ກຳປູເຈຍເຕືອນ ຢາສູບໄຟຟ້າຊິຊາ  ແລະ ຢາສູບອຸ່ນຮ້ອນ ເປັນອັນຕະລາຍຕໍ່ສຸຂະພາບ

ຂ່າວຕ່າງປະເທດລາຍງານ ເມື່ອບໍ່ດົນມານີ້, ກະຊວງສາທາລະນະສຸກຂອງກຳປູເຈຍໄດ້ອອກຖະແຫຼງການເຕືອນວ່າ: ຢາສູບໄຟຟ້າຊິຊາ  ຫຼື ບາຣາກຸ ແລະ ຜະລິດຕະພັນຢາສູບແບບອຸ່ນຮ້ອນ (HTP) ກໍ່ໃຫ້ເກີດຜົນກະທົບຮ້າຍແຮງຕໍ່ສຸຂະພາບຂອງຜູ້ໃຊ້ ພ້ອມທັງເຕືອນປະຊາຊົນ ໂດຍສະເພາະໄວໜຸ່ມໃຫ້ຫຼີກລ່ຽງຈາກການທົດລອງໃຊ້ຜະລິດຕະພັນເຫຼົ່ານີ້.
    ກະຊວງສາທາລະນະສຸກຂອງກຳປູເຈຍລະບຸວ່າ: ຢາສູບໄຟຟ້າຊິຊາ ແລະ HTP ສ່ວນຫຼາຍມັກຖືກອອກແບບມາຢ່າງສວຍງາມ ແລະ ອາດຈະດຶງດູດໃຈໄວໜຸ່ມ. ດັ່ງນັ້ນ, ຈຶ່ງຮຽກຮ້ອງໃຫ້ໄວໜຸ່ມທັງຫຼາຍບໍ່ຕ້ອງລອງໃຊ້ຜະລິດຕະພັນເຫຼົ່ານີ້ເດັດຂາດ ແລະ ບໍ່ຫຼົງເຊື່ອຄຳໂຄສະນາທີ່ອ້າງວ່າຢາສູບໄຟຟ້າຊິຊາ ແລະ HTP ເປັນເຄື່ອງມືຊ່ວຍໃຫ້ເຊົາສູບຢາ. ເຖິງແມ່ນວ່າກຳປູເຈຍຫ້າມນຳເຂົ້າ, ຄ້າຂາຍ ແລະ ໃຊ້ຢາສູບໄຟຟ້າຊິຊາ ແລະ HTP ຕັ້ງແຕ່ປີ 2014 ແຕ່ຍັງມີບາງພາກສ່ວນສວຍໂອກາດຈຳໜ່າຍຜະລິດຕະພັນເຫຼົ່ານີ້ໃນສື່ສັງຄົມອອນລາຍ ພ້ອມທັງໂຄສະນາເນື້ອໃນເກີນຈິງທີ່ອ້າງວ່າເປັນເຄື່ອງຊ່ວຍໃຫ້ເຊົາສູບຢາ ແລະ ປອດໄພກວ່າຢາສູບແບບດັ່ງເດີມ. ກະຊວງສາທາລະນະສຸກຂອງກຳປູເຈຍໄດ້ຊີ້ໃຫ້ເຫັນວ່າ: ຢາສູບໄຟຟ້າຊິຊາ ແລະ HTP ເປັນອັນຕະລາຍຕໍ່ສຸຂະພາບ ແລະ ສັງຄົມ ເນື່ອງຈາກມີສານນິໂຄຕິນໃນລະດັບສູງທີ່ອາດຈະສົ່ງຜົນຮ້າຍແຮງຕໍ່ສຸຂະພາບຫຼາຍກວ່າຢາສູບແບບດັ່ງເດີມ ແລະ ມີການໃຊ້ຮ່ວມກັບກັນຊາ ແລະ ຢາອື່ນໆ ສ່ວນຊິຊາກໍມີສານພິດໃນລະດັບສູງເຊັ່ນດຽວກັນ.
    ທັງນີ້, ກະຊວງສາທາລະນະສຸກກຳປູເຈຍກ່າວຕື່ມວ່າ: ຜະລິດຕະພັນເຫຼົ່ານີ້ອາດຈະກໍ່ໃຫ້ເກີດພະຍາດປອດອັກເສບ, ພະຍາດມະເຮັງປອດ, ພະຍາດຫົວໃຈ,ສ້າງຄວາມເສຍຫາຍຕໍ່ການພັດທະນາ ຂອງສະໝອງ, ການເກີດລູກກ່ອນກຳນົດ, ພາວະມີລູກຍາກ, ພະຍາດມະເຮັງກະເພາະອາຫານ ແລະ ພະຍາດມະເຮັງກະເພາະປັດສະວະ.