ພິທີປະກາດພະນັກງານການນຳ ກະຊວງແຜນການ ແລະ ການລົງທຶນ (ຜທ)ອອກພັກການ-ຮັບອຸດໜູນບຳນານ ແລະ ປະກາດການຈັດຕັ້ງ ໄດ້ຈັດຂຶ້ນໃນວັນທີ 30 ມັງກອນນີ້ ທີ່ກະຊວງດັ່ງກ່າວ ໂດຍການເປັນປະທານຂອງ ທ່ານ ເພັດ ພົມພິພັກ ເລຂາຄະນະພັກລັດຖະມົນຕີ ກະຊວງແຜນການ ແລະ ການລົງທຶນ,ມີພາກສ່ວນທີ່ກ່ຽວຂ້ອງເຂົ້າຮ່ວມ.
ໂດຍປະຕິບັດຕາມແຈ້ງການຂອງຄະນະຈັດຕັ້ງສູນກາງພັກ ກ່ຽວກັບການປະຕິບັດນະໂຍບາຍພັກການ-ຮັບອຸດໜູນບຳນານ ຂອງພະນັກງານຂັ້ນສູນກາງຄຸ້ມຄອງ ສະບັບເລກທີ 20/ຄຈສພ, ລົງວັນທີ 3 ມັງກອນ 2025; ມະຕິຕົກລົງວ່າດ້ວຍການອະນຸມັດໃຫ້ພະນັກງານການນຳຂັ້ນສູງອອກພັກການ-ຮັບອຸດໜູນບຳນານ ເລກທີ 323/ຄລສພ, ລົງວັນທີ 29 ພະຈິກ 2025 ແລະ ເລກທີ 335/ຄລສພ, ລົງວັນທີ 2 ມັງກອນ 2025; ດຳລັດວ່າດ້ວຍການອະນຸມັດໃຫ້ພະນັກງານການນຳຂັ້ນສູງອອກພັກການ-ຮັບອຸດໜູນບຳນານ ເລກທີ 620/ນຍ, ລົງວັນທີ 24 ຕຸລາ 2024, ເລກທີ 647/ນຍ, ລົງວັນທີ 29 ພະຈິກ2024 ແລະ ເລກທີ 712/ນຍ, ລົງວັນທີ 30 ທັນວາ 2024. ໄດ້ປະກາດພະນັກງານການນໍາຂອງກະຊວງແຜນການ ແລະ ການລົງທຶນ ພັກການ-ຮັບອຸດໜູນບໍານານ ປະກອບມີ:ທ່ານ ວຽງສະຫວັນ ວິໄລພອນ ຮອງປະທານຄະນະກໍາມະການຮ່ວມມືລາວ-ຫວຽດນາມ; ທ່ານ ບິດ ບົວລີວັນ ຮອງຫົວໜ້າສະຖາບັນຄົ້ນຄວ້າວິໄຈການພັດທະນາ ແລະ ສູນຝຶກອົບຮົມ; ທ່ານ ເລື່ອມ ສົນສີວິໄລ ຮອງຫົວໜ້າສູນສະຖິຕິແຫ່ງຊາດ; ທ່ານ ທິບສະຫວັນ ອິນທາຣັກ ຜູ້ຊ່ວຍຄະນະສູນສະຖິຕິແຫ່ງຊາດ ແລະ ໄດ້ປະກາດແຕ່ງຕັ້ງ ທ່ານ ນາງ ແສງເດືອນ ໄຊຍະສອນ ເປັນຫົວໜ້າຫ້ອງການ ຄະນະກຳມະການຮ່ວມມື ລາວ-ຈີນ, ທ່ານ ນາງ ພັນຈິນດາ ເລັ່ງສະຫວັດ ເປັນຮອງປະທານຄະນະກຳມະການຮ່ວມມືລາວ-ຫວຽດນາມ, ທ່ານ ວຽງຄອນ ບົວພະຈັນ ເປັນຮອງຫົວໜ້າສະຖາບັນຄົ້ນຄວ້າວິໄຈການພັດທະນາ ແລະ ສູນຝຶກອົບຮົມ,ທ່ານ ນາລັດ ບົວດອກທອງ ເປັນຮອງຫົວໜ້າກົມກວດກາ.
ໃນໂອກາດດັ່ງກ່າວ, ທ່ານ ເພັດ ພົມພິພັກ ກ່າວວ່າ:ການປັບປຸງກົງຈັກການຈັດຕັ້ງ ແມ່ນວຽກປົກກະຕິເປັນແຕ່ລະໄລຍະ.ດັ່ງນັ້ນ, ບັນດາສະຫາຍທີ່ໄດ້ຮັບການແຕ່ງຕັ້ງ ຫຼື ບໍ່ໄດ້ຮັບການແຕ່ງຕັ້ງ, ຈົ່ງສືບຕໍ່ເພີ່ມທະວີຄວາມຮັບຜິດຊອບຂອງຕົນ ເພື່ອພ້ອມກັນຈັດຕັ້ງຜັນຂະຫຍາຍມະຕິຂອງກອງປະຊຸມໃຫຍ່ຄັ້ງທີ XI ຂອງພັກ, ວິໄສທັດ ຮອດປີ 2030 ແລະ ຍຸດທະສາດການພັດທະນາ ຮອດປີ 2025 ແລະ ແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IX(2021-2025) ແລະ ເປັນເຈົ້າການຈັດຕັ້ງປະຕິບັດມະຕິ 04/ກມສພ ວ່າດ້ວຍ ການສ້າງເສດຖະກິດເອກະລາດເປັນເຈົ້າຕົນເອງໃນໄລຍະໃໝ່ໃຫ້ມີໝາກຜົນຕົວຈິງ,ສືບຕໍ່ເອົາໃຈໃສ່ສຶກສາອົບຮົມການເມືອງ-ແນວຄິດ ໃຫ້ສະມາຊິກພັກ ແລະ ພະນັກງານ, ເພີ່ມຄວາມຮັບຜິດຊອບ, ເດັດຂາດ ແລະ ເປັນເຈົ້າການສູງຂຶ້ນ,ວຽກຮ່ວມມືກັບສາກົນ, ຮ່ວມມືລາວ-ຫວຽດນາມ ແລະຮ່ວມມືລາວ-ຈີນ ການຮ່ວມມືຫຼາຍຝ່າຍ, ສອງຝ່າຍ ແລະ ຂອບການຮ່ວມມືຕ່າງໆ ເປັນວຽກທີ່ສໍາຄັນຫຼາຍໃນການຊຸກຍູ້ການຂະຫຍາຍຕົວກໍຄືການພັດທະນາເສດຖະກິດ-ສັງຄົມຂອງປະເທດ, ສະນັ້ນ ການຂົນຂວາຍການຊ່ວຍເຫຼືອທາງດ້ານວິຊາການ ແລະ ທຶນຮອນ ເຂົ້າມາຕ້ອງມີຈຸດສຸມ, ມີການເລືອກເຟັ້ນ ແລະ ເປັນລະບົບ,ສະເໜີໃຫ້ບັນດາສະຫາຍ ສືບຕໍ່ຕັ້ງໜ້າຝຶກຝົນຫຼໍ່ຫຼອມຕົນເອງ ທາງດ້ານຄຸນທາດການເມືອງ, ຄຸນສົມບັດສິນທຳປະຕິວັດ ໃຫ້ສົມຄູ່ກັບໜ້າທີ່ຕຳແໜ່ງທີ່ໄດ້ຮັບມອບໝາຍ, ມີຄວາມເປັນແບບຢ່າງທີ່ດີໃຫ້ແກ່ພະນັກງານ; ຍົກລະດັບຄວາມຮູ້ຄວາມສາມາດດ້ານຕ່າງໆໃຫ້ນັບມື້ນັບສູງຂຶ້ນເລື້ອຍໆ,ສະເໜີໃຫ້ບັນດາສະຫາຍຕ້ອງກຳແໜ້ນພາລະບົດບາດການເຄື່ອນໄຫວວຽກງານຂອງກົມກອງຕົນ ແລະ ໃຫ້ເພີ່ມທະວີການສຶກສາອົບຮົມການເມືອງແນວຄິດໃຫ້ພະນັກງານພາຍໃນກົມກອງຂອງຕົນໃຫ້ນັບມື້ນັບດີຂຶ້ນ, ຊຸກຍູ້ໃຫ້ພະນັກງານປະຕິບັດລະບຽບວິໄນ, ປະຕິບັດພັນທະໜ້າທີ່ ແລະ ກໍຍົກສູງຄວາມຮັບຜິດຊອບຕໍ່ໜ້າທີ່ວຽກງານ ໃຫ້ສູງຂຶ້ນເລື້ອຍໆ
(ຂ່າວ-ພາບ:ສຳນານ)
ຄໍາເຫັນ