ການຈັດຕັ້ງປະຕິບັດນິຕິກໍາຂອງອົງການໄອຍະການປະຊາຊົນມີຜົນສໍາເລັດເປັນຢ່າງດີ

 ເມື່ອບໍ່ດົນມານີ້ ທີ່ນະຄອນຫຼວງວຽງຈັນວ່າ: ນັບແຕ່ປີ 2021 ເປັນຕົ້ນມາ ອົງການໄອຍະການປະຊາຊົນໄດ້ສ້າງບົດບັນທຶກຮ່ວມວ່າດ້ວຍກົນໄກປະສານງານ 12 ສະບັບ, ຂໍ້ຕົກລົງ, ຄໍາສັ່ງ, ຄໍາແນະນໍາ 84 ສະບັບລວມທັງໝົດ 96 ສະບັບ. ໃນນີ້, ມີນິຕິກໍາກ່ຽວກັບວຽກງານກວດກາທົ່ວໄປ 18 ສະບັບ, ວຽກງານຕິດຕາມກວດກາການດໍາເນີນຄະດີອາຍາ 23 ສະບັບ, ວຽກງານຕິດຕາມກວດກາການດໍາເນີນຄະດີແພ່ງ 4 ສະບັບ, ວຽກງານຕິດຕາມກວດກາຄ້າຍຄຸມຂັງ-ດັດສ້າງ 7 ສະບັບ, ວຽກງານຈັດຕັ້ງ-ພະນັກງານ 11 ສະບັບ, ວຽກງານກວດກາ 4 ສະບັບ, ວຽກງານການເງິນ 6 ສະບັບວຽກງານຫ້ອງການ 8 ສະບັບ ແລະ ວຽກງານຮ່ວມມືກັບຕ່າງປະເທດ 3 ສະບັບ.

ຜ່ານການຈັດຕັ້ງປະຕິບັດຕົວຈິງ ສາມາດປະເມີນຜົນວຽກງານດັ່ງກ່າວມີຜົນສໍາເລັດເປັນຢ່າງດີ ໂດຍສະເພາະການຈັດຕັ້ງປະຕິບັດນິຕິກໍາໄດ້ໂຄສະນາ, ເຜີຍແຜ່ບັນດານິຕິກຳດ້ວຍຫຼາຍວິທີ ແລະ ຮູບແບບ ເປັນຕົ້ນຈັດພິມປຶ້ມສັງລວມບັນດານິຕິກໍາ 2 ຄັ້ງຈໍານວນ 2,000 ຫົວ; ປາຖະກະຖາດ້ວຍຮູບແບບເຊິ່ງໜ້າ ແລະ ທາງໄກ, ຫັນລົງສູ່ຮາກຖານໂດຍຕິດພັນກັບການໂຄສະນາ, ເຜີຍແຜ່ ແລະ ເຊື່ອມຊຶມບັນດານິຕິກໍາດັ່ງກ່າວ; ລົງໜັງສືພິມ, ອອກລາຍການໂທລະພາບລາຍການກົດໝາຍເພື່ອປະຊາຊົນ, ລາຍການລັດ ແລະ ກົດໝາຍ, ເວັບໄຊ,ລົງວາລະສານໄອຍະການປະຊາຊົນໄດ້ 27 ສະບັບຈໍານວນ 27,000 ຫົວ ແລະ ອື່ນໆ; ໄດ້ຈັັດຊຸດຝຶກອົບຮົມ ແລະ ສໍາມະນາໃນຫົວຂໍ້ຕ່າງໆກ່ຽວກັບວຽກງານຕິດຕາມກວດກາທົ່ວໄປ 5 ຄັ້ງ, ວຽກງານກວດກາ 5 ຄັ້ງ ແລະ ວຽກງານຈັດຕັ້ງ-ພະນັກງານ, ວຽກງານການເງິນ, ງົບປະມານ, ວຽກງານຮ່ວມມືຍຸຕິທຳກັບຕ່າງປະເທດ ແລະ ຫົວຂໍ້ກົດໝາຍອື່ນໆທີ່ກ່ຽວຂ້ອງ; ໄດ້ສ້າງຫ້ອງໃຫ້ຄຳປຶກສາທາງດ້ານກົດໝາຍແກ່ປະຊາຊົນຢູ່ອົງການໄອຍະການປະຊາຊົນສູງສຸດ, 3 ພາກ ແລະ 5 ແຂວງຄື: ແຂວງອຸດົມໄຊ, ຫຼວງພະບາງ, ນະຄອນຫຼວງວຽງຈັນ, ຄຳມ່ວນ ແລະ ຈຳປາສັກ.

ທ່ານ ຄຳເພັດ ສົມວໍລະຈິດ ກ່າວຕື່ມວ່າ: ສໍາລັບວຽກງານຈຸດສຸມ ແລະ ທິດທາງແກ້ໄຂໃນຕໍ່ໜ້າຈະສືບຕໍ່ເພີ່ມທະວີການສຶກສາອົບຮົມການເມືອງ-ນໍາພາແນວຄິດໃນຖັນແຖວສະມາຊິກພັກ,ພະນັກງານ-ລັດຖະກອນຢ່າງມີຈຸດສຸມ ແນໃສ່ປັບປຸງຄຸນທາດການເມືອງ, ຍົກສູງຄວາມຮັບຜິດຊອບໃນການເຄື່ອນໄຫວວຽກງານ ແລະ ການປະຕິບັດນິຕິກຳທີ່ຕົນຮັບຜິດຊອບຢ່າງມີປະສິດທິຜົນ; ໂຄສະນາເຜີຍແຜ່ ແລະ ຍົກສູງສະຕິເຄົາລົບກົດໝາຍ, ການຜັນຂະຫຍາຍນິຕິກໍາເປັນອັນລະອຽດ, ການຝຶກອົບຮົມ, ການຍົກລະດັບຄວາມຮູ້-ຄວາມສາມາດຂອງພະນັກງານ-ລັດຖະກອນອົງການໄອຍະການປະຊາຊົນ;ເອົາໃຈໃສ່ປະຕິບັດນິຕິກຳອົງການໄອຍະການປະຊາຊົນໃຫ້ຖືກຕ້ອງ ແລະ ເປັນເອກະພາບໃນຂອບເຂດທົ່ວປະເທດ ແລະ ສັກສິດ; ປັບປຸງກົງຈັກການຈັດຕັ້ງເພື່ອໃຫ້ສອດຄ່ອງກັບກົດໝາຍວ່າດ້ວຍອົງການໄອຍະການປະຊາຊົນສະບັບປັບປຸງ ໂດຍສະເພາະຂະແໜງການ ຫຼືໜ່ວຍງານຕິດຕາມກວດກາທົ່ວໄປ, ຕິດຕາມກວດກາການດໍາເນີນຄະດີແພ່ງ ແລະ ຫ້ອງການອົງການໄອຍະການປະຊາຊົນເຂດປະຈໍາເມືອງທີ່ມີເງື່ອນໄຂເໝາະສົມ; ສ້າງ, ປັບປຸງກົດໝາຍ ແລະ ນິຕິກໍາໃຕ້ກົດໝາຍ ເປັນຕົ້ນສ້າງຮ່າງກົດໝາຍວ່າດ້ວຍພະນັກງານໄອຍະການປະຊາຊົນ, ປັບປຸງກົດໝາຍວ່າດ້ວຍການດໍາເນີນຄະດີອາຍາ,ລົບລ້າງ ຫຼື ໂຈະການຈັດຕັ້ງປະຕິບັດນິຕິກຳທີ່ບໍ່ສອດຄ່ອງ; ສືບຕໍ່ເພີ່ມທະວີການພັດທະນາບຸກຄະລາກອນໃຫ້ເປັນລະບົບແນໃສ່ປັບປຸງຄຸນທາດການເມືອງ, ຄຸນສົມບັດສິນທໍາປະຕິວັດ, ຍົກລະດັບຄວາມຮູ້, ຄວາມສາມາດທາງດ້ານວິຊາສະເພາະ; ຂະຫຍາຍຫ້ອງການໃຫ້ຄຳປຶກສາທາງດ້ານກົດໝາຍແກ່ປະຊາຊົນ ແລະ ສືບຕໍ່ຫັນລົງສູ່ທ້ອງຖິ່ນ ເພື່ອຕິດຕາມຊຸກຍູ້ການປະຕິບັດໜ້າທີ່ວຽກງານຢ່າງຮອບດ້ານຂອງອົງການໄອຍະການປະຊາຊົນທ້ອງຖິ່ນ; ປັບປຸງກົນໄກປະສານສົມທົບກັບພາກສ່ວນ ແລະ ກໍານົດເປັນແຜນການເຄື່ອນໄຫວການສ້າງນິຕິກໍາ, ການໂຄສະນາ, ການປະເມີນຜົນໄດ້ຮັບຕົວຈິງຢ່າງເປັນລະບົບ.