ທ່ານ ພົຈວ ແສງປະເສີດ ສຸທຳມະວົງ ຫົວໜ້າກົມສື່ສານຜູ້ປະຈຳການຄະນະຮັບຜິດຊອບການຫັນເປັນດີຈີຕອນ ກ່າວວ່າ: ໃນໄລຍະຜ່ານມາ, ຄະນະຮັບຜິດຊອບແຕ່ລະພາກສ່ວນໄດ້ເອົາໃຈໃສ່ໂຄສະນາເຜີຍແຜ່ ແນວທາງແຜນນະໂຍບາຍຂອງພັກ, ກົດໝາຍຂອງລັດ, ນິຕິກຳຕ່າງໆທີ່ຕິດພັນເຖິງວຽກງານຫັນເປັນດີຈີຕອນ ໃຫ້ນາຍ ແລະ ພົນຕຳຫຼວດຮັບຮູ້, ເຂົ້າໃຈ ແລະ ຫັນປ່ຽນຈິນຕະນາການໃຫ້ມີຄວາມເຊື່ອໝັ້ນຕໍ່ການນໍາພາຂອງພັກ-ລັດຕາມທິດ 3 ເສົາຄໍ້າຂອງລັດຖະບານເພື່ອພັດທະນາລັດດີຈີຕອນ, ເສດຖະກິດດີຈີຕອນ ແລະ ສັງຄົມດີຈີຕອນ; ເປັນໃຈກາງໃນການພົວພັນປະສານງານກັບພາກສ່ວນທີ່ກ່ຽວຂ້ອງເພື່ອຊຸກຍູ້ສົ່ງເສີມບັນດາກົມ-ກອງວິຊາສະເພາະຈັດຕັ້ງປະຕິບັດກິດຈະກຳ ໂຄງການຕ່າງໆ, ສຶກສາຄົ້ນຄວ້ານໍາໃຊ້ລະບົບບໍລິຫານລັດດີຈີຕອນເຂົ້າມານໍາໃຊ້ພາຍໃນກໍາລັງ; ເປີດຝຶກອົບຮົມລະບົບຫ້ອງການທັນສະໄໝ (E-Office) ໂດຍໄດ້ເຊີນຄູ-ອາຈານຈາກສູນບໍລິຫານລັດດີຈີຕອນກະຊວງເຕັກໂນໂລຊີ ແລະ ການສື່ສານມາສິດສອນວິທີຄຸ້ມຄອງນໍາໃຊ້ໂປຣແກຣມໃຫ້ວິຊາການກົມຄຸ້ມຄອງເອກະສານຫ້ອງວ່າການກະຊວງ ແລະ ກົມສື່ສານ. ນອກນັ້ນ, ຍັງມີດ້ານອ່ອນ ແລະ ຂໍ້ຄົງຄ້າງອີກຈຳນວນໜຶ່ງ.
ສຳລັບທິດທາງແຜນການປະຈຳປີ 2025 ສືບຕໍ່ເຊີດຊູບົດບາດການນໍາພາຂອງຄະນະພັກທຸກຂັ້ນ ເພື່ອປູກຈິດສໍານຶກໃຫ້ຄະນະພັກ-ຄະນະນໍາທຸກຄົນເຫັນໄດ້ຄວາມໝາຍຄວາມສໍາຄັນ ແລະ ປະກອບສ່ວນຢ່າງຕັ້ງໜ້າໃນການຫັນເປັນດີຈີຕອນຂອງກໍາລັງ ປກສ ໃຫ້ທຽບທັນກັບຂະແໜງການອື່ນ; ພັດທະນາພື້ນຖານໂຄງລ່າງ ໂດຍການນໍາໃຊ້ເຕັກໂນໂລຊີດີຈີຕອນເຂົ້າໃນທຸກຂົງເຂດວຽກງານວິຊາສະເພາະໃຫ້ຫຼາຍຂຶ້ນ, ສຸມໃສ່ຈັດຕັ້ງປະຕິບັດກິດຈະກຳໂຄງການສ້າງເຄືອຂ່າຍເນັດເວີກຂອງກະຊວງໃຫ້ສໍາເລັດຕາມລະດັບຄາດໝາຍ; ພັດທະນາຊັບພະຍາກອນມະນຸດໃຫ້ມີຄວາມຮູ້-ຄວາມສາມາດທາງດ້ານດີຈີຕອນສາມາດນໍາໃຊ້ເຕັກໂນໂລຊີໄດ້ຢ່າງຄ່ອງແຄ້ວ, ເຂົ້າໃຈເນື້ອໃນຂອງດີຈີຕອນ ແລະ ເຂົ້າເຖິງການນໍາໃຊ້ເຕັກໂນໂລຊີດີຈີຕອນຢ່າງມີຄຸນນະພາບ, ຄົ້ນຄວ້າ, ປະດິດສ້າງ ແລະ ສື່ສານດ້ວຍເຄື່ອງມືທີ່ເໝາະສົມ; ຊຸກຍູ້, ສົ່ງເສີມ ແລະ ເປີດກວ້າງການຮ່ວມມືກັບຄູ່ຮ່ວມມືທັງພາຍໃນ ແລະ ຕ່າງປະເທດເພື່ອຫັນເປັນດີຈີຕອນຂອງກະຊວງ ປກສ, ຫຼຸດຜ່ອນການໃຊ້ງົບປະມານຂອງລັດໃນການລົງທຶນເຮັດໃຫ້ມີສ່ວນຮ່ວມທັງພາກລັດ ແລະ ເອກະຊົນ.
ຂ່າວ: ກະແຕ
ຄໍາເຫັນ