ທ່ານ ບຸນຍັງ ພັນທະວົງ ຮອງເຈົ້າເມືອງແກ່ນທ້າວ ຫົວໜ້າຄະນະຮັບຜິດຊອບຈັດງານ ໄດ້ລາຍງານໃຫ້ຮູ້ວ່າ: ງານປະກວດນາງສາວງາມ (ນາງສັງຂານ) ແມ່ນການຄັດເລືອກເອົານາງສາວງາມທີ່ມີຄວາມ ເໝາະສົມ ທີ່ຈະໄດ້ເປັນຕົວແທນໃຫ້ແກ່ເມືອງແກ່ນທ້າວໃນການເປັນນາງສັງຂານປະຈຳປີ ພສ 2568 ຊຶ່ງເປັນກິດຈະກໍາໜຶ່ງທີ່ເມືອງແກ່ນທ້າວໄດ້ຈັດຂຶ້ນ ແລະ ໄດ້ຮັບຄວາມສົນໃຈ, ນິຍົມຊົມຊອບຢູ່ໃນໝູ່ປະຊາຊົນຊັ້ນຄົນຕ່າງໆເປັນຢ່າງດີ. ອີກອັນໜຶ່ງເພື່ອເປັນການອານຸລັກຮັກສາຮີດຄອງປະເພນີອັນດີຂອງຊາດ ກໍຄື ຂອງທ້ອງຖີ່ນໃຫ້ຄຽງຄູ່ກັບປະຊາຊົນຄົນຮຸ່ນຫຼັງໄດ້ຮັບຮູ້ຢ່າງກ້ວາງຂວາງ ແລະ ໃຫ້ມີຄວາມເຂົ້າໃຈຢ່າງເລິກເຊິ່ງກ່ຽວກັບປະຫວັດຄວາມເປັນມາ, ທັງເປັນການສ້າງຄວາມສາມັກຄີລະຫວ່າງປະຊາຊົນຊັ້ນຄົນຕ່າງໆຢູ່ພາຍໃນເມືອງໃຫ້ມີຄວາມແໜ້ນແຟ້ນຂຶ້ນເລື້ອຍໆ.
ການປະກວດນາງສາວງາມ (ນາງສັງຂານ) ເພື່ອສະເຫຼີມສະຫຼອງບຸນປີໃໝ່ລາວ ພສ 2568ໃນປີນີ້ , ມີນ້ອງນາງສາວເຂົ້າຮ່ວມການປະກວດທັງໝົດ 17 ນ້ອງ. ໃນນັ້ນ, ຕາງໜ້າບ້ານເທດສະບານ 9 ນ້ອງ, ຕາງໜ້າພາກສ່ວນບໍລິເວນ 6 ນ້ອງ ແລະ ຕົວແທນຂອງບໍລິສັດ 2 ນ້ອງ. ຜ່ານການປະກວດ, ອັນດັບທີ 1 ໄດ້ແກ່ M2 ນາງ ສຸມິນຕາ ລັດຕະນະພອນ ຕົວແທນບ້ານທ້າວແກ່ນ ໄດ້ຮັບມົງກຸດ, ພ້ອມດ້ວຍສາຍສະພາຍ ແລະ ເງິນສົດ 6 ລ້ານກີບ, ອັນດັບທີ 2 ໄດ້ແກ່ M8 ນາງ ນັດທິດາ ພົມໄທ ຕົວແທນບໍລິສັດ ຈັນທະວົງ ກໍ່ສ້າງ-ຂົວທາງ ໄດ້ຮັບສາຍສະພາຍ ພ້ອມດ້ວຍເງິນສົດ 5 ລ້ານກີບ, ອັນດັບທີ 3 ໄດ້ແກ່ M5 ນາງ ນ້ອງມາຍ ສິງຄໍາ ຕົວແທນບໍລິເວນຫ້ວຍເລິກ-ວັງປາ ໄດ້ຮັບສາຍສະພາຍ ພ້ອມດ້ວຍເງິນສົດ 4 ລ້ານກີບ.
(ຂ່າວ: ແກ່ນທ້າວ, ພາບ: ຄໍາຜາຍ ສຸລິຍະວົງ)
ຄໍາເຫັນ