ໄຂ້ຫວັດສັດປີກຍັງມີຄວາມສ່ຽງຕໍ່າຕໍ່ລະບົບສາທາລະນະສຸກໂລກ

 ໃນຂະນະທີ່ຄວາມສ່ຽງຈາກການຕິດເຊື້ອໃນກຸ່ມປະຊາຊົນທີ່ມີໂອກາດສຳຜັດກັບເຊື້ອພະຍາດໃນອາຊີບຕ່າງໆນັ້ນແມ່ນຢູ່ໃນລະດັບຕໍ່າຈົນເຖິງປານກາງ.
ການປະເມີນຄັ້ງນີ້, ອີງຕາມຂໍ້ມູນຈົນເຖິງ ວັນທີ 18 ທັນວາ ຜ່ານມາຊີ້ໃຫ້ເຫັນວ່າ: ການຕິດເຊື້ອຂອງມະນຸດສ່ວນໃຫຍ່ເກີດຈາກການສຳຜັດກັບສັດທີ່ຕິດເຊື້ອຫຼື ສະພາບແວດລ້ອມທີ່ປົນເປື້ອນ. ເຖິງແມ່ນວ່າມີການເພີ່ມຂຶ້ນຂອງກໍລະນີຕິດເຊື້ອ ແຕ່ຈໍານວນທັງໝົດຍັງຢູ່ໃນລະດັບຕໍ່າແລະບໍ່ມີຜົນກະທົບອັນໃຫຍ່ຫຼວງຕໍ່ສາທາລະນະສຸກໃນທົ່ວໂລກ. ແນວໃດກໍຕາມ, ການຕິດເຊື້ອຈາກສັດສູ່ສັດຍັງຄົງມີຢູ່. ໂດຍສະເພາະໃນຂົງເຂດທີ່ຂາດມາດຕະການປ້ອງກັນທີ່ມີປະສິດທິຜົນ ຊຶ່ງເຮັດໃຫ້ຜູ້ທີ່ເຮັດວຽກໃນຟາມ ແລະ ບຸກຄົນຕ່າງໆທີ່ສຳຜັດສັດທີ່ຕິດເຊື້ອມີຄວາມສ່ຽງທີ່ແຕກຕ່າງກັນມັນຂຶ້ນກັບສະພາບຂອງທ້ອງຖິ່ນແລະຄວາມພະຍາຍາມໃນການຄວບຄຸມ.
ໃນກອງປະຊຸມຖະແຫຼງຂ່າວ ເມື່ອວັນທີ 17 ທັນວາ ຜ່ານມາ ທີ່ນະຄອນເຈນີວາ ປະເທດສະວິດ ນັ້ນ. ຜູ້ຊ່ຽວຊານຈາກ WHO, FAO ແລະ WOAH ໄດ້ອະທິບາຍເຖິງສະຖານະການໆລະບາດຂອງພະຍາດ H5N1 ທົ່ວໂລກ ແລະເຕືອນເຖິງວິວັດທະນາການຂອງເຊື້ອໄວຣັດ ນີ້.
ທ່ານດຣ. ມາເຣຍ ຟານ ເດີໂຄຟ ຜູ້ຊ່ຽວຊານດ້ານພະຍາດທີ່ເກີດໃໝ່ ຂອງ WHOລາຍງານວ່າ: ໃນປີ 2024, ມີການບັນທຶກກໍລະນີການຕິດເຊື້ອ H5N1 ໃນມະນຸດ 76 ຄົນ ລວມທັງຢູ່ໃນສະຫະລັດ 61 ຄົນ ຊຶ່ງສ່ວນຫຼາຍແມ່ນຜູ້ທີ່ເຮັດວຽກຢູ່ໃນຟາມ.
ເຖິງແມ່ນວ່າ H5N1 ຍັງຄົງເປັນເຊື້ອໄວຣັດສັດປີກທົ່ວໄປແລະບໍ່ມີຫຼັກຖານຂອງການຕິດຕໍ່ຈາກຄົນຫາຄົນ, ທ່ານດຣ. ຟານ ເດີໂຄຟ ເຕືອນວ່າ: ໄວຣັດດັ່ງກ່າວສາມາດພັດທະນາຢ່າງໄວວາ.