກະຊວງທ່ອງທ່ຽວກຳປູເຈຍ ລະບຸວ່າ: ການທ່ອງທ່ຽວແມ່ນໜຶ່ງໃນສີ່ເສົາຄ້ຳທີ່ສະໜັບສະໜູນເສດຖະກິດຂອງກຳປູເຈຍ. ໂດຍຄາດວ່າຈະດຶງດູດນັກທ່ອງທ່ຽວຕ່າງປະເທດ 7.5 ລ້ານຄົນໃນປີ 2025, ເພີ່ມຂຶ້ນຈາກ 6.7 ລ້ານຄົນໃນປີ 2024.
ກຳປູເຈຍມີມໍລະດົກໂລກ 4 ແຫ່ງ, ໃນນັ້ນມີອຸທິຍານບູຮານຄະດີອັງກໍ ຫຼື ອັງກໍວັດ ໃນແຂວງສຽມຣຽບ,ຜາສາດສົມບູນໄພຣຄຸກ ໃນແຂວງກຳປົງທົມ, ລວມທັງ ຜາສາດພຣະວິຫານ ແລະ ບູຮານສະຖານເກາະແກຣ ໃນແຂວງພຣະວິຫານ ແລະ ມີຫາດຊາຍທະເລຍາວປະມານ 450 ກິໂລແມັດ ຜ່ານ 4 ແຂວງຕາເວັນຕົກສ່ຽງໃຕ້ ຄື: ສີໜຸວີລ, ກຳປອດ, ແກບ ແລະ ເກາະກົງ.
ຄໍາເຫັນ