ຢູ່ທີ່ຫ້ອງປະຊຸມຂອງຄະນະບໍລິຫານງານຊາວໜຸ່ມແຂວງ, ເຂົ້າຮ່ວມມີສະຫາຍ ໜູໄຊ ນໍກີຢາ ກໍາມະການພັກແຂວງ ກໍາມະການສູນກາງ ຊປປລ ເລຂາຄະນະບໍລິຫານງານ ຊາວໜຸ່ມແຂວງໄຊຍະບູລີ ພ້ອມດ້ວຍຄະນະ, ມີບັນດາຊາວໜຸ່ມທີ່ຕາງໜ້າ ພະແນກການອ້ອມຂ້າງແຂວງ ເຂົ້າຮ່ວມ.
ສະຫາຍ ໜູໄຊ ນໍກີຢາ ໄດ້ລາຍງານສະພາບການເຄື່ອນໄຫວວຽກງານຂອງຊາວໜຸ່ມແຂວງໂດຍສັງເຂບວ່າ: ທົ່ວແຂວງມີໄວໜຸ່ມທັງໜົດ 92.987 ຄົນ, ຍິງ 43.988 ຄົນ, ເຂົ້າເປັນສະມາຊິກຊາວໜຸ່ມ ປະຊາຊົນ ປະຕິວັດລາວ 29.409 ສະຫາຍ, ຍິງ 12.813 ສະຫາຍ, ມີໄວເຍົາວະຊົນທັງໝົດ 27.600 ນ້ອງ, ຍິງ 14.688 ນ້ອງ, ເປັນສະມາຊິກເຍົາວະຊົນທັນວາ 21.555 ນ້ອງ, ຍິງ 12.699 ນ້ອງ, ມີໄວອະນຸຊົນ 13.978 ນ້ອງ, ຍິງ 7.864 ນ້ອງ, ເປັນສະມາຊິກອະນຸຊົນ 9.396 ນ້ອງ, ຍິງ 5.480 ນ້ອງ; ມີ 11 ຄະນະ ຊປປລ ເມືອງ, 61 ຄະນະ ຊປປລ ຮາກຖານ, 1 ພະແນກຊາວໜຸ່ມກອງບັນຊາການທະຫານແຂວງ, 842 ໜ່ວຍຮາກຖານຊາວໜຸ່ມ ແລະ ມີ 235 ໜ່ວຍຂຶ້ນກັບຄະນະ ຊປປລ ຮາກຖານ, ມີກອງເຍົາວະຊົນ 289 ກອງ, ໝວດ 833 ໝວດ ແລະ ໝູ່ 6.487 ໝູ່.
ໂອກາດນີ້, ສະຫາຍ ທອງລີ ສີສຸລິດ ໄດ້ຮຽກຮ້ອງໃຫ້ຄະນະນໍາຊາວໜຸ່ມສຸມໃສ່ຈັດຕັ້ງປະຕິບັດການກະກຽມ ແລະ ດໍາເນີນກອງປະຊຸມ 3 ຂັ້ນຂອງຊາວໜຸ່ມໃຫ້ສໍາເລັດຕາມຈຸດປະສົງ ແລະ ລະດັບຄາດໝາຍທີ່ວາງໄວ້, ເອົາໃຈໃສ່ໂຄສະນາສຶກສາອົບຮົມຊາວໜຸ່ມ - ໄວໜຸ່ມໃຫ້ມີຄຸນທາດການເມືອງ, ມີຄວາມຮູ້, ຄວາມສາມາດ, ຫຼີກລ້ຽງປະກົດການຫຍໍ້ທໍ້ຕ່າງໆ ເປັນຕົ້ນແມ່ນບັນຫາຢາເສບຕິດຊະນິດໃໝ່ເຊັ່ນ: ນໍ້າກະທ່ອມ, ຄໍລາເຈນ, ຢາສູບໄຟຟ້າ ທີ່ກໍາລັງທໍາລາຍຊາວໜຸ່ມໃນປັດຈຸບັນຢ່າງເປັນວົງກວ້າງ, ສ້າງຂະບວນການຕ່າງໆໃຫ້ເປັນຂະບວນການຟົດຟື້ນຕາມທ່າແຮງຂອງສະພາບຈຸດພິເສດຂອງທ້ອງຖິ່ນ; ຂຸດຄົ້ນທຸກທ່າແຮງບົ່ມຊ້ອນ; ສືບຕໍ່ເສີມຂະຫຍາຍຍົກສູງຄວາມສາມັກຄີເປັນເອກະພາບ, ປຸກລະດົມກໍາລັງຊາວໜຸ່ມປະກອບສ່ວນເຂົ້າໃນການແກ້ໄຂບັນຫາຕ່າງໆ ທີ່ສົ່ງຜົນກະທົບຕໍ່ການດໍາລົງຊີວິດຂອງຊາວໜຸ່ມ - ໄວໜຸ່ມໃນສະພາບປັດຈຸບັນ; ເພື່ອສ້າງກໍາລັງແຮງຊາວໜຸ່ມໃຫ້ມີຄວາມເຂັ້ມແຂງ, ເປັນກໍາລັງແຮງທີ່ກຽມພ້ອມບໍ່ວ່າສະພາບການຈະພົບຄວາມຫຍຸ້ງຍາກປານໃດກໍຕາມ ຊາວໜຸ່ມຍິ່ງຕ້ອງໄດ້ຍົກສູງຄວາມຮັບຜິດຊອບໃນການປະກອບສ່ວນເປັນແຂນຂວາຂອງພັກ ເປັນກະດຸກສັນຫຼັງຂອງປະເທດຊາດ ຢ່າງແທ້ຈິງ.
ນອກຈາກນີ້ ສະຫາຍຍັງໄດ້ໄປເບິ່ງສະຖານທີ່ໃນການກະກຽມກໍ່ສ້າງສູນພັດທະນາວິຊາຊີບຂອງຄະນະບໍລິຫານງານຊາວໜຸ່ມແຂວງ, ຢ້ຽມຢາມຄອບຄົວຊາວໜຸ່ມຕົວແບບທາງດ້ານການປູກເຫັດເປັນສິນຄ້າ.
(ຂ່າວ: ຊາວໜຸ່ມແຂວງ ໄຊຍະບູລີ).
ຄໍາເຫັນ