ຜ່ານມາ ທີ່ກະຊວງຍຸຕິທໍາ ໂດຍການເປັນປະ ທານຂອງທ່ານ ບຸນລ້ອມ ດວງມາລາ ຮອງຫົວໜ້າກົມໂຄສະນາເຜີຍແຜ່ກົດໝາຍ, ມີຫົວໜ້າ-ຮອງຫົວໜ້າພະແນກ ພ້ອມດ້ວຍນັກຝຶກອົບຮົມເຂົ້າຮ່ວມທັງໝົດ 20 ທ່ານ ຍິງ 6 ທ່ານ.
ຊຸດອົບຮົມຄັ້ງນີ້ຜູ້ເຂົ້າຮ່ວມຈະໄດ້ຮຽນຮູ້ລັກສະນະສະເພາະ ແລະ ຈຸດພິເສດຂອງການດໍາເນີນລາຍການວິທະຍຸ, ເຕັກນິກການຜະລິດລາຍການວິທະຍຸ, ຂັ້ນຕອນການດໍາເນີນລາຍການ, ວິທີການດໍາເນີນລາຍການວິທະຍຸ, ການນໍາໃຊ້ຄໍາສັບທາງການ ແລະ ຄໍາສັບທາງດ້ານກົດໝາຍ, ສິ່ງທີ່ຄວນເອົາໃຈໃສ່ ແລະ ຂໍ້ຫ້າມໃນການດໍາເນີນລາຍການວິທະຍຸ, ແນະນໍາໂປຣແກຣມທີ່ນໍາໃຊ້ເຂົ້າໃນການຕັດຕໍ່ (Adobe Audition cc 2017), ວິທີການຕັດຕໍ່ ແລະ ປະກອບລາຍການ. ພ້ອມນີ້ຜູ້ເຂົ້າຮ່ວມຈະໄດ້ຝຶກປະຕິບັດຕົວຈິງຢູ່ຫ້ອງສະຕູດີໂອ ເປັນຕົ້ນການດໍາເນີນລາຍການວິທະຍຸ, ການສໍາພາດ ແລະ ການຂຽນຂ່າວ ແນໃສ່ເຮັດໃຫ້ນັກຝຶກອົບຮົມຮັບຮູ້ເຂົ້າໃຈ ແລະ ນໍາໄປຈັດຕັ້ງປະຕິບັດເຂົ້າໃນວຽກງານທີ່ຕົນຮັບຜິດຊອບຢ່າງມີປະສິດທິຜົນ ສາມາດເປັນກະບອກສຽງອັນແຫຼມຄົມຂອງພັກ -ລັດ ໃນການໂຄສະນາເຜີຍແຜ່ແນວທາງຂອງພັກ, ກົດໝາຍ ແລະ ນິຕິກໍາລຸ່ມກົດໝາຍທີ່ລັດປະກາດໃຊ້ແຕ່ລະໄລຍະໃຫ້ປະຊາຊົນໄດ້ຮັບຮູ້ເຂົ້າໃຈ, ມີສະຕິເຄົາລົບ ແລະ ປະຕິບັດກົດໝາຍໃຫ້ນັບມື້ສູງຂຶ້ນ.
ໂອກາດນີ້, ທ່ານ ບຸນລ້ອມ ດວງມາລາ ໄດ້ໃຫ້ກຽດໂອ້ລົມ ພ້ອມທັງເນັ້ນໜັກໃຫ້ຄູຝຶກຊີ້ແຈງອະທິບາຍ ເນື້ອໃນແຕ່ລະບົດຢ່າງມີຈຸດສຸມ ສາມາດກຳໄດ້ແຕ່ລະບາດບາດກ້າວຂອງການເປັນນັກຈັດລາຍການວິທະຍຸ ແລະ ນັກຝຶກອົບຮົມໃຫ້ເອົາໃຈໃສ່ຄົ້ນຄ້ວາແລກປ່ຽນຄໍາຄິດຄໍາເຫັນຢ່າງກົງໄປກົງມາ ພາຍຫຼັງສໍາເລັດການຝຶກອົບຮົມຜູ້ເຂົ້າຮ່ວມສາມາດດໍາເນີນລາຍການວິທະຍຸພາກພາສາມົ້ງ ແລະ ພາສາກຶມມຸ (ແບບບໍ່ປະຈໍາການ) ໄດ້ໃນອະນາຄົດ ຊຸດອົົບຮົມດັ່ງກ່າວໄດ້ດໍາເນີນໄປເປັນເວລາ 5 ວັນ ຈຶ່ງສຳເລັດ.
ຂ່າວ-ພາບ: ໄຊຍະສິດ
ຄໍາເຫັນ