ສ່ວນຫຼາຍແມ່ນບາດເຈັບຈາກການຕົກໃຈໂດດຈາກບ່ອນທີ່ສູງ. ຂະນະທີ່ເກີດແຮງສັ່ນສະເທືອນຕໍ່ເນື່ອງ 50 ຄັ້ງ
ໃນວັນທີ 23 ເມສາ ຜ່ານມາ, ອົງການຄຸ້ມຄອງໄພພິບັດ ແລະ ເຫດສຸກເສີນຂອງລັດຖະບານຕວັກກີ (AFAD) ເປີດເຜີຍວ່າ: ເວລາປະມານ 12:13 ໂມງ (ຕາມເວລາທ້ອງຖິ່ນ) ເກີດແຜ່ນດິນໄຫວທີ່ມີຄວາມແຮງ 6.2 ຣິກເຕີ ໃນທະເລມາຣມາຣາ ຢູ່ໃກ້ກັບເມືອງຊິລິຟຣີ ຫ່າງຈາກນະຄອນອິສຕັນບູ ໄປທາງທິດຕາເວັນຕົກປະມານ 70 ກິໂລແມັດ, ໂດຍແຜ່ນດິນໄຫວຄັ້ງນີ້ແກ່ຍາວເປັນເວລາ 13 ວິນາທີ.
ເຖິງວ່າຈຸດສູນກາງຂອງແຜ່ນດິນໄຫວຈະຢູ່ຕໍ່າກວ່າລະດັບນ້ຳທະເລປະມານ 7 ກິໂລແມັດ, ແຕ່ແຮງສັ່ນສະເທືອນໄດ້ສົ່ງຜົນໃຫ້ຊາວນະຄອນອິສຕັນບູຈຳນວນຫຼາຍພາກັນແລ່ນໜີໄປຕາມຖະໜົນຫົນທາງດ້ວຍຄວາມຕື່ນຕົກໃຈ. ໂດຍສະເພາະຢູ່ໃນໃຈກາງເມືອງຟາຕີ ຊຶ່ງມີລາຍງານວ່າຕຶກອາຄານແຫ່ງໜຶ່ງໄດ້ພັງລົງ.
ທ່ານ ອາລີ ເຍຣລິກາຍາ ລັດຖະມົນຕີກະຊວງພາຍໃນ ຂອງຕວັກກີ ກ່າວວ່າ: ແຜ່ນດິນໄຫວໄດ້ແກ່ຍາວເປັນເວລາ 13 ວິນາທີ ແລະໄດ້ເກີດແຮງສັ່ນສະເທືອນຢ່າງໜ້ອຍ 51 ຄັ້ງ ໂດຍມີຄວາມແຮງທີ່ສຸດ ຂະໜາດ 5.9 ຣິກເຕີ
ເຖິງແມ່ນວ່າບໍ່ມີຜູ້ເສຍຊີວິດໂດຍກົງຈາກແຜ່ນດິນໄຫວ, ແຕ່ຢ່າງນ້ອຍ 151 ຄົນໄດ້ຮັບບາດເຈັບຈາກການໂດດຈາກບ່ອນທີ່ສູງດ້ວຍຄວາມຕົກໃຈ. ໂດຍເຈົ້າໜ້າທີ່ໄດ້ຮຽກຮ້ອງໃຫ້ປະຊາຊົນຈົ່ງມີສະຕິລະວັງຕົວ ແລະ ລະວັງແຮງສັ່ນສະເທືອນທີ່ອາດຈະເກີດຂຶ້ນ ແລະ ເຈົ້າໜ້າທີ່ໄພພິບັດຂອງຕວັກກີໄດ້ເຕືອນປະຊາຊົນວ່າ: ແຜ່ນດິນໄຫວອາດຈະຍັງບໍ່ທັນສິ້ນສຸດລົງແລະແຮງສັ່ນສະເທືອນທີ່ຕາມມາອາດຈະເຮັດໃຫ້ເກີດຄວາມເສຍຫາຍຕື່ມອີກ.
ຄໍາເຫັນ