ບົດລາຍງານລະບຸວ່າ: 2 ສ່ວນ 3 ຂອງຜູ້ບໍລິໂພກຊາວອັງກິດເຄີຍຊື້ສິນຄ້າມືສອງທາງອອນລາຍໃນປີທີ່ຜ່ານມາ ແລະ ຄາດວ່າຈະເພີ່ມຂຶ້ນອີກໃນປີນີ້, ໂດຍປັດໄຈສ່ວນໃຫຍ່ມາຈາກຄວາມກັງວົນດ້ານສິ່ງແວດລ້ອມ ແລະ ຄວາມພະຍາຍາມຫຼຸດຜ່ອນຄ່າໃຊ້ຈ່າຍໃນທ່າມກາງຄ່າຄອງຊີບທີ່ສູງ, ລວມທັງຜູ້ຄົນຫັນໄປຂາຍເຄື່ອງນຸ່ງ ຫຼື ເຄື່ອງໃຊ້ແລ້ວເພື່ອສ້າງລາຍຮັບພິເສດ.
ທ່ານ ໂທມັສ ແພລນເທງກາ ຊີອີໂອຂອງ Vinted ແພລັດຟອມຂາຍເສື້ອຜ້າມືສອງທີ່ໃຫຍ່ທີ່ສຸດຂອງເອີຣົບ ຊຶ່ງປັດຈຸບັນມີມູນຄ່າ 5.8 ຕື້ໂດລາ, ກໍາລັງຂະຫຍາຍປະເພດສິນຄ້າໄປຍັງອຸປະກອນເອເລັກໂຕຣນິກ, ຂອງຫຼິ້ນ, ເຄື່ອງຫຼິ້ນເກມ ແລະ ອາດລວມເຖິງໂມງຫຼູຫຼາໃນອະນາຄົດ.
ໃນຂະນະດຽວກັນ, ຍີ່ຫໍ້ຂາຍຍ່ອຍທີ່ສຳຄັນກໍເລີ່ມຮັບເອົາທ່າອ່ຽງດັ່ງກ່າວເຊັ່ນ: Inditex ເຈົ້າຂອງອານາຈັກ Zara ໄດ້ຂະຫຍາຍແພລັດຟອມເສື້ອຜ້າມືສອງໄປສູ່ ສະຫະລັດ ອາເມຣິກາ, ຝຣັ່ງ ແລະ ເຢຍລະມັນ, ໃນຂະນະທີ່ Amazon ໄດ້ເພີ່ມ Line ສິນຄ້າ Amazon Second Chance ເພື່ອຂາຍສິນຄ້າທີ່ຖືກສົ່ງຄືນໃນລາຄາພິເສດ ແລະ ສະເໜີສິນຄ້າແຟຊັນມືສອງສະພາບດີເຊັ່ນ: ຊຸດກະໂປ່ງ Dior ແລະ ໂສ້ງວອມ Gucci.
CEBR ລະບຸວ່າ, ໃນປະເພດສິນຄ້າທີ່ນິຍົມເຊັ່ນ: ເຕັກໂນໂລຊີ, ແຟຊັນ ແລະ ເຄື່ອງໃຊ້ໃນເຮືອນ, ສິນຄ້າມືສອງກວມເອົາ 34% - 45% ຂອງການໃຊ້ຈ່າຍຂອງຜູ້ບໍລິໂພກໃນອັງກິດ ຊຶ່ງສະທ້ອນໃຫ້ເຫັນການປ່ຽນແປງພຶດຕິກຳການຊື້.
ທັງນີ້, Amazon.com ໄດ້ມອບໃຫ້ CEBR ເຮັດບົດລາຍງານການຄົ້ນຄວ້າສະບັບນີ້ຂຶ້ນ ຊຶ່ງໄດ້ສໍາຫຼວດຫຼາຍກວ່າ 10,000 ຄົນໃນທົ່ວເອີຣົບ.
ຄໍາເຫັນ