ໂດຍການເປັນກຽດເຂົ້າຮ່ວມຂອງທ່ານຄໍາປຸ່ນ ນວນສະບັບ ວ່າການເລຂາພັກເມືອງ ວ່າການເຈົ້າເມືອງແກ່ນທ້າວ, ມີແຂກຖືກເຊີນ ແລະ ພາກສ່ວນກ່ຽວຂ້ອງເຂົ້າຮ່ວມ 160 ກວ່າຄົນ.
ກ່ອນຈະເຂົ້າສູ່ພິທີ ທ່ານຄໍາປຸ່ນ ນວນສະບັບ ໄດ້ນໍາພາຄະນະ, ອົງການປົກຄອງເມືອງ ວາງກະຕ່າດອກໄມ້ຢູ່ຕໍ່ໜ້າອານຸສອນສະຖານປະທານໄກສອນ ພົມວິຫານ ເພື່ອສະແດງຄວາມກະຕັນຍູຮູ້ບຸນຄຸນຢ່າງລົ້ນເຫຼືອຕໍ່ປະທານໄກສອນ ພົມວິຫານ ຊຶ່ງເປັນຜູ້ສ້າງຕັ້ງ ແລະ ນໍາພາກອງທັບປະຊາຊົນລາວ, ທັງອຸທິດເຫື່ອແຮງ, ເລືອດເນື້ອ, ຊີວິດອິນຊີໃນການຕໍ່ສູ້ກູ້ຊາດ, ຍາດເອົາເອກະລາດອະທິປະໄຕມາສູ່ປວງຊົນລາວທັງຊາດໄດ້ຢ່າງສະຫງ່າງາມ
ໃນພິທີ, ທ່ານ ຄໍາປຸ່ນ ນວນສະບັບ ໄດ້ໃຫ້ກຽດປາຖະກະຖາເລົ່າມູນເຊື້ອວັນສ້າງຕັ້ງກອງທັບປະຊາຊົນລາວຄົບຮອບ 76 ປີ ຊຶ່ງບາງຕອນທ່ານ ໄດ້ກ່າວວ່າ: ໃນຕອນເຊົ້າຂອງວັນທີ 20 ມັງກອນ 1949 ຢູ່ເຂດທີ່ໝັ້ນຖໍ້າແມເຂດລາວຮຸ່ງພຽງສາເມືອງຊຽງຄໍ້ ແຂວງຫົວພັນ, ທ່ານ ໄກສອນ ພົມວິຫານ ໄດ້ປະກາດສ້າງຕັ້ງກອງລາດຊະວົງຂຶ້ນຢ່າງເປັນທາງການໂດຍແມ່ນທ່ານ ເພັດສະວົງ ເປັນຫົວໜ້າການທະຫານ, ທ່ານ ສີສະຫວາດ ແກ້ວບຸນພັນ ເປັນຫົວໜ້າການເມືອງ ແລະ ທ່ານ ຄໍາມູນ ເປັນຮອງຜູ້ບັນຊາການ. ໃນມື້ດຽວກັນນັ້ນ, ໂດຍພາຍໃຕ້ການນໍາພາອັນແທດເຖິງຂອງເລຂາພັກກອມມູນິດອິນດູຈີນປະຈໍາແຄວ້ນລາວ ໄດ້ຈັດຕັ້ງກອງປະຊຸມໂດຍເອົາສະຖານທີ່ກອງລາດຊະວົງເປັນບ່ອນປະຊຸມ ແລະ ໄດ້ປະກາດສ້າງຕັ້ງກອງທັບລາວອິດສະຫຼະຢ່າງເປັນທາງການໂດຍແມ່ນ ທ່ານ ໄກສອນ ພົມວິຫານ ເປັນຜູ້ປະກາດສ້າງຕັ້ງ ແລະ ເປັນຜູ້ບັນຊາໂດຍກົງ. ຖັດຈາກນັ້ນມາ ກໍໄດ້ປະກາດຮັບເອົາບັນດາກອງເອກະລາດອື່ນໆເຊັ່ນ: ກອງໄຊຈັກກະພັດ, ກອງຟ້າງຸ່ມ, ກອງປັດໄຈ ແລະ ກອງໄຊເຊດຖາໂຮມເຂົ້າເປັນກອງທັບລາວອິດສະຫຼະ. ນັບແຕ່ນັ້ນມາວັນທີ 20 ມັງກອນ 1949 ຈຶ່ງກາຍເປັນວັນປະຫວັດສາດແຫ່ງການສ້າງຕັ້ງກອງທັບປະຊາຊົນລາວ.
(ຂ່າວ: ແກ່ນທ້າວ)
ຄໍາເຫັນ